Ngande walowanyema Ɛmɛnyi wa Jehowa dia nkotsha olimu awɔ dimɛna?

Ɛmɛnyi wa Jehowa ndowanyemaka lo kɛnɛ kendana l’awui tshɛ wa lo lɔsɛnɔ l’Okristo ndo olimu awɔ w’esambishelo. Olimu ɔsɔ mbakadjangɛ Yeso ambeki ande dia vɔ nsala mbuta ate nsambisha ndo mbetsha lokumu l’ɔlɔlɔ la Diolelo. (Mateo 24:14; 28:19, 20) Sho nongolaka elowanyelo ɛsɔ lo nsanganya yaso ya lomingu la lomingu, nsanganya ya weke ndo lo nsanganya ya rɛjɔ. Ɛmɛnyi wa Jehowa wele l’ɛkɛndɛ efula l’etshumanelo nongolaka elowanyielo ekina lo kalasa mɔtshi ya laande ya Bible.

Lo sawo nɛ:

Olowanyelo akɔnya walongola Ɛmɛnyi wa Jehowa?

Nsanganya ya l’etshumanelo. Lomingu tshɛ, Ɛmɛnyi wa Jehowa mbɔtɔka nsanganya hiende l’ahole welɛwɔ Mbalasa ya Diolelo. Vɔ mbɔtɔka losanganya lɔmɔtshi l’ateyi wa lomingu ndo lokina lo wikɛndɛ. Onto tshɛ koka mbɔtɔ ndo ɛkɔngɔ hawosalema.

Losanganya la l’atei wa lomingu. Sho mbekaka woho wa ndowanya yoho yaso ya mbadia, ya nsawola l’anto akina, ya ntɛkɛya lo sɛkɛ, ya nsambisha ndo ya mbetsha. Olowanyielo ɔsɔ mbishamaka oma lo tshimbo y’asawo, ɛkɛtshanyielo, wɛnyɛlɔ ndo tovidɛo tɛnyama. Olowanyelo ɔsɔ tokimanyiyaka dia ndeka monga tomanamana etena kewoyaso anto akina losango l’oma lo Bible ndo kekaso Bible la wanɛ wetawɔ. Anto tshɛ kondjaka wahɔ oma l’olowanyelo ɔsɔ. Wahɔ woleki tshɛ ele, nsanganya yaso tokimanyiyaka dia nkeketsha mbetawɔ le Nzambi, mfudia ngandji kawokaso ndo kokaso wanyaso anto.
Losanganya la lo wikɛndɛ. Losanganya lele la tenyi pende lɔsɔ tatɛka la sawo dia lo sɛkɛ di’oma lo Bible diashama lo wahɔ w’onto tshɛ. Etenyi kikina ka lo losanganya lɔsɔ ele wekelo wa Bible oma lo tshimbo ya Tshoto y’etangelo.a Wekelo ɔsɔ salemaka lo yoho ya ambola la ekadimwelo. Asawo washama nembetshiyaka awui wa lo Bible ndo atɔndɔ amɔtshi wakoka tokimanyiya l’olimu ndo lo lɔsɛnɔ laso la lushi la lushi.

Nsanganya ya weke ndo ya rɛjɔ. Ɔnɔnyi tshɛ, sho mongaka la nsanganya ya weke shato ndo tshumanelo efula mbɔtɔka lo losanganya la woke tshɛ. Nsanganya ya weke shɔ mbikaka epole ɔsɛkɛ lo ɔtɛ a dui ɔmɔtshi w’oma lo Bible ndo yɔ mongaka la asawo, ɛkɔnya ndo tovidɛo. L’ɛnyɛlɔ ka nsanganya yaso ya l’etshumanelo, nsanganya yaso ya weke ndo ya rɛjɔ tokimanyiyaka dia ndeka monga la ewo k’oshika k’oma lo Bible ndo tokimanyiyaka dia monga esambisha wa tomanamana wa lokumu l’ɔlɔlɔ. Onto tshɛ lalanga koka mbɔtɔ lo nsanganya shɔ ndo ɛkɔngɔ hawosalema.

Kalasa ya Bible y’Ɛmɛnyi wa Jehowa

L’ɔtɛ w’elowanyelo ɛmɔtshi wa laande, Ɛmɛnyi wa Jehowa ɛmɔtshi mbelamɛka dia mbɔtɔ lo Kalasa ya Bible yotshikitanyi. Kalasa yakɔna shɔ shikaa? Oyango akɔna wele la Kalasa shɔ ndo edja ka ngande kaviyayɔ? Ndo waa na wayiɔtɔ?

Kalasa k’ambatshi mboka wa pondjo

Oyango: Ndowanya anangɛso l’akadiyɛso wakamba olimu wa lo ntena tshɛ ndo welamɛ ɔnɛ ambatshi mboka,b dia vɔ monga l’etombelo w’amɛna l’olimu w’esambishelo ndo wa wetshelo. Lo kalasa kɛsɔ, ɛkɔnya, ɛkɛtshanyelo, asawo ndo adevwara salemaka.
Edja kaviyatɔ: Nshi shamalo.
Wanɛ wakoka mbɔtɔ lɔkɔ: Wanɛ wambokamba oko ambatshi mboka wa pondjo ambeta ɔnɔnyi, mbelamɛka dia mbɔtɔ kalasa kɛsɔ. Ambatshi mboka wa pondjo w’edjedja mbɔtɔka kalasa kɛsɔ nto l’ɔkɔngɔ w’ɛnɔnyi etanu.

Kalasa k’esambisha wa Diolelo

Oyango: Ndowanya anangɛso l’akadiyɛso wayasha efula l’olimu wa lo ntena tshɛ. Ambeki asɔ ndowanyaka akoka awɔ wa nsambisha ndo vɔ mbekaka akambo efula w’oma lo Bible lo yoho ya lotshimola. Efula ka wanɛ wɔtɔ Kalasa kɛsɔ tomamaka l’ahole wewɔ l’ohomba w’esambisha wa Diolelo.
Edja kaviyatɔ: Ngɔndɔ hiende.
Wanɛ wakoka mbɔtɔ lɔkɔ: Ambatshi mboka wa pondjo walanga, koka mbɔtɔ kalasa kɛsɔ naka vɔ kotshaka kɛnɛ kalɔmbama ndo naka wekɔ suke dia tomama dihole tshɛ diɛnama ohomba awɔ.

Kalasa ka dikumanyi dia l’etshumanelo

Oyango: Kimanyiya dikumanyi dia vɔ nkotsha dimɛna ɛkɛndɛ awɔ wa l’etshumanelo wele oko wa mbetsha, nkimanyiya ɛkɔkɔ ndo mfudia ngandji kokawɔ Jehowa la wanyawɔ ambetawodi.—1 Petero 5:2, 3.
Edja kaviyatɔ: Nshi tshanu.
Wanɛ wakoka mbɔtɔ lɔkɔ: Dikumanyi di’eyoyo ndo nɛ diele la ewo k’efula ko wambetsha ɛnɔnyi etanu, mbelamɛka dia mbɔtɔ kalasa kɛsɔ.

Kalasa k’emendji weteta la wadɛwɔ

Oyango: Kimanyiya emendji weteta, welamɛ ɔnɛ emendji w’etshimbedi,c dia vɔ nkotsha ɛkɛnde awɔ lo yoho ya dimɛna efula. (1 Timɔte 5:17) Olowanyielo walongolawɔ kimanyiyaka dikumanyi sɔ ndo wadiɛwɔ dia vɔ monga la ewo k’efula k’afundelo.
Edja kaviyatɔ: Ngɔndɔ ɔtɔi.
Wanɛ wakoka mbɔtɔ lɔkɔ: Emendji w’etshimbedi w’eyoyo wambokotsha ɔnɔnyi l’olimu ɔsɔ, mbelamɛka vɔ la wadiɛwɔ dia ndjɔtɔ kalasa kɛsɔ. Ndo nto, emendji w’etshimbedi koka nyomɔtɔ kalasa kɛsɔ l’ɔkɔngɔ w’ɛnɔnyi etanu.

Ambeki amɔtshi wa lo kalasa k’emendji w’etshimbedi la wadiɛwɔ wahokamɛ la yambalo tshɛ.

Kalasa k’olimu wa Diolelo

Oyango: Kimaniyiya dikumanyi ndo ekambi wakimanyiyad dia vɔ nkotsha ɛkɛndɛ awɔ wa l’etshumanelo dimɛna lo ndjela ekakatanu kana ehomba wele l’ɛkɔkɔ. (2 Timɔte 3:1) Kalasa kɛnɛ salemaka l’ɔkɔngɔ w’ɛnɔnyi ɛmɔtshi.
Edja kaviyatɔ: Etena kaviyatɔ tshikitanaka, mbala mɔtshi lushi ɔtɔi.
Wanɛ wakoka mbɔtɔ lɔkɔ: Emendji w’etshimbedi, dikumanyi ndo ekambi wakimanyiya.

Kalasa k’ase Bɛtɛlɛ

Oyango: Kimanyiya ase Bɛtɛlɛe dia vɔ nkamba olimu awɔ dimɛna ndo mfudia ngandji kokawɔ Nzambi ndo wanyawɔ anto.
Edja kaviyatɔ: Nshi tshanu l’etenyi.
Wanɛ wakoka mbɔtɔ lɔkɔ: Anangɛso l’akadiyɛso weke eyoyo lo nkumbo ka Bɛtɛlɛ koka mbɔtɔ kalasa kɛsɔ. Wanɛ wamboviya oko ase nkumbo ka Bɛtɛlɛ ndo wambetsha ɛnɔnyi etanu aha la mbɔtɔ kalasaa kɛsɔ, mbelamɛka dia kiɔtɔ nto.

Kalasa ka Ngiliyadɛ

Oyango: Kimanyiya wanɛ wakiɔtɔ dia vɔ ndeka ngɛnangɛna Ɔtɛkɛta wa Nzambi ndo mbakimanyiya dia nkamba la kɛnɛ kekiwɔ oma lɔkɔ. (1 Tɛsalɔnika 2:13) Anangɛso la akadiyɛso wɔtɔ kalasa kɛsɔ komaka esukɔ wa wolo efula l’okongamelo wa Jehowa ndo l’ahole wasalema Kalasa ya Bible l’andja w’otondo. Wanɛ wɔtɔ kalasa kɛsɔ tomamaka lo teritwara kɛmɔtshi, lo Bɛtɛlɛ kɛmɔtshi, lo wodja wakawaye kana lo wodja okina.
Edja kaviyatɔ: Ngɔndɔ tshanu.
Wanɛ wakoka mbɔtɔ lɔkɔ: Bɛtɛlɛ sɔnaka ekambi ɛmɔtshi wa lo ntena tshɛ dia tɔɔtɔ kalasa kɛsɔ. Ambeki welamɛ mbɔtɔka kalasa kɛsɔ l’Etats-unis lɛnɛ ele Mbalasa kalɔmbɔla olimu w’Ɛmɛnyi wa Jehowa wa l’andja w’otondo, mbuta ate la Patterson.

Kalasa k’ase kɔmite ka filialɛ la wadiɛwɔ

Oyango: Ndowanya ase Kɔmite ka filialɛf dia vɔ mkotsha ɛkɛndɛ awɔ wa lo Bɛtɛlɛ dimɛna ndo nɔmbɔla olimu w’Ɛmɛnyi wa Jehowa wa lo wodja kana wedja wenda Bɛtɛlɛ keewɔ.
Edja kaviyatɔ: Ngɔndɔ hiende.
Wanɛ wakoka mbɔtɔ lɔkɔ: Mbalasa kalɔmbɔla olimu w’Ɛmɛnyi wa Jehowa wa l’andja w’otondo mbelɛka ase Kɔmite ya filialɛ la wadiɛwɔ dia vɔ ndjɔtɔ Kalasa kɛsɔ kasalema la Patterson (États-unis).

Dibuku diakɔna diele kiɔkɔ y’olowanyelo w’Ɛmɛnyi wa Jehowa?

Bible mbele dibuku diele kiɔkɔ y’olowanyelo walongola Ɛmɛnyi wa Jehowa. Sho mbetawɔka dia tɔ kakasambiyama oma le Nzambi ndo tɔ kekɔ la wetshelo w’amɛna efula wakoka tokimanyiya lo lɔsɛnɔ laso l’okristo.—2 Timɔte 3:16, 17.

Onde Ɛmɛnyi wa Jehowa futshanyɛka elowanyelo awɔ?

Ndooko. Olowanyelo washawɔ wekɔ w’ofele. Olimu w’Ɛmɛnyi wa Jehowa sukamɛka oma lo weshahsha wa la lolango.—2 Kɔrɛtɔ 9:7.

a Bible, dihomɔ dikina dia wekelo ndo tovidɛo, tanekama lo sitɛ ka jw.org.

b Ombatshi mboka ekɔ opandjudi washa ɛnyɛlɔ ka dimɛna (pami kana womoto) ndo lakombola mbetsha wenya ɛmɔtshi shikaa oseka ngɔndɔ tshɛ dia mbewoya anto akina losango l’oma lo Bible.

c Omendji w’otshimbedi ekɔ ɔnangɛso ɔmɔtshi lembola tshumanelo diotshikitanyi oseka lomingu tshɛ l’otshimbeki ande. Nde keketshaka anango ndo akadiyɛnde wa lo nyuma lo tshimbo y’asawo wɔsami oma lo Bible ndo sambishaka kaamɛ lawɔ.

d Ekambi wakimanyiya wekɔ anangɛso wakamba weho w’elimu wotshikitanyi lo wahɔ w’anangɛwɔ l’akadiyɛwɔ. Lo nsala ngasɔ, vɔ kimanyiyaka dikumanyi dia monga l’etena k’efula dia mbetsha ndo nkotsha ɔkɛndɛ awɔ w’anami w’ɛkɔkɔ lo yoho ya dimɛna.

e Bɛtɛlɛ ekɔ lokombo lelamɛ dihole dialɔmbwama olimu w’Ɛmɛnyi wa Jehowa lo wodja ɔmɔtshi. Wanɛ wakamba olimu wa lo ntena tshɛ lɛkɔ kimanyiyaka di’olimu wa l’ɛtshi ka nkɛtɛ kenda Bɛtɛlɛ kawɔ ntshɔ otsha la ntondo lo yoho ya dimɛna.

f Kɔmite ka filialɛ kengamaka l’anangɛso asato wambotshunda lo nyuma kana ndekana.

Onde Ɛmɛnyi wa Jehowa wambokondjaka wahɔ oma l’olowanyelo awɔ?

“Lakɛnaka wolo nsawola l’anto wahameye awui wa lo Bible l’ɔtɛ wemi ɔsɔnyi. Koko, olowanyelo wakamakondja oma lo losanganya la l’ateyi wa lomingu wakakimanyiya dia mfudia wɛkamu ami ndo ndeka ndowanya akoka ami wa mbetsha. Handjoka nsɔnyi ntɛkɛta l’anangɛso ndo akadiyɛso l’etshumanelo ndo l’anto akina wa l’olimu.”—Natasha, États-unis.
“Wɔtwɛlɔ wa kalasa k’esambisha wa Diolelo akakimanyiya dia ndeka nkɛnɛmɔla waonga w’amɛna wele oko ngandji, solo dia lotutsha ndo ɔlɔlɔ. Etombelo wele la dui sɔ ele, loyaoka dia laya okritso, ɔngɛnyi ndo osukanyi w’oshika. Lakeke woho wa nsala eyangelo lo ɛtɛ w’awui ɛmɔtshi w’eshika wa lo Bible ndo woho wa nembetshiya Ɔtɛkɛta wa Nzambi lo yoho yananda etena w’anto.”—Stephen, Nigéria.
“Kalasa ka dikumanyi kakakimanyiya dia ndeka nkɛnɛmɔla okitshakitsha etena kakambami oko ekumanyi dia ndeka monga l’etombelo w’amɛna. Asawo wakashama wakake epole ɔsɛkɛ l’ohomba wa ndjela ɛnyɛlɔ ka Yeso.”—Luca, Italie.
“Kalasa ka Diolelo kakambetsha ohomba wa monga kaamɛ l’anto akina, ɔlɔlɔ ndo sawolaka dimɛna. Lakeke dia ngandji kahomba tshutshuyami dia nsala akambo koko aha l’ɔtɛ w’ɔkɛndɛ wakamalongola.”—Samuel, Royaume-Uni.
“Kalasa ka ngiliyadɛ kakatokimanyiya dia ndjasɛdingola dimɛna lo tshimbo y’Ɔtɛkɛta wa Nzambi wele oko talatala leso. (Jakɔba 1:22-25) Takashihodia ahole shikaa wahombaso nsala etshikitanu lo lonto laso ndo l’olimu wakambɛso Jehowa. Takeke dia sho pombaka ndeka ndjasha le anto akina koko aha leso, ndo ntshika dia kɛnɛ kataso ndo kasalaso tshutshuyama oma lo ngandji.”—Elnathan nde la Princess, Philippines.