Lande na kambofulanɛ lohetsho?—Kakɔna kata Bible lo dikambo sɔ?

Nsango yaleka ɛlɔ kɛnɛ ele ɛtɛkɛta wa lohetsho, diakatanelo l’ɔtɛ wakanɛwɔ anto w’oma l’ahole akina kɔlɔ ndo ata.

“Ɛtɛkɛta watshutshuya lo lohetsho wamboleka ɛlɔ kɛnɛ l’ɔtɛ wa ta dia lam’asa Israël la Gaza ndo l’ɔtɛ w’anto watshutshuyana l’awui wa ngala ndo lo lohetsho.”—The New York Times, Ngɔndɔ ka dikumi l’ɔtɔi 15, 2023.
Dennis Francis, prezida ka Assemblée générale des Nations Unies akate lo Ngɔndɔ ka dikumi l’ɔtɔi 3, 2023 ate: “Ntatɛ Ngɔndɔ ka dikumi nshi 7, ɛtɛkɛta wa lohetsho ndo wa ngala wamboleka tshɛ tondjama l’ɔtɛ wakanɛwɔ anto amɔtshi kɔlɔ.”

Aha ɛlɔ la loyi mbambotatɛ ɛtɛkɛta wa lohetsho, awui wa ngala ndo ata. Bible tɛkɛtaka di’anto wa lo nshi y’edjedja wakɛdiyaka “ɛtɛkɛta awɔ wa lɔlɛngɔ oko mpito” ndo wakayashaka l’ata ndo l’awui wa ngala. (Osambo 64:3; 120:7; 140:1) Koko Bible mɛnyaka dia lohetsho lele ɛlɔ kɛnɛ lekɔ la kitshimudi y’ohomba.

Lohetsho ekɔ djembetelo ya tena diasɛnaso

Bible mɛnyɛka ɛkɔkɔ ehende wamboleka lohetsho fulanɛ ɛlɔ kɛnɛ.

1. Tɔ kakatatshi di’etena kele “ngandji k’anto efula kayɔla.” (Mateo 24:12) Lo dihole dia mbokana ngandji, anto lo tshɛ kawɔ wayonga la waonga watshutshuya lo lohetsho.—2 Timɔte 3:1-5.
2. Woho wambofula lohetsho l’andja w’otondo ekɔ l’ɔtɛ wa shɛngiya ya mayɛlɛ ndo ya kɔlɔ y’oma le Satana Diabolo. Bible mbutaka dia “andja w’otondo wekɔ lo nɔmbɔma oma le kanga kɔlɔ.”—1 Joani 5:19; Ɛnyɛlɔ 12:9, 12.

Koko Bible mɛnyaka nto dia kem’edja, Nzambi ayonya awui tshɛ wakonya lo lohetsho. Kɛnɛ koleki tshɛ ele, nde ayonya paa tshɛ yakaye oma lo lohetsho. Bible ndakaka ɔnɛ:

Nzambi “ayokitola asɔyi tshɛ oma lo washo awɔ, nyɔi hatoyala nto, otanda hatoyala nto, delo hatoyala nto, kaanga kandji hatoyala nto. Akambo wa ntondo wamboshila.”—Ɛnyɛlɔ 21:4.