Onde waa nyama tshɔka l’olongo?

Okadimwelo w’oma lo Bible

Bible mbetshaka dia lo ditongami tshɛ diele la nkɛtɛ, paka yema y’anto tshitshɛ tsho wakasɔnama mbayotshɔ l’olongo. (Ɛnyɛlɔ 14:1, 3) Vɔ wayotshɔ lɛkɔ dia toolɛ kaamɛ la Yeso oko nkumekanga ndo ɛlɔmbɛdi. (Luka 22:28-30; Ɛnyɛlɔ 5:9, 10) Anto efula wayolɔ dia ndjɔsɛna lo nkɛtɛ kayokadimɔ paradiso.—Osambo 37:11, 29.

Bible hɛnya ndooko dihole dia elongalonga kɛmɔtshi kana mfɔ kayotshɔ l’olongo. Ekɔ ngasɔ nɛ dia nyama hayokotsha kɛnɛ kalɔmbama dia nongola “leeta l’otsha l’olongo.” (Hɛbɛru 3:1) Kɛnɛ kalɔmbama kɛsɔ ele monga la ewo ka Nzambi, monga la mbetawɔ ndo nkitanyiya ɛlɛmbɛ wa Nzambi. (Mateo 19:17; Joani 3:16; 17:3) Anto ato mbakatongama la elongamelo ka nsɛna pondjo pondjo.—Etatelo 2:16, 17; 3:22, 23.

Dia ntshɔ l’olongo, ditongami dia la nkɛtɛ pombaka ntondo mbolwama. (1 Kɔrɛtɔ 15:42) Bible tɛkɛtaka dia eolwelo ɛmɔtshi wakasalema. (1 Nkumi ya dikanga 17:17-24; 2 Nkumi ya dikanga 4:32-37; 13:20, 21; Luka 7:11-15; 8:41, 42, 49-56; Joani 11:38-44; Etsha 9:36-42; 20:7-12) Eolwelo ɛsɔ tshɛ, waki w’anto koko aha wa waa nyama.

Onde nyama yekɔ la anima?

Ndooko. Bible mbetshaka di’anto ndo waa nyama, wekɔ anima. (Walelo 31:28) Etena kakatongama Adama, pami ka ntondo, nde konongola anima, koko nde “akayala anima.” (Etatelo 2:7, nɔtɛ.) Anima kengama la diangɔ dihende: “ditshu dia nkɛtɛ” la “lomu la lɔsɛnɔ.”

Onde anima koka mvɔ?

Eelo. Bible mbetshaka dia anima koka mvɔ. (Akambo w’ase Lɛwi 21:11, nɔtɛ; Ɛzɛkiyɛlɛ 18:20) Etena kavɔwɔ, anto ndo waa nyama kawolaka lo ditshu. (Ondaki 3:19, 20) Vɔ shishaka lɔsɛnɔ.a

Onde nyama salaka pɛkato?

Ndooko. Nsala pɛkato nembetshiyaka nkanyiya dui dimɔtshi dia kɔlɔ kana nsala dui dimɔtshi diahɔtɔnɛ l’ɛlɛmbɛ wa Nzambi. Dia nsala pɛkato, etongami kɛmɔtshi pombaka monga la yimba, koko waa nyama bu la dikoka sɔ. Yɔ salaka akambo lo ndjela yimba ya lootɔ yele lawɔ. (2 Petero 2:12) L’ekomelo ka lɔsɛnɔ layɔ, yɔ mvɔka kaanga mbele yɔ hayosale pɛkato.

Onde Nzambi mbetawɔka dia sho nsɔkisha waa nyama?

Ndooko. Nzambi akasha anto lotshungɔ la mbahemɛ waa nyama koko aha lotshungɔ la ndjisɔkisha. (Etatelo 1:28; Osambo 8:6-8) Nzambi ndjakiyanyaka efula lo dikambo dia waa nyama oyadi kaanga tofudu tatotshitshɛ. (Jɔna 4:11; Mateo 10:29) Nde akadjangɛ ekambi ande dia salɛ waa nyama akambo lo yoho ya dimɛna.—Etombelo 23:12; Eohwelo k’Ɛlɛmbɛ 25:4; Tokedi 12:10.

Avɛsa amɔtshi wa lo Bible watɛkɛta dia waa nyama

Etatelo 1:28: “Nzambi akaatshɔkɔla [Adama la Eva] ndo Nzambi akawatɛ ate: ‘Nyootane, nyofulane, nyolodia nkɛtɛ ndo nyoyiole. Nyoole nse ya lo ndjale, ditongami diafumbɔ l’olongo ndo ditongami tshɛ diele la lɔsɛnɔ diakɛndakɛnda la nkɛtɛ.’”

Elembetshielo: Nzambi akasha anto lotshungɔ la mbolɛ waa nyama.

Walelo 31:28: “Lo kɛnɛ kendana la kɛnɛ ka mbisha . . . , kɔshi anima 1 oma lo anima 500 tshɛ w’oma le asɔlayi wakatshu lo ta, oyadi w’anto, ngɔmbɛ, mponda kana ɛkɔkɔ la mbudi.”

Elembetshielo: Anto ndo waa nyama, wekɔ anima.

Tokedi 12:10: “Onto ɔlɔlɔ kanɛka dongalonga diande.”

Elembetshielo: Ekambi wa Nzambi kokɛka waa nyama lo yoho ya dimɛna, mbidja ndo nyɛ yɛngɔla la wɔ.

Mateo 10:29: “Onde hawotosondjaka sɔlɛ 2 la okenga wa lofalanga 1 wele la nɛmɔ dia tshitshɛ? Koko ndooko 1 l’atei adiɔ lakoka nkɔ la nkɛtɛ aha la Shɛnyu lele l’olongo mbeya.”

Elembetshielo: Nzambi mɛnaka ndo ndjakiyanyaka dikambo dia waa nyama, oyadi kaanga tofudu tatotshitshɛ.

a Dia mbeya awui akina, adia tshapita 6 ya dibuku Kakɔna kakoka Bible tetsha?