LƆSƐNƆ L’OKRISTO

Olimu w’esambishelo ndo wa mbetsha wekɔ ohomba efula dia mbetɛ anto ambeki

Yeso akadjangɛ ambeki ande dia ntshɔ ndo mbetɛ anto ambeki. (Mat 28:19) Kɛsɔ nɔmbaka dia nsambisha ndo mbetsha. Tena la tena, sho la dia ndjambolaka shoamɛ ɔnɛ: ‘Ngande wakokami mpama lo toho t’ohomba ta l’olimu wa mbetɛ anto ambeki?’

OLIMU W’ESAMBISHELO

Lo dihole dia nkonga di’anto ndja oya le so, sho pombaka nyanga l’etete tshɛ “wanɛ wakoka.” (Mat 10:11) Etena keso l’esambishelo, onde sho mongaka suke lo waaso wakokaso nsambisha ‘wanɛ watanema?’ (Ets 17:17) Ludiya akayokoma ombeki lo woho wakasambishaka Pɔɔlɔ l’etete.—Ets 16:13-15.

Samuɛlɛ ekɔ lo mbisha Ɛzɛkiyɛlɛ periodikɛ; Sɔlɔmɔna nde la Mariya wekɔ lo nsambisha Ɛzɛkiyɛlɛ nde la Abigayɛlɛ — “Onɛ woho ayɛ la pindju ndo toshake lonya layɛ momuya polo la dikɔlɔ” (Ond 11:6)

NYENDE VIDƐO YELE L’ƆTƐ A DUI ƆNƐ: TOTETEMALE NSAMBISHA “AHA LA MPEKƆ”—LO TSHAKITUDI NDO LO LUUDU LA LUUDU, NDO OMA LAASƆ, NYOKADIMOLE LO AMBOLA WAYELA ANƐ:

Lo lɔsɛnɔ lande la lushi la lushi, ngande wakɛnya Samuɛlɛ dia nde akayashaka l’etete dia nyanga dia monɛ ntɔngɔ y’akambo wa mɛtɛ?
Lande na kahombaso ntetemala lo toho tshɛ t’esambishelo?
Onto akɔna akokayɛ nsambisha losango la Diolelo etena kasalayɛ awui ayɛ wa lushi la lushi?

OLIMU WA MBETSHA

Dia mbetɛ anto ambeki, hatohombe nkomɛ tsho lo mbatshikɛ periodikɛ. Dia mbakimanyiya dia vɔ mpama lo nyuma, sho pombaka salaka wendelo w’eyoyo ndo nɔmbɔlaka wekelo wa Bible. (1Kɔ 3:6-9) Ko, ahombaso nsala naka welo wa l’etete wadjaso dia mbetsha anto akambo wa mɛtɛ wa Diolelo mongaka l’etombelo yema tshitshɛ? (Mat 13:19-22) Sho pombaka ntetemala nyanga wanɛ wele l’etema wele oko “nkɛtɛ y’amɛna.”—Mat 13:23; Ets 13:48.

Sɔlɔmɔna nde la Mariya wekɔ lo mbeka Bible kaamɛ la Ɛzɛkiyɛlɛ kaamɛ la Abigayɛlɛ; Ɛzɛkiyɛlɛ nde la Abigayɛlɛ wekɔ lo esambishelo ka lo sɛkɛ — “Dimi lakonɛ, Apolo akatɛ ashi, koko Nzambi kakodia diangɔ diakɔ” (1Kɔ 3:6)

NYENDE VIDƐO YELE L’ƆTƐ A DUI ƆNƐ: TOTETEMALE NSAMBISHA “AHA LA MPEKƆ”—LO SƐKƐ NDO LO MBETƐ ANTO AMBEKI, NDO OMA LAASƆ, NYOKADIMOLE LO AMBOLA WAYELA ANƐ:

Ngande wakatɛ Sɔlɔmɔna nde la Mariya ashi lo ntɔngɔ y’akambo wa mɛtɛ l’otema waki Ɛzɛkiyɛlɛ ndo waki Abigayɛlɛ?
Oyango akɔna wahomba monga la so lo toho tshɛ t’olimu w’esambishelo, mbidja ndo esambishelo ka lo sɛkɛ?
Ngande wakokaso mɛnya ohomba w’efula wa mbetsha anto akina akambo wa mɛtɛ?