WOHO WA MBIDJA LOHETSHO OTSHUMBA

1 | Tatongake la shɔnɔdi

Bible mbutaka ɔnɛ:

“Nzambi keema la shɔnɔdi, koko lo wedja tshɛ, onto [tshɛ] lawoka wɔma ndo lasala akambo w’ɛlɔlɔ mbetawɔmaka le nde.”—ETSHA 10:34, 35.

Kɛnɛ kalembetshiya divɛsa nɛ:

Jehowaa Nzambi hatolombosha lo ndjela wodja aso, lokoho laso la demba, kulɛrɛ ka lokoho laso la demba, kana mbekelo yaso. Koko nde ndekaka mbidja yimba lo tokanyi taso ndo lo nsaki yaso, mbuta ate kɛnɛ keso mɛtɛ l’etei. Bible mbutaka nto ɔnɛ: “Nɛ dia onto k’onto mɛnaka ɛnamelo ka lo washo, koko Jehowa mɛnaka l’etei k’otema.”—1 Samuɛlɛ 16:7.

Kɛnɛ kakokayɛ nsala:

Kaanga mbeso hatokoke mbeya woho wele anto l’etei k’etema awɔ, sho koka mpemba dia mbokoya Nzambi ndo salɛ anto akina akambo aha la shɔnɔdi. Tosale la wolo tshɛ dia mɛna anto l’onto ndo l’onto lo dihole dia mbowawɔsa oko olui. Naka wɛ mbokaka dia wɛ ekɔ la tokanyi ta kɔlɔ otsha le anto akina, ondo otsha le wanɛ wotshikitanyi layɛ lokoho la demba kana wodja, kete lɔmba Nzambi ndo lɔmbande dia nde kokimanyiya dia minya nsaki ya kɔlɔ shɔ. (Osambo 139:23, 24) Naka wɛ nɔmba Jehowa l’otema ɔtɔi dia nde kosha wolo wa minya shɔnɔdi, kete wɛ koka monga l’eshikikelo dia nde ayohokamɛ dɔmbɛlɔ diayɛ ndo ayokokimanyiya.—1 Petero 3:12.

a Jehowa mbele lokombo la mɛtɛ laki Nzambi.—Osambo 83:18.

“Ndooko lushi lakamadjasɛ lo wɔladi la osungu . . . Wonya ɔnɛ laya l’atei wa nkumbo ka mɛtɛ k’onto l’ɔnango ka l’andja w’otondo kokana ngandji.”—TITUS

Dikambo dimɔtshi dia mɛtɛ diakete lo lɔsɛnɔ—TITUS

Akadje lohetsho otshumba

Pami kelɛwɔ Titus aki la nkɛlɛ efula lo ɛlɛmbɛ waha la losembwe wakawadjɛ anto wotshikitanyi nkoho y’alemba, ko nde akayɔtɔka l’olui ɔmɔtshi wa dengalenga wakayaokaka woho akɔ waamɛ. Nde mbutaka ate: “Takatshɔka l’ahole wa l’osomba lɛnɛ akiwɔ konangaka anto w’edima, ɛnyɛlɔ lo waa ɔtɛlɛ ndo lo waa barɛ, paka dia totonga ta.” Titus mbutaka dia nde akalole la lohetsho ndo dui sɔ diakokonya dia nde monga kanga ngala ndo nde kotshaka ate: “Naka lambosolana l’onto oyadi pami kana womoto dimi kakatatɛka mboka akɔfi ntondo.”

Titus akatatɛ nsala etshikitanu etena kakandatatɛ mbeka Bible la Ɛmɛnyi wa Jehowa. Etena kakandadɛ Bible, tɔ kakawosha wolo wa monga la ekanelo kotshikitanyi. Nde akaleke minandema oma lo daka di’andja w’oyoyo wa lo nshi yayaye lɛnɛ ele “nyɔi hatoyala nto, otanda hatoyala nto, delo hatoyala nto, kaanga kandji hatoyala nto.”—Ɛnyɛlɔ 21:3, 4.

L’etatelo, Titus akalɔshaka dia minya lohetsho laki l’otema ande. Nde mbutaka ate: “Aki wolo efula le mi dia dimi ntshikitanya ekanelo kami ka yimba ndo etsha wakimi.” Koko nde akakimanyiyama oma lo kɛnɛ kakandeke lo Etsha 10:34, 35, lɛnɛ ɛnyawɔ dia Nzambi bu la shɔnɔdi.

Etombelo akɔna waki la dui sɔ? Titus nembetshiyaka ɔnɛ: “Lakayoyashikikɛka dia Ɛmɛnyi wa Jehowa mbele l’ɔtɛmwɛlɔ wa mɛtɛ etena kakamɛnyi ngandji kele l’atei awɔ, oyadi lokoho lakɔna la demba laki lawɔ. Kaanga la ntondo ka dimi nongola batisimu, ndo nkoma Ɔmɛnyi, osungu ɔmɔtshi waki l’etshumanelo kaso akambelɛ lakande dia tɔlɛ la nde yangɔ. Dui sɔ diaki oko dɔ le mi. Ntondotondo ndooko lushi lakamadjasɛ lo wɔladi la osungu ko ndɛ la nde kaamɛ lo luudu lande. Wonya ɔnɛ laya l’atei wa nkumbo ka mɛtɛ k’onto l’ɔnango ka l’andja w’otondo kokana ngandji.”