Anangɛso ahende wambokotshama l’Olui-walɔmbɔla

LO NGƆNDƆ KA DIKUMI 5, 2024, diewoyelo dimɔtshi dia laande diakashama lo losanganya la l’ɔnɔnyi ɔnɛ: Ɔnangɛso Jody Jedele nde la Jacob Rumph wakasɔnama oko ase Olui-walɔmbɔla w’Ɛmɛnyi wa Jehowa. Vɔ akɔ ahende wakakambɛ Jehowa la kɔlamelo tshɛ l’edja k’ɛnɔnyi efula.

Ɔnangɛso Jedele akotɔ la Missouri, lo États-Unis ndo akodiama l’akambo wa mɛtɛ. Nkumbo kande kakadjasɛka l’ɛtshi ka nkɛtɛ kaki komonga l’Ɛmɛnyi wa Jehowa efula. Kaanga mbakidiɔ ngasɔ, nde akahomana l’anangɛso efula w’oma lo ahole wotshikitanyi wakayaka ndjembola ɛtshi ka nkɛtɛ kɛsɔ dia mbisha lonya l’olimu w’esambishelo. Ngandji ndo kaamɛ kawɔ kaki la shɛngiya y’efula le nde. Nde akabatizama etena kakinde l’ɛnɔnyi dikumi l’ɛmɔtshi lo Ngɔndɔ ka dikumi 15, 1983. Nde akangɛnangɛnaka olimu w’esambishelo efula ndo l’ɔkɔngɔ wa nde nshidiya kalasa ya sekɔndɛrɛ, nde akatatɛ olimu w’ombatshi mboka wa pondjo lo Ngɔndɔ ka divwa 1989.

Etena kaki ɔnangɛso Jedele dikɛnda, ambutshi ande wakawɔsaka nde la kosɛnde ka womoto dia tembola Bɛtɛlɛ. Wembwelo ɛsɔ wakaatshutshuya dia ndjadjɛ oyango wa nkamba lo Bɛtɛlɛ ndo l’ɔkɔngɔ, vɔ akɔ ahende wakayokotshaka oyango akɔ. Ɔnangɛso Jedele akɔtɔ lo Bɛtɛlɛ ka la Wallkill lo Ngɔndɔ ka divwa 1990. Nde akakambe ntondo lo Departɛma diendana l’osolelo wa mvudu ndo l’ɔkɔngɔ, akayokambaka lo Departɛma diendana l’awui w’esakelo.

L’etena kɛsɔ, tshumanelo dia l’ɔtɛkɛta w’espagnol diakayahamaka ndo diaki l’ohomba w’anangɛso. Diakɔ diele ɔnangɛso Jedele akonɔ l’etshumanelo kɛmɔtshi ndo akatatɛ mbeka ɔtɛkɛta w’espagnol. Yema tshitshɛ oma laasɔ, nde akahomana la Damaris, kadiyɛso kɛmɔtshi kaki ombatshi mboka l’otshimbedi akɔ waamɛ. L’ekomelo vɔ wakayotshukanaka ko kadiyɛso akoyele lo Bɛtɛlɛ.

Lo 2005, vɔ wakatombe oma lo Bɛtɛlɛ dia tokokɛ ambutshi awɔ wa kɔlamelo. L’etena kɛsɔ, vɔ wakakambaka oko ambatshi mboka wa pondjo. Ɔnangɛso Jedele aketshaka lo Kalasa k’ambatshi mboka, akakambe lo Kɔmite ka diɔtɔnganelo la mpitadi ndo lo Kɔmite rɛjiɔnalɛ ka wokelo.

Lo 2013, ɔnangɛso la kadiyɛso Jedele wakelamɛ nto dia tokamba lo Bɛtɛlɛ lo prɔjɛ ka wokelo ka la Warwick. Oma laasɔ, wakakambe nto la Patterson ndo la Wallkill. Ɔnangɛso Jedele akatokambaka lo Departɛma dia wokelo ndo lo Departɛma diendana l’awui wa pitadi. Lo Ngɔndɔ ka sato 2023, nde akasɔnama oko okimanyedi lo Kɔmite k’olimu. Etena kakanyiyande lo dikambo di’ɛkɛndɛ tshɛ wakandalongola, nde mbutaka ate: “Etena kalongolayɛ ɛkɛndɛ w’eyoyo, wɛ koka mpandjɔ wɔɔngɔ. Koko l’etena kɛsɔ, wɛ pombaka mbohɔ dia ndjaɛkɛ le Jehowa nɛ dia nde mbatotsha akoka wa nsala kɛnɛ kalongamɛnde oma le so.”

Ɔnangɛso Rumph akotɔ la Californie, l’États-Unis. Lam’akinde eke dikɛnda, nyango akɔlɛ lo nyuma, koko nyango akadjaka welo dia mbeetsha akambo wa mɛtɛ wa lo Bible. Ndo nto, ɔnɔnyi tshɛ nde akatshɔka tembola tshɛnde ka womoto laki Ɔmɛnyi wa Jehowa wa kɔlamelo. Tshɛnde akalomialomia nsaki kande k’akambo wa mɛtɛ ndo lam’aki Rumph l’ɛnɔnyi 13, nde akalɔmbɛ dia mbeka Bible. Nde akabatizama lo Ngɔndɔ ka divwa 27, 1992, etena kakinde l’ɛnɔnyi dikumi l’ɛmɔtshi. Dui di’ɔngɛnɔngɛnɔ ele, nyango akayokalolɛka mbekelo yande ya lo nyuma ndo ase nkumbo kande akina tshɛ wakahame lo nyuma ndo wakayobatizamaka.

Etena kakinde eke dikɛnda, ɔnangɛso Rumph akɛnyi woho waki ambatshi mboka l’ɔngɛnɔngɛnɔ. L’ɔkɔngɔ wa nde nshidiya kalasa ya sekɔndɛrɛ, nde akatatɛ olimu w’ombatshi mboka lo Ngɔndɔ ka divwa 1995. Lo 2000, nde akonɔ l’Équateur lɛnɛ akiwɔ l’ohomba efula w’apandjudi. Lɛkɔ mbakandatohomaka la Inga, kadiyɛso kɛmɔtshi k’ombatshi mboka k’oma la Canada ndo l’ɔkɔngɔ, vɔ wakayotshukanaka. L’ɔkɔngɔ wa vɔ ntshukana, vɔ wakatatɛ nkamba l’osomba ɔmɔtshi wa l’Équateur waki l’apandjudi yema tshitshɛ. Ɛlɔ kɛnɛ, djui y’apandjudi shɔ yaya etshumanelo ka woke.

L’edjedja ka wonya, ɔnangɛso la kadiyɛso Rumph wakasɔnama oko ambatshi mboka wa laande ndo l’ɔkɔngɔ wakayokambaka l’olimu w’otshimbedi. Lo 2011, vɔ wakelamɛ lo kalasa ka 132 ka Ngiliyadɛ. L’ɔkɔngɔ wa vɔ nongola dipɔlɔmɛ, vɔ wakakambe l’ahole wotshikitanyi wa l’andja w’otondo ndo wakakambe elimu wotshikitanyi, wele oko nkamba lo Bɛtɛlɛ, nkamba oko wa misiɔnɛrɛ ndo nkamba olimu w’otshimbedi. Ɔnangɛso Rumph akakondja nto diɛsɛ dia monga ombetsha lo Kalasa k’esambisha wa Diolelo.

L’ɔtɛ wa hemɔ ka COVID-19, ɔnangɛso la kadiyɛso Rumph wakakalola l’États-Unis. Vɔ wakelamɛ dia tokamba lo Bɛtɛlɛ ka la Wallkill, lɛnɛ akatolowanyemaka ɔnangɛso Rumph lo Departɛma di’olimu. Oma laasɔ, vɔ wakatomama lo Bɛtɛlɛ ka l’Équateur lɛnɛ akatokambaka ɔnangɛso Rumph oko ose Kɔmitɛ ka Filialɛ. Lo 2023, vɔ wakatomama la Warwick. Lo Ngɔndɔ ka ntondo 2024, ɔnangɛso Rumph akasɔnama oko okimanyedi lo Kɔmite k’olimu. Etena kakanande yimba l’ahole wakandakambe, nde mbutaka ate: “Nɛmɔ diele l’ɔkɛndɛ halemanɛ la lɛnɛ akambaso, koko nemanɛka l’anto wakamba la yɛ.”

Tekɔ la lowando l’efula l’olimu wa wolo wa nkamba anangɛso asɔ ndo tekɔ lo ‘ntetemala mbɔsa anto wele oko vɔ la nɛmɔ di’efula.’—Flpɛ. 2:29.