Ɔlɔngɔswɛlɔ wa Mbalasa yaso ya Diolelo

Kadiyɛso kɛmɔtshi keki dikɛnda kadjasɛ la Colombie akate ate: “Dimi nangaka Mbalasa kaso ka Diolelo! Tɔ kekɔ dihole diakokami monga kaamɛ la nkumbo kami ka lo nyuma.” Onde ndo wɛ ndjaokaka ngasɔ?

L’andja w’otondo, Ɛmɛnyi wa Jehowa sanganaka lo Mbalasa ya Diolelo oko 63 000. Yɔ yekɔ ahole w’amɛna wa ntɛmɔla Nzambi. Koko yɔ hakimanyiya tsho di’ɔtɛmwɛlɔ. Ombatshi mboka ɔmɔtshi wadjasɛ la Colombie welɛwɔ David mbutaka ate: “Mbalasa kaso ka Diolelo mbishaka wetshelo aso nɛmɔ di’efula. Anto efula wɔtɔ lɔkɔ mambaka lo mɛna welo wadjaso dia kilama lo yoho ya dimɛna.” Aha ɔnɛ tɔamɛ mbayaetɛ olangala. Sho kambaka wolo dia mɔmbaka ndo nɔngɔsɔlaka Mbalasa yaso ya Diolelo. Ko ngande wasalema awui asɔ?

Ngande wakongɛma ɔlɔngɔswɛlɔ wa Mbalasa?

Tshumanelo diasangana lo Mbalasa ka Diolelo mbele la ɔkɛndɛ wa kilɔngɔsɔlaka. Diakɔ diele, anangɛso l’akadiyɛso mɔmbaka Mbalasa ka Diolelo mbala la mbala. Vɔ salaka ɛlɔngɔswɛlɔ wa totshitshɛ diaha tɔ ndjoleka ndana.

Dia nkimanyiya tshumamelo dia nɔngɔsɔlaka Mbalasa yawɔ ya Diolelo, departɛma dia wokelo (LDC) tomaka anangɛso amɔtshi washana olowanyelo wendana l’ɔlɔngɔswɛlɔ wa Mbalasa. Ɔnangɛso tshɛ lakasɔnama dia mbisha olowanyelo, ndjashaka dia ndowanya anto lo Mbalasa ya Diolelo shamalo kana dikumi. Nde mbaembolaka ndo mbalowanyaka lo woho wakokawɔ nkokɛ Mbalasa yawɔ ya Diolelo. L’ɔkɔngɔ w’ɛnɔnyi esato tshɛ, nde sɛdingolaka Mbalasa ya Diolelo tshɛ ndo mbisholaka ahole wahomba nɔngɔsɔma dimɛna.

Anangɛso la akadiyɛso ngɛnangɛnaka olowanyelo walongolawɔ oma le anangɛso waalowanya. Kadiyɛso kɛmɔtshi kelɛwɔ Indhumathi kadjasɛ la Inde mbutaka ate: “Olowanyelo wekɔ dimɛna efula. Ekɔ dui di’ɔngɛnɔngɛnɔ mbeka woho wa nkokɛ Mbalasa yaso ya Diolelo lo yoho ya dimɛna.” Evans, ɔnangɛso ɔmɔtshi ladjasɛ la Kenya mbutaka ate: “Takangɛnangɛna efula mbeka woho wa nɔngɔsɔla ahole wa totshitshɛ la ntondo ka ndjokoma l’akambo wa weke ndo wayɔlɔmba falanga efula.”

Falanga yakamba laso

Falanga yatshɔ ɔnɔnyi tshɛ dia nkokɛ Mbakasa ka Diolelo koka nkoma adɔlara oma lo nkama polo lo nunu,a nemanɛka la dihole diele Mbalasa kakɔ, lofulo l’ɛnɔnyi wambowokika ndo lofulo la tshumanelo diɔtɔ lɔkɔ. Oma lende aya falanga shɔ?

Weshasha wa la lolango mbakimanyiya dia nɔngɔsɔlaka Mbalasa ya Diolelo. Alexander, ɔnangɛso ɔmɔtshi ladjasɛ la Kazakhstan mbutaka ate: “Falanga mɔtshi kimanyiyaka dia kɔhama l’Ɛtɛrnɛtɛ ndo l’awui akina wele oko ashi ndo kura. Falanga nkina ekɔ dikambo di’ehomba ekina wele oko, akatshi wa nkomba, ga y’anya, diangɔ di’osolelo ndo mukubu.” Weshasha ekina kimanyiyaka dia nsukɛ olimu wakambema l’andja w’otondo ndo nkimanyiyaka wa prɔjɛ ya weke yendana l’ɔlɔngɔswɛlɔ wasalema l’andja w’otondo.

Prɔjɛ ya weke y’ɔlɔngɔswɛlɔ

Naka ɔlɔngɔswɛlɔ wa Mbalasa ka Diolelo wayɔsa ngɔndɔ hiende kana shato, kete dikumanyi wayosawola la wanɛ washa olowanyelo lo Departɛma dia wokelo (LDC). Naka LDC ambetawɔ prɔjɛ kɛsɔ, kete falanga shɔ yayoya oma lo weshasha wakimɔma di’olimu wa l’andja w’otondo. L’ɔnɔnyi w’olimu wa 2023, prɔjɛ 8 793 yakashile ndo yɔ yakɔshi falanga adɔlara miliyɔ 76,6. Tende prɔjɛ hiende l’atei wa wa prɔjɛ shɔ.

Lo wodja w’Angola, Mbalasa kɛmɔtshi kakakama ambeta ɛnɔnyi 15 kaki l’ahole efula wa nɔngɔsɔla. Diangɔ diendana la kura diakawadje lɔkɔ diakakome emusu ndo akahombe mbidja dikina, mpele diakonge l’ɛlɔngɛ ndo asukanyi wakate di’ashi w’oma lɔkɔ wekɔ lo nkoma lo mvudu yawɔ. Departɛma dia wokelo (LDC) diakakongɛ dia nɔngɔsɔla awui asɔ. Wakakambe la falanga oko adɔlara 9 285 dia kimana. Asukanyi wakangɛnangɛna efula ndo wakaambe woho wakasalema olimu.

Lo wodja wa Pologne, Mbalasa kɛmɔtshi ka Diolelo kakaselaka ndo nsambe k’otondo akalana woho wahakoke kilɔngɔsɔla nto. Departɛma dia wokelo (LDC) diaketawɔ dia mbidja anyandja ndo nsambe kekina. Olimu ɔsɔ akalɔmbɛ adɔlara 9 757. Etombelo wele la dui sɔ ele, ɛlɔngɔswɛlɔ wa weke lo Mbalasa ka Diolelo kɛso hatosalema l’edja k’ɛnɔnyi ɛmɔtshi.

Ɔlɔngɔswɛlɔ watombola Jehowa

Ɔlɔngɔswɛlɔ wa Mbalasa hakimanyiya tsho dia nkamba dimɛna la falanga, koko mbishaka ndo Jehowa lotombo. Ɔnangɛso Shaun, ladjasɛ la Tonga mbutaka ate: “L’ɔtɛ w’olimu w’ɔlɔngɔswɛlɔ wa wokelo wasalema, sho koka ntɛmɔla Jehowa lo dihole dia pudipudi, dia kiɔmba ndo lo Mbalasa ka Diolelo ka dimɛna kakonya anto wa lo dihole dietɔ dia nkanyiya dia lokombo la Jehowa. Hatoke sɔnyi mbelɛ anto lo Mbalsa ka Diolelo.”

Ngande wakokayɛ nkimanyiya?

Sho tshɛ koka nkimanyiya dia mɔmbaka ndo nɔngɔsɔlaka dihole diaso di’ɔtɛmwɛlɔ. Ɔnangɛso ɔmɔtshi lelɛwɔ Marino lasha olowanyelo ladjashɛ l’Australie mbutaka ate: “Sho tshɛ koka mbisha lonya l’ɔkɛndɛ wa dimɛna wendana l’ɔlɔngɔswɛlɔ wa Mbalasa yaso ya Diolelo. Etena kasalaso dui sɔ, sho kimanyiyaka dia nkamba la falanga lo yoho ya dimɛna ndo kimanyiyaka dia vɔ nkamba layɔ lɛnɛ oleki ohomba.”

Ɔnangɛso Joel ladjasɛ la Inde, ngɛnangɛnaka nɔngɔsɔla Mbalasa kawɔ dia Diolelo. Nde mbutaka ate: “Nkamba kaamɛ l’anangɛso, kimanyiyakami dia ndɛta woho wayototokambaka l’andja w’oyoyo.” Nicole, lakatatɛkɛtshi la diko mbutaka ate: “Atete edja, lakakimanyiya dia mɔmba odihe etena kakalɔngɔsɔlaka anangɛso lɛnɛ akaselaka. Kaanga kele aha dimi mbakalɔngɔsɔla dihole sɔ, dimi mbeyaka dia lakakimanyiya dia mbewɔ aksida.”

Naka wɛ nangaka ndjakimɔ la lolango dia nɔngɔsɔlaka Mbasala kanyu ka Diolelo, kete nsawola la dikumanyi. Ndo nto, weshasha wa la lolango wakimɔyɛ kimanyiyaka aha tsho dia nɔngɔsɔla Mbalasa kanyu ka Diolelo, koko ndo Mbalasa kina ya Diolelo ya l’andja w’otondo. Wɛ koka mbidja weshasha ɛsɔ lo tɔshɛtɛshɛtɛ tele lo Mbalasa ka Diolelo kana lo donate.jw.org. Lokaho layɛ, tɔngɛnyangɛnyaka efula.