Isaya 41:10—“Tokake wɔma, nɛ dia dimi lekɔ kaamɛ la yɛ”

“Tokake wɔma, nɛ dia dimi lekɔ kaamɛ la yɛ. Toyakiyanyake, nɛ dia dimi kele Nzambi kayɛ. Dimi layokokeketsha, eelo, dimi layokokimanyiya, lo mɛtɛ dimi layokokimɛ la lonya lami l’omi la losembwe.”​—Isaya 41:10, Ekadimwelo k’andja w’ oyoyo.

“Tokake wɔma, nɛ dia dimi lekɔ kaamɛ la yɛ; tɔkɔmɔke, nɛ dia dimi kele Nzambi kayɛ. Dimi layokosukɛ, eelo, dimi layokokimanyiya, dimi layokosukɛ la lonya lami l’omi la losembwe.”​—Isaya 41:10, New King James Version.

Kitshimudi ya Isaya 41:10

Jehowaa Nzambi shikikɛka atɛmɔdi ande wa kɔlamelo dia nde ayowasukɛ, oyadi ekakatanu akɔna wakoka mpomana la wɔ.

“Lekɔ kaamɛ la yɛ.” Jehowa mbishaka atɛmɔdi ande ɔkɔkɔ wahawahombe mboka wɔma, vɔ bu vwamɛ. Lam’ele nde mɛnaka ekakatanu wahomana la wɔ ndo nde pokamɛka alɔmbɛlɔ awɔ, ekɔ oko nde ekɔ suke suke la wɔ.​—Osambo 34:15; 1 Petero 3:12.

“Dimi kele Nzambi kayɛ.” Jehowa tutshaka ekambi ande asolo lo mbawohola ɔnɛ oyadi kɛnɛ kayotomba, nde ayongaka nshi tshɛ Nzambi kawɔ ndo nde mbawetawɔka oko atɛmɔdi ande. Vɔ koka monga l’eshikikelo dia ndooko kɛnɛ kakoka nshimba Jehowa dia nsala akambo lo wahɔ awɔ.​—Osambo 118:6; Rɔmɔ 8:32; Hɛbɛru 13:6.

“Dimi layokokeketsha, eelo, dimi layokokimanyiya, lo mɛtɛ dimi layokokimɛ la lonya lami l’omi la losembwe.” Jehowa ambokalolɛ lokanyi lakɔ laamɛ mbala shato lo toho totshikitanyi dia nshikikɛ ekambi ande dia nde ayowakokɛ. Jehowa kambaka la yoho ya ntɛkɛta shɔ dia mɛnya kɛnɛ kasalande etena konga ekambi ande l’ohomba w’ekimanyielo. Naka onto ɔmɔtshi ambɔkɔ, Nzambi koka mbɔlɛkɛ lonya lande l’omi dia mbonyiya.​—Isaya 41:13.

Yoho ya ntondo yakeketsha ndo yakimanyiya Nzambi ekambi ande ele lo tshimbo y’Ɔtɛkɛta ande Bible. (Jashua 1:8; Hɛbɛru 4:12) Ɛnyɛlɔ, Ɔtɛkɛta wa Nzambi mbishaka wanɛ wele l’ekakatanu ɛnyɛlɔ wola, hemɔ kana wanɛ wambovusha lakiwɔ ɔmɔtshi lokawɔ ngandji alako wa lomba. (Tokedi 2:6, 7) Ndo nto, Nzambi koka nkamba la nyuma kande k’ekila kana wolo ande wakamba olimu dia mbisha atɛmɔdi ande wolo wa lo yimba ndo wa lo tokanyi wele la wɔ ohomba dia mbikikɛ ehemba.​—Isaya 40:29; Luka 11:13.

Lo ndjela ɛtɛkɛta wodingi Isaya 41:10

Ɛtɛkɛta ɛsɔ wakakeketsha ase Juda waki la kɔlamelo wakayɔtɔlama lo lɔhɔmbɔ la Babilɔna. Jehowa akate ɔnɛ, oya l’ekomelo ka lɔhɔmbɔ l’ase Juda, anto wayoka wata ɔnɛ otunyi ɔmɔtshi ekɔ lo ndjaye dia ndjolanya wedja wakaadinge ndo wakanɛka Babilɔna. (Isaya 41:2-4; 44:1-4) Etena kakasakaka Babilɔna ndo wedja wakaadinge lokomba la wɔma lam’awakawoke nsango shɔ, ase Juda takawahombe ndjakiyanya nɛ dia Jehowa akawakokɛka. Nde akaashikikɛ mbala shato y’etondo lo mbatɛ ɔnɛ: “[Tanyo]kake wɔma.”​—Isaya 41:5, 6, 10, 13, 14.

Kaanga mbele, l’etatelo ɛtɛkɛta wa lo Isaya 41:10 wakendanaka l’ase Juda wakatɔlama lo lɔhɔmbɔ la Babilɔna, Jehowa akasale dia vɔ mombama lo Bible dia vɔ ndjokeketsha atɛmɔdi ande tshɛ. (Isaya 40:8; Rɔmɔ 15:4) Nde mbakimanyiyaka ɛlɔ kɛnɛ oko wakandakimanyiya ekambi ande lo nshi yakete.