Ambeyi wa siansɛ wambɔsɛkɔla dikɔnga dia ntango kɛnya lushi l’ekomelo k’andja​—Kakɔna kata Bible lo dikambo sɔ?

Ngɔndɔ ka ntondo 24, 2023, ambeyi wa siansɛ wakate dia ntango kɛnya lushi l’ekomelo k’andjaa kaya suke la midi k’otsho, kɛnɛ kɛnya lo yoho ya didjidji ekomelo k’andja.

• “‘Ntango kɛnya lushi l’ekomelo k’andja’ ekɔ didjidji dia waale wamboyayangɛ anto. Lushi la hende, ambeyi wa siansɛ wakasɛkɔla ntango kɛsɔ, suke la midi k’otsho, dui diele diatasalemaka ndooko lushi, l’ɔtɛ w’akambo wele oko ta dia l’Ukraine, wɔma wa waa bɔmbɛ ndo waale w’oma l’otshikitanu wa djungudungu.”​—AFP International Text Wire.

• “Ambeyi wa siansɛ wakashola Lushi la hende dia ‘Ntango kɛnya lushi l’ekomelo k’andja’ kakasɛkɔma yema nto sekɔndɛ 90 la ntondo ka midi k’otsho, mbuta ate andja wamboleka sukana otsha l’elanyelo ka pondjo.”​—ABC News.

• “Olui ɔmɔtshi w’ambeyi wa siansɛ wakahɛmɔla anto ɔnɛ wekɔ lo waale wa ndjashila oshiki woho wele atayalaka ntondo.”​—The Guardian.

Onde ekomelo ka lɔsɛnɔ l’anto la k’okama wa nkɛtɛ aya suke? Onde sho pombaka mboka kɛnɛ katokongɛ lo nshi yayaye wɔma? Kakɔna kata Bible lo dikambo sɔ?

Kɛnɛ katokongɛ lo nshi yayaye

Lo ndjela Bible, “nkɛtɛ tshikalaka pondjo” ndo anto “wayodjasɛka lɔkɔ pondjo pondjo.” (Ondaki 1:4; Osambo 37:29) Ɔnkɔnɛ, anto hawotolanya nkɛtɛ kana kietɛ dihole diahakoke anto mbidjasɛ.

Koko, Bible tɛkɛtaka di’ekomelo. Ɛnyɛlɔ, tɔ mbutaka ɔnɛ: “Andja ɔnɛ. . .wekɔ lo teete.”​—1 Joani 2:17.

• Dia mbeya kɛnɛ kalanga Bible mbuta etena katɛkɛtatɔ di’ekomelo k’andja, adia sawo diele l’ɔtɛ a dui ɔnɛ: “Onde ekomelo k’andja kaya suke? Ko elɛwɔ apɔkalipsɛ?”

• Dia mbeya kɛnɛ kata Bible lo dikambo di’etena kayosalema akambo amɔtshi l’andja ɔnɛ lo nshi yayaye, adia sawo diele l’ɔtɛ a dui ɔnɛ: “Quand la fin du monde viendra-​t-​elle ?”

Ɛna akambo la sso di’ɔlɔlɔ

Ngande wakoka Bible kokimanyiya dia mɛna akambo la sso di’ɔlɔlɔ oyadi ekakatanu watomba l’andja ɔnɛ nshi nyɛ?

• Bible toshaka alako w’eshika. (2 Timɔte 3:16, 17) Ɛnyɛlɔ, adia sawo diele l’ɔtɛ a dui ɔnɛ: “Comment ne pas vous laisser submerger par l’inquiétude” dia mɛna woho wakoka Bible kokimanyiya dia monga la yimba y’ɔlɔlɔ kaanga l’atei w’ekakatanu wa lo lɔsɛnɔ.

• Bible mbishaka elongamelo k’oshika kendana la nshi yayaye. (Rɔmɔ 15:4) Tɔ nembetshiyaka hwe kɛnɛ kalongamɛso kakianɛ ndo lo nshi yayaye kayotokimanyiya dia ntshikala nge la ntondo k’ekakatanu wa l’andja ɔnɛ.

Dia wɛ nkondja wahɔ efula oma lo Bible, tambokɔlɔmba dia wɛ mbetawɔ mbeka laso Bible ofele.