Onde Ɛmɛnyi wa Jehowa mbewɔka wanɛ waki l’ɔtɛmwɛlɔ awɔ ntondo?

Hatewɔ wanɛ wakabatizama oko Ɛmɛnyi wa Jehowa, koko hawoyosambisha anto akina, ndo mbala mɔtshi hawoyonga kaamɛ l’asekawɔ ambetawudi. Koko, sho tshɔka le wɔ ndo salaka la wolo dia mbasadjasadja lo nyuma.

Aha naka onto ambosala pɛkato kɛmɔtshi ka woke, kete laasɔ nde pombaka mbitshanyema mbala kakɔ ɔtɔi. Koko, naka Ɔmɛnyi wambobatizama ambosekola ɔlɛmbɛ ɔmɔtshi wendana la lɔkɛwɔ, koko hayatshumoya, kete sho pombaka mbeewɔ ndo nde pombaka mbitshanyema. Bible mbutaka hwe ɔnɛ: “Nyonya kanga kɔlɔ oma l’atei anyu.”​—1 Kɔrɛtɔ 5:13.

Ko kayotota di’onto lakatshanyema koko wadɛnde la anande weke Ɛmɛnyi wa Jehowa? Dimama di’awui wa lo nyuma diele lam’asande l’ase nkumbo kande tshikitanaka, koko dimama dia lo dikila tshikalaka. Dimama dia diwala ndo dia lo nkumbo tetemalaka.

Anto wakatshanyema mbeyaka mbɔtɔ lo nsanganya yaso. Naka vɔ walanga, vɔ mbeyaka nongola alako wa lo nyuma oma le dikumanyi dia l’etshumanelo. Oyango ele dia mbaakimanyiya dia vɔ nyomonga l’akoka wa monga nto Ɛmɛnyi wa Jehowa. Anto wakatshanyema wakadja lɔkɛwɔ la mindo ndo wasɛna l’otema ɔtɔi lo yoho yɔtɔnɛ l’atɔndɔ wa lo Bible kaloyamaka nto l’etshumanelo.