Onde elongamelo kɛmɔtshi kekɔ l’ɔnɔnyi wa 2024?—Kakɔna kata Bible lo dikambo sɔ?

Anto efula fɔnyaka di’ekakatanu wayohomana la wɔ lo 2024 hawotokandɔma. Koko aha la taamu, sho koka ntana elongamelo lo dikambo dia nshi yayaye. Ko lende?

Bible mbishaka elongamelo

Bible ndakaka dia Nzambi ayokandola ekakatanu watokonya dia nshisha elongamelo lo lɔsɛnɔ laso la nshi nyɛ. Keema edja, Nzambi “ayokitola asɔyi tshɛ oma lo washo [aso], nyɔi hatoyala nto, otanda hatoyala nto, delo hatoyala nto, kaanga kandji hatoyala nto.”—Ɛnyɛlɔ 21:4.

Dia mbeya awui efula l’alaka washa Bible lo dikambo dia nshi yayaye, adia sawo diele l’ɔtɛ a dui ɔnɛ: “Une espérance réelle pour des jours meilleurs.”

Ngande wakoka Bible kokimanyiya?

Elongamelo kasha Bible lo dikambo dia nshi yayaye kokaka kokimanyiya dia ndɔshana la tokanyi ta kɔlɔ kana oshishelo w’elongamelo ndo monga la ekanelo ka yimba ka dimɛna. (Rɔmɔ 15:13) Alako w’eshika wa lo Bible koka kokimanyiya dia ndɔshana la ekakatanu wakoka mponana la yɛ nshi nyɛ wele oko woola, akambo waha la losembwe ndo hemɔ.

Enda woho wakakimanyiya elongamelo kasha Bible pami kɛmɔtshi dia ntana ki ndo ɔngɛnɔngɛnɔ kaanga mbakandole lo nkumbo ka woola. Enda vidɛo yele l’ɔtɛ a dui ɔnɛ: Juan Pablo Zermeño: Jehowa akambisha lɔsɛnɔ la dimɛna.
Enda woho wakoka Bible kokimanyiya dia ndɔshana la tokanyi ta ndjaɛndja onongo, t’ɔkɛyi w’efula, t’ekiyanu kana t’oshishelo w’onto ɔmɔtshi lalangayɛ. Adia sawo diele l’ɔtɛ a dui ɔnɛ: “La Bible peut-elle m’apporter du réconfort ?”
Enda elongamelo k’oma lo Bible kakatane ɔsɔlayi ɔmɔtshi wakayataka dia nde aki “onto la kɔlɔ lakatshikitana la anto akina.” Enda vidɛo yele l’ɔtɛ a dui ɔnɛ: J’ai déposé les armes.

Sala dia 2024 monga ɔnɔnyi wa dimɛna le yɛ ndo le ase nkumbo kayɛ. Eka awui efula wakoka Bible kokimannyiya. Hemba wekelo aso wa Bible w’ofele. Enda woho wakoka Nzambi kokimanyiya kakiyanɛ dia monga la “tokanyi ta wɔladi” ndo kosha “nshi yayaye ndo elongamelo.”—Jɛrɛmiya 29:11.