Prezatwara yekɔ “tshondo y’esambishelo le wedja tshɛ”

Ambeta oko ɛnɔnyi dikumi, prezatwara yaso yekɔ lo nkotola yambalo y’anto. L’andja w’otondo, anto bu l’okakatanu dia mbeya prezatwara. Yɔ bu tsho amɛna, koko ekɔ ndo wɔdu nkamba la yɔ. Ondo nyayonga la kanyi ɔtɔi la kadiyɛso Asenata, lele la Pologne lakate ate: “Prezatwara bu diangɔ dia kawotake, koko yɔ yekɔ amɛna. Bu wolo nkamba la yɔ ndo ndjinya oma lo dihole dimɔtshi ko ndjitɔla otsha lo dihole dikina.”

Onde wɛ amboyambolaka woho wakakongɛma ndo wakasalema prezatwara?

Yɔ yakasalema lo yoho ya dimɛna

Lo 2001, Olui-walɔmbɔla waketawɔ dia anangɛso la akadiyɛso wa la France mpemba toho totshikitani t’esambishelo ka l’ahole wa lo sɛkɛ mbidja ndo esambishelo ka la Prezatwara. Vɔ wakahembe toho efula. Ɛnyɛlɔ, wakakambe la tovalizɛ tawɔ dia manɛ ekanda ndo caddies de courses yawɔ dia momba ekanda ekina. L’ekomelo, Filialɛ ka la France kakayɔsɔna yoho tshɔi yakakambe la wɔ l’edja k’ɛnɔnyi efula.

Anangɛso wa la France waki l’ɔngɛnɔngɛnɔ lo mɛna dia yoho yakawasɔnɛ yakonge l’etombelo w’amɛna. Ko lo 2011, Olui-walɔmbɔla waketawɔ dia esambishelo ka laande salema l’ahole wa lo sɛkɛ lo nkamba la prezatwara ndo mɛsa wanɛwɔ ekanda la New York City, Etats-Unis. Ambatshimboka wakasambisha l’etena kɛsɔ wakashihodia esadi eto dia prezatwara yekɔ la wahɔ efula, ɛnyɛlɔ woho weyɔ bu wolo minya oma lo dihole dimɔtshi ko ntɔla otsha lo dihole dikina. Ndo nto, ambatshi mboka wakasha tokanyi dia nyomɔlɔngɔsɔla woho wele prezatwara. Prezatwara ya ntondo y’abaya yakasalema ndo yaki wotsho efula, aki dui dia wolo ndjiholoya kana ndjidiya lo kibandola. Vɔ wakakanyiya dia nsala yoho kina y’oyoyo, prezatwara y’eyoyo shɔ komonga wotsho koko kokoka mɛmbama la lɔpɛpɛ. Prezatwara y’eyoyo shɔ yaki l’ekato woleki weke ya nkimanyiya dia aha yɔ ndana lo afuku. Yɔ yaki la hiole ya tshitshɛ l’emamu ya mombaka ekanda.

Prɔjɛ kɛsɔ kakonge l’etombelo w’amɛna efula! Diakɔ diele, lo 2012 Olui-walɔmbɔla waketawɔ okambelo wa la prezatwara l’andja w’otondo. Wakokana l’onto ɔmɔtshi lakasalaka prezatwara yakɔ dia nde ndjisala efula ndo nkamba la dihomɔ diele bu wotsho koko dia wolo.

L’edja k’ɛnɔnyi, wakatshikitanya yeema yoho wa nsala prezatwara. Ɛnyɛlɔ, lo 2015 wakakotsha ɛngɔ kɛmɔtshi ka ponde kahalɔwɛ mvula ndo ka hwe hwe la ntondo ka prezatwara. Dina ladjasɛ lo wodja wa Géorgie, akɛnya lowando lande l’ɔtɛ wɛngɔ kakakotshama kɛsɔ. Nde mbutaka ɔnɛ: “Kakiyanɛ, prezatwara kaya l’ɛngɔ kahalɔwɛ mvula dia nkokɛ ekanda.” Lo 2017, wakasale akatshi wa weke wele l’efundelo l’ɛtɛkɛta ɛmɔtshi. Tomasz, ɔnangɛso la la Pologne mbohɔka ɔnɛ: “ntondo aki tshondo y’okakatanu dia ntshikitanya ɛtɛ w’awui wakatamamaka lomama lo prezatwara. Kanyi ya nsala akatshi wa weke wele l’efundelo aki kanyi ya dimɛna mɛtɛ.” Lo 2019, etshikitanu ekina wakasalema lo kɛnɛ kendana la dihomɔ ndo yoho ya nsala prezatwara dia yɔ ndeka ntshikala edja.

Osalelo wa prezatwara

Onto ɔtɔi mbasala prezatwara ko yɔ ndjokahanyemaka l’atshuku anɛi wa l’andja w’otondo. Prezatwara ɔtɔi sondjamaka lo dɔlara 43, aha la mbidja falanga ya wɛmbɛlɔ ndo y’awui akina. Polo kakiyanɛ, tambokamba la falanga ndekana dɔlara miliyɔ 16 dia nsomba prezatwara ndo tambotoma prezatwara ndekana 420000 lo tshumanelo dia l’andja w’otondo.

Dia nkamba dimɛna la weshasha, sho sombaka prezatwara efula mbala ɔtɔi. Ndo nto, lo dihole dia tshumanelo nɔmba dia mbatomɛ prezatwaa y’eyoyo, ndeka dimɛna vɔ nɔmba dihomɔ dia vɔamɛ nɔngɔsɔla prezatwara yambolana yele la wɔ.

Kamba la prezatwara dia nsambisha

L’andja w’otondo, apandjudi nangaka nkamba la prezatwara. Martina ladjasɛ lo Ghana mbutaka ɔnɛ: “mbala efula etena kasambishaso, sho mbatatɛ nsawola l’anto. Koko kɛnɛ kalangami lo dikambo dia prezatwara ele, anto mbaya oya le so. Sho koka nsambisha kaanga ambetshetshi a mboka.”

Lo wodja ɔmɔtshi wa l’Afrique, pami kɛmɔtshi akasukana la prezatwara ko wakawosha ekanda wa l’ɔtɛkɛta ande. L’ɔkɔngɔ wa lomingu ɔtɔi nde akakawola ndo akate ate: “Lakadia ekanda tshɛ. Awui wele lɔkɔ wekɔ ohomba efula. Layanga ntshɔ otsha lo ngelo kaso kele tote ase nkumbo kami awui akɔ.” Ase nkumbo kande wakadjasɛka kilɔmɛtrɛ ndekana 500 mangana la lɛnɛ akinde. Ngɔndɔ hiende oma laasɔ, nde akakalola ndo akayowakɔndwɛ ate: “Ase ngelo kami wakadia ekanda tshɛ ndo kɛnɛ kakaweke oma lɔkɔ kakaangɛnyangɛnya efula. Vɔ nangaka ndjala Ɛmɛnyi wa Jehowa. Koko vɔ wekɔ la ambola. Ɛnyɛlɔ, vɔ wekɔ lo nshihodia ɔnɛ dia Batizama vɔ pombaka dindjama l’ashi. Koko ndooko ɔkɛdi wele suke la ngelo kaso. Onde sho mpombaka ndja lanɛ dia ndjombatizama?” Apandjudi wakasale dia pami kɛsɔ mɛnana la ombatshi mboka watɛkɛta ɔtɛkɛta ande. Ndo ntatɛ oma laasɔ, sawo diawɔ diekɔ lo ntetemala.

Ekɔ dui diɔngɛnɔngɛnɔ lo woho wakambaso la prezatwara dia nsambisha “lo nkɛtɛ k’otondo oko ɔmɛnyi le anto wa lo wedja tshɛ.” (Mateo 24:14) Oma lende akondjaso falanga ya nsomba prezatwara? Sho ndjikondjaka diɛsɛ la weshaha wa la lolango wakimɔso dikambo di’olimu aso wa l’andja w’otondo, weshasha ɛsɔ mbishamaka mbala la mbala lo tshimbo ya donate.jw.org. Losaka lo lokaho lanyu.