Wɛ koka nkeketsha Okristo wambɔla lo nyuma

Ɔnɔnyi tshɛ, Akristo efula wambɔla lo nyuma mbɔtɔka lo Eohwelo. Vɔ wakamɛ la lowango lawɔ dikambo dia lɔsɛnɔ koko wakayotshikaka l’ɔtɛ w’ɛkɔkɔ wotshikitanyi, ɛkɔkɔ ɛmɔtshi l’atei awɔ tanemaka lo biukubuku Kalola le Jehowa. (Hɛb 12:1) Koko wanɛ wambɔla lo nyuma, wekekɔ la nɛmɔ le Jehowa ɔnɛ lakaasombe la dikila di’Ɔnande. (Ets 20:28; 1Pe 1:18, 19) Ngande wakokaso mbakimanyiya dia vɔ nkalola oya l’etshumanelo?

Dikumanyi dia l’etshumanelo nyangaka ndo kimanyiyaka Akristo wambɔla lo nyuma oko watoyangaka olami w’ɛkɔkɔ l’etete ɛkɔkɔ wakatombe oma lo lokoto. (Luk 15:4-7) Dui sɔ mɛnyaka ekokelo ka la ngandji kaki Jehowa. (Jɛr 23:3, 4) Sho tshɛ koka nkeketsha anto asɔ koko aha dikumanyi to. Welo wadjaso dia mbakɛnɛmɔlɛ ɔlɔlɔ ndo ngandji k’Akristo ngɛnyangɛnyaka Jehowa ndo koka monga la wahɔ efula. (Tok 19:17; Ets 20:35) Diakɔ diele, kanyiya onto ɔmɔtshi lambɔla lo nyuma lakokayɛ nkeketsha ndo sala dui sɔ aha la ntshimbatshimba.

NYENDE VIDƐO YELE L’ƆTƐ A DUI ƆNƐ TOKEKETSHA WANƐ WAMBƆLA LO NYUMA, NDO OMA LAASƆ NYOKADIMOLE LO AMBOLA WAYELA ANƐ:

• Kakɔna kakasale Abbey etena kakandahomana la Ɔmɛnyi wa Jehowa wakinde kombeyaka?

• Lande na kahombaso nsawola la dikumanyi naka tolanga nkimanyiya onto ɔmɔtshi lambɔla lo nyuma?

• Ngande wakayalɔngɔsɔla Abbey dia tembola Laura mbala ka hende?

• Ngande wakɛnya Abbey etete, solo dia lotutsha ndo ngandji etena kakandakeketshaka Laura?

• Wetshelo akɔna wakokaso nkondja oma lo wɛɛla waki Yeso watanema lo Luka 15:8-10?

• Ɛlɔlɔ akɔna wakonge etena kakadjama weolo oma le anto efula dia nkimanyiya Laura?