ƐLƆNGƆLƆNGƆ WEKƆ LO NDJAMBOLA

Kakɔna kayomosala naka ambutshi ami wolanga ndjaka diwala?

Odiakelo wa diwala di’ambutshi ekɔ ɔmɔtshi l’atei w’awui waleka mbisha ɛlɔngɔlɔngɔ paa efula. Kakɔna kakokayɛ nsala dia mbikikɛ dui sɔ?

Lo sawo nɛ:

Awui asato wahayahombe nsala

1. Tɔfɔnyake dia wɛ mbele lo kiɔkɔ

“Mama akambutɛ ate ekakatanu wele lam’asande la papa wakatatɛ etena kakamotɔ. Laasɔ, lakatatɛ mfɔnya dia dimi mbele lo kiɔkɔ y’ekakatanu awɔ.”—Diana.

Kɛnɛ kahombayɛ mbohɔka: Aha wɛ mbele lo kiɔkɔ y’odiakelo wa diwala di’ambutshi ayɛ. Ekakatanu wele lam’asawɔ mbele lo kiɔkɔ y’odiakelo wa diwala di’ambutshi ayɛ. Wɛ bu kiɔkɔ y’ekakatanu awɔ ndo wɛ hakoke nkandola ekakatanu akɔ. Vɔ mbele l’ɔkɛndɛ wa nkandola ekakatanu watomba lo diwala diawɔ.

“Onto l’onto ayɛmba wotsho ande hita.”—Ngalatiya 6:5.

2. Tokake nkɛlɛ

“L’ekɔ lo mboka papa nkɛlɛ ka mamba lo woho wende bu la kɔlamelo le mama. Ekɔ yema wolo dimi ndjaɛkɛ nto le nde.”—Rianna.

Kɛnɛ kahombayɛ mbohɔka: Ondo wɛ ekɔ la nkɛlɛ l’ɔtɛ wa nkɛnɛ kambosala ambutshi ayɛ ndo wɛ ekɔ l’ɛkɔkɔ w’amɛna wa mboka nkɛlɛ. Koko, keema dimɛna wɛ ntetemala mboka nkɛlɛ. Kɛsɔ mbeyaka monga l’etombelo wa kɔlɔ lo demba ndo lo yimba yayɛ. Diakɔ diele anto amɔtshi wakate ɔnɛ: mboka nkɛlɛ ekɔ oko ndɛ lɔlɛngɔ lo mfɔnya ɔnɛ anto akina mbayovɔ.a

“Kimɔ nkɛlɛ ndo tshika odudu.”—Osambo 37:8.

3. Tɔfɔnyake dia diwala diayɛ hotondoya

“L’ekɔ la wɔma dia kɛnɛ kosadi ambutshi ami mbeyaka ndjokoma ndo le mi. L’ekɔ la wɔma wa naka dimi tshukama ndo mbota ana, kete layoyokoma lo kɛnɛ kakakonya papa la mama dia ndjaka diwala.”—Jessica.

Kɛnɛ kahombayɛ mbohɔka: Wɛ mbeyaka ntondoya lo diwala diayɛ oyadi kaanga ambutshi ayɛ hawotondoyisha diawɔ. Aha la taamu, wɛ mbeyaka nkondja wetshelo w’amɛna oma lo kɛnɛ kakakomɛ ambutshi ayɛ. Ɛnyɛlɔ, wɛ ayoleka monga la yewo dia mbeya dia kana onto layotshukana layɛ ekɔ la waonga wakombolayɛ. Woho wele ambutshi ayɛ kotondoya diwala diawɔ mbeyaka kokimanyiya dia mbeya waonga amɔtshi shikaa, wahombayɛ nkɛnɛmɔla dia monga wadi kana omi l’oshika.

“Onto l’onto asɛdingole etsha ande hita.”—Ngalatiya 6:4.

Yana mɔtshi ya hiami okime mfɔ lo lonya lande l’omi, etena kodjashinde lo kɔsa akamba la ɔrdinatɛrɛ ande. — Mbahemɛ awui wendana l’odiakelo wa diwala di’ambutshi ayɛ, ekɔ oko ɔkɔnwɛlɔ wa weka wakawɛlɛ. Kɛnɛ kasha paa l’etena kɛnɛ, honga nto lo nshi yayaye

Awui asato wahombayɛ nsala

1. Sawolaka l’anto akina. Mbala efula, anto wahatondja kɛnɛ ka kɔlɔ kele lawɔ l’otema ndjokomaka la mbekelo ya kɔlɔ yele oko wodjwelo wa wanu kana ɔnwɛlɔ wa didjoyadjoya. Hemba nsala nganɛ dia mbewɔ ndjokoma l’awui wa ngasɔ:

Sawola l’ambutshi ayɛ. Naka ombutshi ɔmɔtshi kana ambutshi akɔ ahende wekɔ lo kotɛ awui efula wendana l’ekakatanu wa lo diwala diawɔ, kete tɛwɔ la dilɛmiyɛlɔ ndo l’eshikikelo tshɛ woho wele ekakatanu awɔ konyangiyaka. Naka wɛ mɛnaka wolo mbatɛ awui asɔ okoko l’okoko, kete fundɛnde kana fundɛwɔ mukanda walembetshiya woho wayaokayɛ.

Sawola l’ɔngɛnyi ayɛ ɔmɔtshi w’oshika. Wɛ mbeyaka nkondja ekimanyielo ka dimɛna efula naka wɛ nsawola l’onto ɔmɔtshi lakoka nshihodia woho wayaokayɛ. Bible mbutaka ɔnɛ: “Ɔngɛnyi wa mɛtɛ mbokanaka ngandji tena tshɛ ndo ekɔ ɔnanyɔ lakokayɛ mendɛ le nde lo tena dia paa.”—Tokedi 17:17.

Tɛ otungi ayɛ woho wayaokayɛ. Jehowa lele ɔnɛ “latokaka dɔmbɛlɔ,” ayokohokamɛka nshi tshɛ. (Osambo 65:2) Bible mbutaka dia wɛ koka nkitsha ‘ekiyanu anyu tshɛ le nde, nɛ dia nde ndjakiyanyaka dikambo diayɛ.’—1 Petero 5:7.

Ombutshi akɔna wakokayɛ nsawola lande lo kii ndo lo yoho ya dimɛna?
Ɔngɛnyi ayɛ akɔna (ɔlɔngɔlɔngɔ kana opalanga) wayaɛkɛyɛ le nde wakoka kokimanyiya dia mbikikɛ okakatanu ɔnɛ?
Lo dikambo di’ekakatanu akɔna shikaa wakokayɛ nɔmba?

2. Yaɔtɔnganyiya la lɔsɛnɔ l’oyoyo

Odiakelo wa diwala di’ambutshi ayɛ mbeyaka kokonya dia ntatɛ mbidjasɛ lo luudu l’oyoyo, mbɔtɔ kalasa lo dihole dikina, kana nkondja angɛnyi w’eyoyo. Lo mɛtɛ, awui anɛ tshɛ mbeyaka kosha paa k’efula l’ɔtɛ wambotshikitana lɔsɛnɔ layɛ lo yoho ya kɔlɔ. Kakɔna kakoka kokimanyiya di’aha mɛna etshikitanu ɛsɔ lo yoho ya kɔlɔ? Leka ndjasha lo kɛnɛ kakokayɛ nsala dia ndjaɔtɔnganyiya la lɔsɛnɔ layɛ l’oyoyo.

Otshikitanu akɔna woleki woke wakayasale l’ɔtɛ wakadiake ambutshi ayɛ diwala?
Kakɔna kakokayɛ nsala dia ndjaɔtɔnganyiya la dikambo sɔ?

“Lakeke dia ngɛnangɛna la kɛnɛ kele la mi oyadi l’etena kakɔna tshɛ.”—Filipɛ 4:11.

3. Eya waonga kana akoka ayɛ

Odiakelo wa diwala di’ambutshi ayɛ koka kosha lonyangu l’efula ndo koka nto kokimanyiya dia wɛ mbeya waonga wele layɛ. Wɛ koka nto monga l’akoka wa nkɛnɛmɔla waonga akina w’eyoyo. Jeremy, lele ambutshi ande wakadiake diwala etena kakinde l’ɛnɔnyi 13 mbutaka ate: “Odiakelo wa diwala di’ambutshi ami akakonya dia dimi nyomoleka monga la dikoka dia mɛmba ɛkɛndɛ. Lam’ele dimi mbakikɔ ɔna l’enondo, dui nɛ diakakonya dia ndeka nkimanyiya mama lo yoho y’efula ndo monga osukɔ wa shikaa le kosɛmi ka pami.”

Osekaseka ɔmɔtshi akaminyaya kosɛnde ka womoto l’olimu ɔmɔtshi wa la ngelo etena kele mama ahɛ mbo ya ndɛ lo kuku. — Odiakelo wa diwala di’ambutshi ayɛ koka kokimanyiya dia monga la dikoka dia mɛmba ɛkɛndɛ wa la ngelo

Waonga akɔna wamboyɛna dia wɛ ekɔ lawɔ l’ɔkɔngɔ w’ambutshi ayɛ ndjaka diwala?
Waonga akɔna walangayɛ nyomoleka kɛnɛmɔla?

“Afundelo tshɛ wakasambiyama oma le Nzambi . . . dia mbidja akambo l’ɔnɔngɔ.”—2 Timɔte 3:16.

a Dia mbeka awui efula, adia sawo diele l’ɔtɛ a dui ɔnɛ: “Comment maîtriser ma colère ?”

Kɛnɛ kata asekayɛ

“Atete edja, lakahombe ndjashikikɛ di’ambutshi ami mɛtɛ wambodiaka diwala. Dimi koshihodiaka dikambo sɔ oma l’etatelo. Kɔlɔ ko, lamakamayokotsha ɛnɔnyi dikumi l’ɛmɔtshi, lakayotatɛka mboka nkɛlɛ. Kakianɛ, etena kayami l’ɛnɔnyi 18, lambetawɔ di’ambutshi ami wakadiake diwala ndo lolekaka mbika washo lo nshi yayaye.”—Elena.

“Ambutshi ami wakadiake diwala etena kakimi l’ɛnɔnyi esambele. Etena kɛmɔtshi lam’akimi l’ɛnɔnyi 21, lakadjasɛ suke la papa ndo lakawotɛ dia lekɔ l’ohomba wa mbotɛ awui wendana la kɛnɛ kakatombe. L’edja ka wenya oko ehende, takakɛtshanya di’akambo wakayokonya l’odiakelo wa diwala ndo etombelo waki la dui sɔ le mi. Hangɛnangɛna odiakelo wa diwala, koko dimi mbokaka papa ngandji ndo lakawoke lo yoho ya dimɛna. Lakayoshihodia kɛnɛ kakatombe ndo dui sɔ diakakimanyiya dia monga la wɔladi wa lo yimba.”—Katelyn.