Lande na kahakoke anto mbidja wɔladi?​​—Kakɔna kata Bible lo dikambo sɔ?

Ewandji ndo atshunda wa l’andja w’otondo bu l’akoka wa mbela wɔladi le anto. Ɛlɔ kɛnɛ kamboleka tshɛ awui wa ngala salema ntatɛ lam’akalɔma Ta dia hende dia l’andja w’otondo. Anto oko miliyara hiende, mbuta ate k’anɛi ɔtɔi k’anto wa l’andja w’otondo wekɔ lo nsɛna l’ahole walɔma ata.

Lande na kahakoke anto mbela wɔladi? Kakɔna kata Bible lo dikambo sɔ?

Ɛkɔkɔ esato wɛnya lande na kahakoke anto mbidja wɔladi

1. 1. Anto wekɔ la waonga waashimba dia kaanga nyanga dia mbidja wɔladi. Bible kakatatshi dia lo nshi yaso, “anto wayoyalanga, wayolanga falanga, wayonga akanga w’etako, akanga wa lotamanya, . . . waha la kɔlamelo, . . . wahalange mbokana, . . . waha la ndjakimɛ, akanga w’ekonda, . . . akanga w’ɛtɛ wolo, akanga wa ndjadiya.”​​—2 Timɔte 3:2-4.

2. 2. Anto lo tshɛ kawɔ kana l’onto ndo l’onto bu l’akoka wa nkandola ekakatanu awɔ aha l’ekimanyielo k’Otungi awɔ Jehowaa Nzambi. Bible mɛnyaka dia onto “bu la lotshungɔ la nɔmbɔla kaanga ekolo ande.”​​—Jɛrɛmiya 10:23.

3. 3. Andja wekɔ lo shɛngiya ndo l’ɛlɔmbwɛlɔ k’owandji wa kɔlɔ, Satana Diabolo, “ɔnɛ langanyiya nkɛtɛ k’otondo.” (Ɛnyɛlɔ 12:9) L’edja tshɛ kele “andja w’otondo wekɔ lo nɔmbɔma oma le kanga kɔlɔ,” ata ndo efukutanu wayoyalaka.​​—1 Joani 5:19.

Onto akɔna layodja wɔladi?

Bible toshikikɛka dia wɔladi wayoya aha oma lo welo wadja anto, koko oma le Nzambi.

• “‘Nɛ dia dimi mbeyaka dimɛna tokanyi takanyiyami dikambo dianyu,’ mbata Jehowa, ‘tokanyi ta wɔladi, koko aha ta mpokoso, dia nyosha nshi yayaye ndo elongamelo.’”​​—Jɛrɛmiya 29:11.

Ngande wayokotsha Nzambi daka sɔ? “Nzambi kasha wɔladi ayanga minola Satana.” (Rɔmɔ 16:20) Nzambi ayokamba la lowandji la l’olongo, lelɛ Bible ɔnɛ “Diolelo dia Nzambi” dia mbidja wɔladi lo nkɛtɛ k’otondo. (Luka 4:43) L’ɛlɔmbwɛlɔ ka Yeso Kristo, Nkumekanga ka Diolelo sɔ, anto wayetshama woho wa nsɛna lo wɔladi.​​—Isaya 9:6, 7.

• Dia mbeya awui akina, adia sawo diele l’ɔtɛ a dui ɔnɛ “Kakɔna kayosala Diolelo diaki Nzambi?”