Kakɔna kata Bible lo dikambo dia ohombelo w’ashi wa pudipudi?
Sho tshɛ tekɔ l’ohomba w’ashi dia monga la lɔsɛnɔ. Koko, “kanga mbataleke anto wa l’andja w’otondo monga l’ohomba w’ashi, teekɔ lo ntetemala mpomba ashi wa pudipudi,” mbakate Antonio Gueterres, Sécrétaire general de l’ONU. Miliyɔ y’anto wa l’andja w’otondo wekɔ lo ntetemala mpomba ashi wa pudipudi.
Strdel/AFP via Getty Images
Onde tayonga la ashi efula lushi lɔmɔtshi lo tshɛ? Kana onde tayotetemaka mpomba ashi wa pudipudi? Kakɔna kata Bible?
Kɛnɛ kata Bible lo dikambo di’ashi
Bible mbutaka di’ashi wayonga efula la nkɛtɛ. Lo mɛtɛ, ashi wa pudipudi wayonga efula.
“Ashi wayofukɔfukɔ l’oswe wa shɛnga, ndo tɔkɔkɔ t’ashi tayɔkɛlaka lo laandja l’oswe. Nkɛtɛ ya dja yayokadimɔ oduwa wele la asɔpɔ, ndo nkɛtɛ yele la mposa k’ashi, tɛkɔ di’ashi.”—Isaya 35:6, 7.
Lande na kahombaso mbetawɔ kɛnɛ katolaka Bible? Tɔsɛdingole kɛnɛ kata Bible lo woho wakasalema nkɛtɛ.
Kɛnɛ kata Bible lo dikambo dia nkɛtɛ ndo otshimbelo w’ashi
“[Nzambi] kondjitonga [nkɛtɛ] otongatonga, koko akayikenge dia anto mbidjasɛka lɔkɔ.”—Isaya 45:18.
Nɛ dia Nzambi akatonge nkɛtɛ dia nsukɛ lɔsɛnɔ, nde akasale yoho mɔtshi ya ashi mongaka efula la nkɛtɛ.
“[Nzambi] kotolaka apɔpɔ w’ashi; Vɔ tshumanaka dia monga mvula oma lo loonge lande; Oma laasɔ, wange mbatsholaka; Vɔ tshulwɛka anto.”—Jɔb 36:27, 28.
Lo tshena pe, avɛsa anɛ mɛnyaka kɛnɛ kakasale Nzambi lo dikambo dia otshimbelo w’ashi. Woho wa dɛ ashi otsha l’olongo, watowokamaka ndo ndɔ oko mvula, kimanyiyaka anto la waa nyama dia monga la ashi wa pudipudi.—Ondaki 1:7; Amɔsɛ 5:8.
“Dimi layonyɔlɔshɛ avula lo tena diahombama, ko nkɛtɛ yayɔngɔnya diangɔ ndo esongo wa lo wodja anyu wayɔtɔ elowa awɔ.”—Akambo w’ase Lɛwi 26:4.
Nzambi akalake dia ntshɔkɔla ase isariyɛlɛ w’edjedja, akambi wa dikambɔ, la ntɔngɔ y’efula lo mbashaka ashi mbala la mbala. Nde mbeyaka dia tekɔ l’ohomba wa mvula dia monga la mbo ya ndɛ l’etena kahombama.
Nzambi ayanga salɛ anto wa lo nkɛtɛ k’otondo kɛnɛ kakandasalɛ ase Isariyɛlɛ w’edjedja. (Isaya 30:23) L’etena kakɔ kaamɛ, lo bɛtshi dimɔtshi dia lo nkɛtɛ, ashi wa pudipudi wekɔ lo tashile ndo ohombelo wa mvula ekɔ kiɔkɔ mɔtshi. Kakɔna kata Bible nto lo kɛnɛ kendana l’ekakatanu w’ohombelo w’ashi nshi nyɛ?
Woho wayokomɛ ohombelo w’ashi
Bible mɛnyaka dia oma lo tshimbo ya Diolelo diande, Nzambi ayokandola ekakatanu wendana la nkɛtɛ mbidja ndo ohombelo w’ashi. (Mateo 6:9, 10) Diolelo dia Nzambi ekɔ lowandji la l’olongo layɔlɔmbɔla nkɛtɛ. (Danyɛlɛ 2:44; Ɛnyɛlɔ 11:15) Laadiko dia laasɔ, Diolelo diaki Nzambi diayosala kɛnɛ kahakoke mandji y’ana w’anto nsala mbuta minya ekakatanu tshɛ wendana la ashi la nkɛtɛ.
Okakatanu: Woho watshikitana djungudungu mongaka la shɛngiya l’otshimbelo w’ashi. Etombele wele la dikambo sɔ ele, ɔwɔ la dola mongaka ndo ofulelo w’ashi w’oma lo ndjale.
Okandwelo: Diolelo dia Nzambi diayonya kɛnɛ tshɛ kalanya nkɛtɛ la oyango wa tɔ nkalola woho wakitɔ ntondo. Nzambi akalake ate: “Eenda! Dimi leetɛ diangɔ tshɛ eyoyo.” (Ɛnyɛlɔ 21:5) Ahole wele shɛnga wayonga la ashi efula, kɛsɔ kayokonya lɔsɛnɔ dimɛna kaanga l’ahole wele anto hawokoke mbidjasɛ. (Isaya 41:17-20) L’ɛse k’ɛlɔmbwɛlɔ ka Yeso, Diolelo dia Nzambi diayahemɛ wolo wele la diangɔ diakatongama la nkɛtɛ.
Etena kaki Yeso lanɛ la nkɛtɛ, nde akɔdia mpɛpɛ ndo akɛnya ɛnyɛlɔ ka tshitshɛ ka wolo wakawosha Nzambi. (Makɔ 4:39, 41) Mpokoso y’oma lo diangɔ diakatongama yayokomɛ l’ɛse k’ɛlɔmbwɛlɔ ka Diolelo diaki Nzambi. Anto tshɛ wayɔsɛna lo woladi la lotui tshitshi ndo hawotoka nto mpokoso y’oma lo diangɔ diakatongama wɔma.
Okakatanu: Anto wahakanyiya dia etombelo w’oma lo etsha awɔ, izinɛ watoma mindo yawɔ oya lo ashi, eduwa ndo ahole wa l’ɛse ka nkɛtɛ wombawɔ ashi, konyaka dia anto mpomba ashi wa pudipudi.
Okandwelo: Nzambi ayɛdia nkɛtɛ, ayɔlɔngɔsɔla ndjale, kushi, eduwa ndo nkɛtɛ. Nkɛtɛ kayokoma paradiso. Bible mbutaka ɔnɛ: “Oswe wa shɛnga ndo nkɛtɛ y’ofumbo yayɔngɛnangɛna, ndo laandja l’oswe layonga l’ɔlɔ ndo layɔmɔnga oko dɛmbɔlɛmbɔ dia safra.”—Isaya 35:1.
Kakɔna kayokomɛ wanɛ wahalɛmiya nkɛtɛ kana ahole wodjashi asekawɔ? Nzambi ndakaka “dia ndanya wanɛ walanya nkɛtɛ.”—Ɛnyɛlɔ 11:18, nɔtɛ; Tokedi 2:21, 22.
Okakatanu: Anto w’ekɔ lo nkamba la tɔkɔkɔ t’ashi lo yoho ya kɔlɔ. Etombelo wele la dikambo sɔ ele, ashi efula wakoka anto nnɔ w’ekɔ lo nshishɔ.
Okandwelo: Diolelo diaki Nzambi diayokotsha lolango lande koko aha lolango l’ana w’anto wa lokaki ndo diɔ diayanga mbolɛ “nkɛtɛ.” (Mateo 6:9, 10) Diolelo diaki Nzambi diayetsha anto lo yoho ya dimɛna. Isaya 11:9 mbutaka ɔnɛ: “Nɛ dia nkɛtɛ kayolola mɛtɛ la ewo ka Jehowa.”a La ewo kɛsɔ lo yimba, kaamɛ ndo la ngandji k’efula kokaso Jehowa ndo ditongami diande, anto w’ɛlɔlɔ wayokokɛ nkɛtɛ ndo kɛnɛ tshɛ kele lɔkɔ.
Dia mbeya awui efula wendana la Diolelo diaki Nzambi, enda sawo diele l’ɔtɛ a dui ɔnɛ: “Kakɔna kayosala Diolelo diaki Nzambi?”
Enda lo Bible lo mukanda w’Isaya tshapita 35, dia mɛna woho wayokadimɔ nkɛtɛ paradiso.
Enda vidɛo yele l’ɔtɛ a dui ɔnɛ: Pourquoi Dieu a-t-il créé la terre? dia mbeka akambo efula wendana la sangwelo diaki Nzambi lo dikambo dia nkɛtɛ ndo di’anto.
a Jehowa mbele lokombo laki Nzambi. (Osambo 83:18) enda sawo diele l’ɔtɛ a dui ɔnɛ: “Ele Jehowa?”