ƐLƆNGƆLƆNGƆ WEKƆ LO NDJAMBOLA

Kakɔna kayomosala naka dimi bu la nsaki ka mbɔtɔ kalasa?

Embetsha w’awui wolo. Shɛngiya y’oma le asekaso. Awui efula wa la Kalasa mbishaka lonyangu ndo adevwara tɔ wa ndjosala la ngelo. Wɛ pombaka monga l’ɛkɔkɔ w’eshika wakotshutshuya dia mbuta ɔnɛ halange mbɔtɔ Kalasa.a Womoto ɔmɔtshi lelɛwɔ Rachelb mbutaka ate:

“Dimi nangaka monga l’ahole akina koko aha lo kalasa. Ndeka dimɛna ntshɔ tɔkɛnya l’ashi, monga kaamɛ l’angɛnyi ami, nkimanyiya ambutshi dia nkatɛ kana mbasolɛ diangɔ!”

Naka wɛ ekɔ l’ekanelo ka yimba kaamɛ la ka Rachel, kete wɔtwɛlɔ wa kalasa koka mɛnama oko onto ɔmɔtshi lele lo lokanu, lele ayotshungɔ, paka etena kayondoshidiya wekelo. Onde ekɔ yoho mɔtshi yakoka kokimanyiya dia mɛna etena ketshayɛ lo Kalasa lo yoho ya dimɛna?

Onde wɛ akeyaka? Etena koongayɛ l’ekanelo ka yimba ka dimɛna lo dikambo dia kalasa, kɛsɔ koka kokimanyiya dia mbahemɛ tokanyi ta kɔlɔ ndo ntshika mɛna etena ketshayɛ lo kalasa oko etena k’ekikelo. Lo yoho mɔtshi, kalasa kokimanyiyaka dia wɛ ndowanya akoka ayɛ wayoyokokimanyiya lo yoho y’efula etena kayoyonga opalanga.

Dia monga l’ekanelo ka yimba ka dimɛna lo dikambo dia Kalasa, hemba ndjasha lo awui anɛ:

Wetshelo wakondjayɛ. Akambo efula wayoyeka lo kalasa, wayokokimanyiya dia monga l’akoka wa ndjokandola akambo wayohomana layɛ l’olimu lo nshi yayaye lo dihole dia mendɛka lushi tshɛ le anto akina. Yambola wate: ‘Kaanga mbele ekɔ awui amɔtshi wahamangɛnangɛna la kalasa, naa wahɔ wakondjami oma lo wetshelo wa lɛkɔ?’

Tɔndɔ dia lo Bible: “Lama lomba l’oshika ndo dikoka di’ekanelo ka yimba.”—Tokedi 3:21.

Dia mbeya awui akina efula, adia sawo diele l’ɔtɛ a dui ɔnɛ: “Et si j’ai de mauvais résultats à l’école ?”

Osato ɔmɔtshi wele la dikatshi diakimanyiya dia menda kana diangɔ tshɛ diekɔ suke.

Mbekelo yayɛ. Mbekelo y’amɛna yakondjayɛ oma lo kalasa, koka kokimanyiya dia nkamba dimɛna la etena kayɛ, mbahemɛ nsaki yayɛ, kambaka olimu wa wolo ndo monga la waonga wayoyokokimanyiya etena kayoyonga opalanga. Yambola wate: ‘Ngande wakimanyiya mbekelo ya lo kalasa dia mbahemɛ nsaki yami ndo monga onto lakamba olimu dimɛna? Etshikitanu akɔna wahombami nsala lo akambo anɛ?’

Tɔndɔ dia lo Bible: “Olimu tshɛ wa wolo wekɔ la wahɔ.”—Tokedi 14:23.

Dia mbeya awui akina efula, adia sawo diele l’ɔtɛ a dui ɔnɛ: “Comment gérer mon temps ?”

Osato ɔmɔtshi wɛnya anto ahende wasawola.

Diɔtɔnganelo diayɛ l’anto akina. Diɔtɔnganelo dia l’asekayɛ wa lo kalasa koka kokimanyiya dia ndeka mbokana kɛtshi ndo nɛmiya anto akina. Joshua mbutaka ate: “Mbeka woho wa nsawola la anto akina ekɔ ohomba oko mbeka dia mbeya awui w’ɛkɔndɔ kana wa siansɛ. Ɔnɛ ekɔ dikoka diayokokimanyiya l’edja ka lɔsɛnɔ layɛ l’otondo.” Yambola wate: ‘Wetshelo akɔna wakamakondja lo kalasa lo kɛnɛ kendana la mongaka l’anto akina kaamɛ? Wetshelo akɔna wakamakondja lo kalasa lo kɛnɛ kendana la mongaka l’anto akina wotshikitanyi la mi mbekelo kana wotshikitanyi la mi dietawɔ?’

Tɔndɔ dia lo Bible: “Nyosale la wolo dia nsɛna lo wɔladi l’anto tshɛ.”—Hɛbɛru 12:14.

Dia mbeya awui akina efula, adia sawo diele l’ɔtɛ a dui ɔnɛ: “Ngande wakokami ndowanya akoka ami wa nsawola l’anto?”

Osato ɔmɔtshi wɛnya onto ɔmɔtshi latakɛndakɛnda l’otadimbo.

Nshi yayɛ yayaye. Kalasa koka kokimanyiya dia mbeya akoka ayɛ ndo l’ɔkɔngɔ ndjoyadjɛ eyango w’amɛna. Ɔlɔngɔlɔngɔ ɔmɔtshi welɛwɔ Brooke mbutaka ate: “Wɛ pombaka nongola olowanyelo lo dui dimɔtshi shikaa ndo ngasɔ mbakamasale. L’ɔkɔngɔ wa Kalasa, lakayongaka l’akoka wa nkamba olimu ɔmɔtshi.” Yambola wate: ‘Kakɔna kayomosala dia ndjoyakotshiyɛ ehomba ɛmɔtshi l’ɔkɔngɔ wa nshidiya Kalasa? Onde kɛnɛ kasalami kakiye mbɔtɔnɛka l’olimu wayomoyokamba?’

Tɔndɔ dia lo BIble: “Ushishimi mbuka ololo ka we mbeta.”—Tokedi 4:26, Bible k’Ekila.

a Atɔndɔ efula wa lo sawo nɛ mendanaka ndo la ana wele ambutshi awɔ vɔamɛ mbawaetsha la ngelo.

b Nkombo mɔtshi yakatshikitanyema.

Kɛnɛ kata asekayɛ

“Lo tolui t’anto wa l’elimu, lakahombe nkamba l’anto wotshikitanyi. Lo nsala ngasɔ, lakakondja wetshelo wa woho wa mpokamɛ anto wotshikitanyi la mi mbekelo ndo anto wakole kana wakotɔ l’ahole akina. Asekami wa la Kalasa wakasalaka tɔsɛkɛsɛkɛ efula ndo wakanɛmiyaka nɛ dia vɔ wakɛnyi dia laki ɔlɔlɔ otsha lewɔ ndo dimi kombaɔnyɔlaka.”—Madison.
“Lakeke woho wa monga l’ekanelo ka yimba ka dimɛna otsha le asekami wa la kalasa. Efula kawɔ wakadjaka welo w’efula dia monga anto w’ɛlɔlɔ. Diakɔ diele, lakayangaka waaso wa mbakeketsha lo nkahana lawɔ dui dimɔtshi di’oma lo Bibile.”—Ryan.
“Wɔtwɛlɔ wa kalasa kimanyiyaka dia nkamba dimɛna l’akoka ayɛ. Wɛ mbetshaka wenya efula kaamɛ l’asekayɛ wa la kalasa ndo kɛsɔ kokimanyiyaka dia mbeka kɛnɛ ka mbuta ndo k’aha mbuta, woho wa monga la solo dia lotutsha ndo woho wa monga la lokaho. L’etena k’osutshesutshelo wa demba kaamɛ l’asekayɛ, nyu kɛnyaka kaamɛ ndo kɛsɔ ketshaka woho wa nkamba kaamɛ, dui diele wɛ hatodikoka naka wɛ ekɔ wɛmɛ.”—Brooke.