Kahana l’anto lokumu l’ɔlɔlɔ l’ɔnɛ andja w’oyoyo wa dimɛna efula waya suke!

Lo Ngɔndɔ ka dikumi l’ɔtɔi, tayodja welo wa laande dia nkahana l’anto lokumu l’ɔlɔlɔ l’ɔnɛ andja w’oyoyo wa dimɛna efula waya nsuke. (Os 37:10, 11; Ɛny 21:3-5) Sala etshikitanu lo ekongelo kayɛ l’oyango wa wɛ ndeka ndjasha lo kampanyɛ kɛnɛ. Naka wɛ nangaka nkamba oko ombatshi mboka wa tshanda lo ngɔndɔ kakɔ, kete wɛ mbeyaka nsɔna dia nkimɔ wenya 30 kana 50 walɔmbama lo ngɔndɔ kɛsɔ.

Lɔngɔsɔla divɛsa dimɔtshi diakokayɛ nkahana l’anto efula diendana l’andja w’oyoyo naka kokaka. Etena kasɔnayɛ divɛsa dia lo Bible, dja yimba lo kɛnɛ kayoleka ngɛnyangɛnya anto wa l’ɛtshi kayɛ ka nkɛtɛ. Naka onto ɔmɔtshi ambɛnya nsaki lo wendelo wa ntondo, shande kɔpi kɛmɔtshi ka Tshoto y’Etangelo y’anto tshɛ ya No. 2 2021. Oma laasɔ, aha la tshimbatshimba wesa anto wakɛnya nsaki ndo hemba ntatɛ la wekelo wa Bible lo nkamba la biukubuku Ngɛnangɛnaka la lɔsɛnɔ pondjo pondjo! Ande ɔngɛnɔngɛnɔ wayonga la so naka sho ndjasha tshɛ lo nkahana l’anto “lokumu l’ɔlɔlɔ la dui dimɔtshi dia dimɛna efula” lee!​—Isa 52:7.

NYENDE VIDƐO Y’OSAMBO WA LAANDE WELE L’ƆTƐ A DUI ƆNƐ: ANDJA W’OYOYO WAYAYE NDO OMA LAASƆ, NYOKADIMOLE LO AMBOLA WAYELA ANƐ:

• Awui akɔna wa diambo wa lo nshi yayaye wakanyiya yana ya yimato ndjo?

• Awui amɔtshi akɔna walongamɛyɛ dia ndjɛna l’andja w’oyoyo?

• Ngande wele nkana yimba la elongamelo kayɛ kokimanyiyaka dia wɛ ndjalɔngɔsɔla dia ndeka ndjasha lo kampanyɛ ka lo Ngɔndɔ ka dikumi l’ɔtɔi?​—Luk 6:45