Ekɔ dimɛna le so dia monga la diɔtɔnganelo dia ma ma l’anangɛso l’akadiyɛso!

1-2. Naa dui dimɔtshi diele ohomba le Jehowa ndo kakɔna kalangande dia sho nsala?

WOHO wasalɛso anto akina akambo ekɔ ohomba lo washo wa Jehowa. Yeso aketsha dia sho pombaka nanga wanyaso anto oko wayalangaso. (Mat. 22:​37-39) Kɛsɔ mendanaka ndo la monga ɔlɔlɔ le anto wahakambɛ Jehowa. Etena kawaɛnyaso ɔlɔlɔ, sho mbokoyaka ɛnyɛlɔ ka Jehowa Nzambi ɔnɛ ‘lahotoya wonya le anto wa kɔlɔ ndo le anto w’ɛlɔlɔ ndo lalɔsha mvula le anto w’ɛlɔlɔ ndo le anto wa kɔlɔ.’—Mat. 5:45.

² Kaanga mbele Jehowa mbokaka weho w’anto tshɛ ngandji, nde ndekaka ndjasha le wanɛ wokitanyiya. (Jni. 14:21) Nde nangaka dia sho mbookoya. Nde tokeketshaka dia monga la “ngandji k’efula” otsha le anangɛso l’akadiyɛso. (1 Pe. 4:8; Rɔmɔ 12:10) Woho wa ngandji kɛsɔ kekɔ woho akɔ waamɛ la kɛnɛ kokaso ewotɔ aso kana angɛnyi aso wa ma ma.

3. Kakɔna kahombaso mbohɔka lo dikambo dia ngandji?

³ Paka oko wakokɛso osongo wa lo jardɛ yaso dia vɔ mbola, mbahombaso mbidja welo dia ngandji kaso otsha le anto akina mpama. Ɔpɔstɔlɔ Pɔɔlɔ akasha Akristo dako nɛ ate: “Ngandji kanyu k’onto l’ɔnango katetemale.” (Hɛb. 13:1) Jehowa nangaka dia sho ntetemala mboka anto akina ngandji. Lo sawo nɛ, tayɔsɛdingola lande na kahombaso monga la diɔtɔnganelo dia ma ma l’asekaso atɛmɔdi ndo woho wakokaso ntetemala nsala dui sɔ.

LANDE NA KAHOMBASO MONGA LA DIƆTƆNGANELO DIA MA MA L’ANANGƐSO L’AKADIYƐSO?

4. Oko wofundamidiɔ lo Osambo 133:​1, ngande wakokaso ntetemala mɛnya lowando lo kaamɛ kele lam’asaso l’anangɛso l’akadiyɛso? (Enda ndo esato.)

⁴ Adia Osambo 133:1. Sho sangaka lolemi l’omembi w’esambo lakafunde ɔnɛ lɔngɛnyi la mɛtɛ kaamɛ la wanɛ woka Jehowa ngandji lekɔ “dimɛna” ndo “ɔlɔ.” Koko, paka oko wakoka onto ndjokoma ko hayodja osongo wa dimɛna watondɛnaka lushi tshɛ yimba, sho lawɔ koka ndjokoma ko hatoyodja yimba lo kaamɛ kele lam’asa Akristo. Sho mɛnanaka l’anangɛso l’akadiyɛso, ondo mbala efula lo lomingu. Ngande wakokaso ndjashikikɛ dia wekɔ la nɛmɔ le so? Ngandji kokaso anangɛso l’akadiyɛso kayohama naka sho mbɔsa etena ka nkana yimba lo nɛmɔ diele la ɔmɔmɔ la l’atei aso l’etshumanelo ndo le so.

5. Shɛngiya yakɔna yele la ngandji kaso k’onto l’ɔnango le anto akina?

⁵ Anto amɔtshi wɔtɔ lo nsanganya yaso mbala ka ntondo mambaka efula lo mɛna kaamɛ kele lam’asaso. L’ɔtɛ wa dikambo sɔ to, vɔ mbeyaka ndjashikikɛ dia wamboshola akambo wa mɛtɛ. Yeso akate ate: “Oma lo dikambo nɛ, anto tshɛ wayeya dia nyu nyekɔ ambeki ami, naka nyayokana ngandji lam’asanyu.” (Jni. 13:35) Tɔsɛdingole kɛnɛ kakakomɛ Chaithra, ombeki ɔmɔtshi wa l’inivɛrsite wakekaka Bible l’Ɛmɛnyi wa Jehowa. Nde aketawɔ leeta la tɔtɔ lo losanganya lɔmɔtshi la rɛjɔ. L’ɔkɔngɔ wa nde mbɔtɔ lushi la ntondo, nde akatɛ ombetsha ande wa Bible ate: “Ambutshi ami watakumbatɛka. Koko lo losanganya lanyu, anto wakakumbate mbala 52 lo lushi ɔtɔi! Lakɛnyi ngandji ka Jehowa oma lo tshimbo ya nkumbo kande ka lo nyuma. Dimi nangaka monga ɔmɔtshi la l’atei w’anto wele lo nkumbo kɛsɔ.” Chaithra akatetemala mpama ndo akayolongolaka batisimu lo 2024. Lo mɛtɛ, etena kɛna anto amɔtshi w’eyoyo etsha aso w’amɛna, mbidja ndo ngandji kele lam’asaso, vɔ ndekaka tshutshuyama dia kambɛ Jehowa.—Mat. 5:16.

6. Ngande wele monga la diɔtɔnganelo dia ma ma l’anangɛso l’akadiyɛso ekɔ tshondo y’ekokelo le so?

⁶ Monga la diɔtɔnganelo dia ma ma l’anangɛso l’akadiyɛso koka monga tshondo y’ekokelo. Pɔɔlɔ akalake asekande Akristo ate: “Koko nyotetemale keketshana lam’asanyu lushi tshɛ . . . diaha ɔmɔtshi l’atei anyu monga ɔtɛ wolo oma lo nkudu ka lokeso kele la pɛkato.” (Hɛb. 3:13) Naka tambɔkɔmɔ lo woho wele akaka aso wambɔsɛlɔ oma lo mboka k’akambo wa mɛtɛ, kete Jehowa koka nkamba l’asekaso ambetawudi dia tosha ekimanyielo kele la so ohomba. (Os. 73:​2, 17, 23) Aha la taamu, ekeketshelo ka ngasɔ kekɔ dimɛna le so.

7. Diɔtɔnganelo diakɔna diele lam’asa ngandji la kaamɛ? (Kɔlɔsayi 3:​13, 14)

⁷ Tekɔ anto wakamba wolo dia mɛnyanya ngandji lam’asaso, diakɔ diele sho kondjaka ɛtshɔkɔ efula. (1 Jni. 4:11) Ɛnyɛlɔ, ngandji totshutshuyaka dia ‘ntetemala mbikikanɛ kɔlɔ’ ndo tɔ tokimanyiyaka dia monga kaamɛ l’anangɛso l’akadiyɛso. (Adia Kɔlɔsayi 3:​13, 14; Ɛf. 4:​2-6) Ɔnkɔnɛ, lo nsanganya yaso, sho mongaka l’ɔngɛnɔngɛnɔ w’efula oleki anto akina tshɛ wa lo nkɛtɛ.

NYƆLƐMIYANAKE LAM’ASANYU

8. Ngande watokimanyiya Jehowa dia monga kaamɛ l’anangɛso l’akadiyɛso?

⁸ Tekɔ kaamɛ l’anangɛso l’akadiyɛso wa l’andja w’otondo diɛsɛ la ekimanyielo ka Jehowa. Jehowa salaka dia kaamɛ monga kaanga mbeso anto wele keema kokele. (1 Kɔr. 12:25) Bible mbutaka dia tekɔ lo “mbetshama oma le Nzambi dia mbokana ngandji.” (1 Tɛs. 4:9) Lo ɛtɛkɛta ekina, Jehowa totɛka lo Bible kɛnɛ kahombaso nsala dia monga kaamɛ l’anangɛso l’akadiyɛso. Sho koka “mbetshama oma le Nzambi” lo sɛdingolaka la yambalo tshɛ wetshelo ande ndo lo kambaka la wɔ. (Hɛb. 4:12; Jak. 1:25) Ndo kɛsɔ mɛtɛ mbadja Ɛmɛnyi wa Jehowa welo dia nsala.

9. Wetshelo akɔna wambotokondja oma lo Rɔmɔ 12:​9-13 lo kɛnɛ kendana la nɛmiyana lam’asaso?

⁹ Ngande watetsha Ɔtɛkɛta wa Nzambi dia ndeka monga la diɔtɔnganelo dia ma ma l’anangɛso l’akadiyɛso? Tɔsɛdingole kɛnɛ kakalange Pɔɔlɔ mbuta lo dikambo nɛ oko wofundamidiɔ lo Rɔmɔ 12:​9-13. (Adia.) Nde akate ate: “Lo kɛnɛ kendana la nɛmiyana, nyosha ɛnyɛlɔ.” Kakɔna kalembetshiya ɛtɛkɛta ɛsɔ? Sho koka mbɔsa yɛdikɔ ya mɛnya anto akina “ngandji k’efula” lo mbadimanyiyaka, lo mbalongolaka ndo lo mbaɛnyaka lokaho laso. (Ɛf. 4:32) Ndooko ohomba wa wɛ nkonga dia paka anangɛyɛ l’akadiyɛyɛ ndjasukanya la yɛ. Wɛ koka ‘mbisha ɛnyɛlɔ’ lo nsala dui sɔ. Ko wɛ ayɛna ekotshamelo w’ɛtɛkɛta wa Yeso wakandalake ɔnɛ: “Ɔngɛnɔngɛnɔ waya lo mbisha ndeka wa nongola.”—Ets. 20:35.

10. Ngande wakokaso mɛnya dia sho ‘nɛmiyanaka’? (Enda ndo osato.)

¹⁰ Ekɔ dui dia diambo nɛ dia l’ɔkɔngɔ wa nde totɛ dia mbishaka ɛnyɛlɔ lo nɛmiyanaka lam’asaso, Pɔɔlɔ akatokeketsha ate: “Nyonge anto wakamba olimu, aha esuwa.” Onto lakamba olimu ekɔ ɔnɛ lakamba l’ohetoheto ndo la wolo tshɛ. Etena kawoshawɔ olimu ɔmɔtshi, nde kambaka dimɛna ndo salaka la wolo tshɛ dia mbokotsha dimɛna. Tokedi 3:​27, 28 tokeketshaka ɔnɛ: “Todimake anto ɛngɔ k’ɔlɔlɔ kahombayɛ mbasha naka wɛ ekɔ la akoka wa nkimanyiya.” Diakɔ diele, etena kɛnaso dia onto ɔmɔtshi ekɔ lo dihombo, sho salaka la wolo dia mbokimanyiya. Hatotshimbatshimba dia nsala kɛnɛ keso l’akoka wa nsala ndo hatote ɔnɛ onto okina ayoyowokimanyiya.—1 Jni. 3:​17, 18.

11. Kakɔna kakoka tokimanyiya dia ndeka monga la diɔtɔnganelo dia ma ma lam’asaso?

¹¹ Yoho kina yakokaso mɛnya dia sho nɛmiyaka anto akina ele lo monga suke dia mbadimanyiya etena katosalɛwɔ kɔlɔ. Ɛfɛsɔ 4:26 mbutaka ɔnɛ: “Tanyotshikalake la nkɛlɛ polo wonya mbidja.” Lande na? Divɛsa 27 totɛka dia naka sho nsala ngasɔ kete ‘tayosha Diabolo diaaso.’ Lo Bible, Jehowa totɛka mbala la mbala dia dimanyiyana. Kɔlɔsayi 3:13 tokeketshaka dia ‘ntetemala . . . dimanyiyana l’otema ɔtɔi.’ Dimanyiya kɔlɔ y’anangɛso l’akadiyɛso ekɔ dui dimɔtshi l’atei w’awui woleki ohomba dia sho ndeka monga la diɔtɔnganelo dia ma ma la wɔ. Etena kadimanyiyaso anto akina, sho kimanyiyaka dia “nkokɛ kaamɛ ka lo nyuma lo dimama dia wɔladi.” (Ɛf. 4:3) Lo tshena pe, dimanyiya koka tokimanyiya dia monga kaamɛ ndo nsɛna lo wɔladi.

12. Ngande watokimanyiya Jehowa dia dimanyiyana?

¹² Lonyangu ko, mbeyaka monga wolo dia dimanyiya anto watosalɛ kɔlɔ. Koko sho koka ntondoya dui sɔ l’ekimanyielo ka nyuma ka Nzambi. L’ɔkɔngɔ wa todjangɛ dia ‘mbokana ngandji k’efula’ ndo dia ‘monga anto wakamba olimu,’ Bible totɛka ɔnɛ: “Nyɔhɛtɛhɛtɛ la nyuma.” Onto ‘lahɛtahɛta’ ekɔ la “ohetoheto w’efula ndo la osalosalo, waonga wɛnama oma lo wolo” wa nyuma k’ekila. (Enda nɔtɛ ka wekelo ka lo Rɔmɔ 12:11 lo Falase.) Ɔnkɔnɛ, nyuma ka Nzambi koka tokimanyiya dia monga la ngandji k’efula lam’asaso ndo dimanyiyana l’otema ɔtɔi. Diɔ diakɔ dialɔmbaso Jehowa oma k’ɛse otema dia nde tokimanyiya.—Luka 11:13.

“DIAHA DIATƆNELO MONGA LAM’ASANYU”

13. Kakɔna kakoka mbidja diatɔnelo lam’asaso?

¹³ Etshumanelo kengama la “weho w’anto tshɛ” woye oma lo ahole wotshikitanyi. (1 Tim. 2:​3, 4) L’ɔtɛ wa dikambo sɔ mbele, onto tshɛ la l’atei aso mbeyaka nsala ɛsɔnwɛlɔ wotshikitanyi l’anto akina lo woho wa ndɔta, woho wa minya divo, woho w’esakelo kayotetawɔ ndo woho wa tɔkɛnyɔ ta nkɛnya. Naka hatongi la yambalo, kete akambo asɔ mbeyaka ndjodja diatɔnelo. (Rɔmɔ 14:4; 1 Kɔr. 1:10) Lam’ele Nzambi akatetsha dia mbokana ngandji lam’asaso, sho pombaka monga la yewo diaha ndjɛnya di’ɛsɔnwɛlɔ aso ndeka w’anto akina.—Flpɛ. 2:3.

14. Kakɔna kahombaso mbidja welo dia nsala ndo lande na?

¹⁴ Sho koka mbewɔ dia mbela diatɔnelo l’etshumanelo lo mbidjaka welo dia mandɔnaka ndo keketshaka anto akina tena tshɛ. (1 Tɛs. 5:11) Atete edja, anto amɔtshi wakɔlɛ lo nyuma kana wakanyɛma oma l’etshumanelo, wakakaloyama. Takaalongola l’osalosalo tshɛ! (2 Kɔr. 2:8) Tɔsɛdingole kɛnɛ kakakomɛ kadiyɛso kɛmɔtshi kakaye lo losanganya l’ɔkɔngɔ wa nde mbɔla lo nyuma l’edja k’ɛnɔnyi dikumi. Nde akate ate: “Onto tshɛ akangɛnɛngɛnɛka ndo akambishaka mɔyɔ l’anya.” (Ets. 3:19) Shɛngiya yakɔna yakonge la tshelo y’ɔlɔlɔ shɔ le nde? Nde mbutaka ate: “Jehowa akatetemala kimanyiyami dia dimi monga l’ɔngɛnɔngɛnɔ nto.” Naka sho nsala la wolo dia keketshana, kete Kristo koka nkamba la so dia nkimanyiya “wanɛ tshɛ wele la paa ndo wele la wetsho.”—Mat. 11:​28, 29.

15. Naa yoho kina yakokaso nama kaamɛ kaso? (Enda ndo osato.)

¹⁵ Yoho kina yakokaso nama kaamɛ kaso ele lo mbidjaka yimba lo kɛnɛ kataso. Jɔbɔ 12:11 mbutaka ɔnɛ: “Onde toyi ndɛtaka tɔtɛkɛta woho walɛta lolemi mbo ya ndɛ?” Paka oko wotolongaka okatshi supu dia kana tɔ kambotomba dimɛna la ntondo ka mbisha anto dia ndɛ, mbele ndo sho lawɔ pombaka monga la yambalo la ntondo ka ntodja ɛtɛkɛta ɛmɔtshi. (Os. 141:3) Oyango aso ele dia ndjashikikɛ dia kɛnɛ kayotota kayokeketsha ndo kayokimanyiya anto akina dia vɔ ndjaoka dimɛna ndo wayonga “la wahɔ le wanɛ wawaoka.”—Ɛf. 4:29.

16. Waa na shikaa wahomba kambaka mbala la mbala l’ɛtɛkɛta wakeketsha?

¹⁶ Papa ka nkumbo ndo ambutshi pombaka kambaka l’ɛtɛkɛta wakeketsha. (Kɔl. 3:​19, 21; Tito 2:4) Dikumanyi dia l’etshumanelo nto pombaka monga kiɔkɔ y’ekeketshelo ndo y’esambelo oko wewɔ anami w’ɛkɔkɔ wa Jehowa. (Isa. 32:​1, 2; Ngal. 6:1) Yokedi mɔtshi ya lo Bible toholaka ɔnɛ: “Dui diotami lo etena kahombama diekɔ dimɛna efula!”—Tok. 15:23.

NGANDJI “LO ETSHA NDO LO MƐTƐ”

17. Ngande wakokaso ndjashikikɛ dia ngandji kokaso anangɛso l’akadiyɛso kekɔ ka mɛtɛ?

¹⁷ Ɔpɔstɔlɔ Joani akatokeketsha diaha sho ‘mbokanaka ngandji tsho lo ɛtɛkɛta ndo laadiko di’ɛlɔmɔ, koko lo etsha ndo lo mɛtɛ.’ (1 Jni. 3:18) Sho nangaka dia ngandji kokaso anangɛso l’akadiyɛso ndja oma k’ɛse otema. Ngande wakokaso nsala dui sɔ? Etena ketshaso wenya efula kaamɛ l’anangɛso l’akadiyɛso, mbayototalekaka monga la diɔtɔnganelo dia ma ma la wɔ ndo ngandji kaso kayofula. Ɔnkɔnɛ, toyange waaso wa mbetshaka wenya kaamɛ l’anangɛso l’akadiyɛso lo nsanganya ndo l’olimu w’esambishelo. Toyatshungolɛke etena ka membolaka anto akina. Etena kasalaso ngasɔ, sho mɛnyaka dia tekɔ lo ‘mbetshama oma le Nzambi dia mbokana ngandji lam’asaso.’ (1 Tɛs. 4:9) Ndo tayotetemala mɛna dia ekɔ “dimɛna ndo [ekɔ] ɔlɔ dia onto la ɔnango mbidjasɛ kaamɛ!”—Os. 133:1.