Lushi l’ɔtɔi, Ngɔndɔ ka divwa 1
Osase wa wonya wahɛta la pindju. —Luka 1:78.
Nzambi akasha Yeso wolo wa nkandola ekakatanu tshɛ w’anto. Lo tshimbo y’ahindo ande, Yeso akɛnya wolo ande dia nde koka nshidiya ekakatanu tshɛ weso hatokokaki nshidiya la wolo aso hita. Ɛnyɛlɔ, nde ekɔ la wolo wa totshungola oma lo kɛnɛ kele lo kiɔkɔ y’ekakatanu w’anto, mbuta ate pɛkato kakatahowɔ ndo etombelo w’oma lɔkɔ, hemɔ ndo nyɔi. (Mat. 9:1-6; Rɔmɔ 5:12, 18, 19) Ahindo ande wakɛnya dia nde koka nkɔnɔla weho tshɛ wa hemɔ ndo kaanga mbolola edo. (Mat. 4:23; Jni. 11:43, 44) Ndo nto, nde aki la wolo wa mbɔladia lɔpɛpɛ la wolo ndo ntshungola anto oma le nyuma ya kɔlɔ. (Makɔ 4:37-39; Luka 8:2) Ande eshikikelo kele la so lo dui sɔ dia mbeya dia Jehowa akakitsha wolo ɔsɔ l’anya w’Ɔnande! Sho koka monga l’eshikikelo dia ɛtshɔkɔ wa lo nshi yayaye wa l’ɛse k’ɛlɔmbwɛlɔ ka Diolelo dia Nzambi wayokotshama mɛtɛ. Ahindo wakasale Yeso lam’akinde la nkɛtɛ oko onto tetshaka dia nde ayosala ahindo asɔ lo nkɛtɛ k’otondo, nɛ dia nde ekɔ Nkumekanga ka Diolelo dia Nzambi. w23.04 3 od. 5-7
Lushi la hende, Ngɔndɔ ka divwa 2
Nyuma nyangiayangiaka akambo tshɛ, kaanga akambo wa lotshimola waki Nzambi.—1 Kɔr. 2:10.
Naka wɛ ekɔ lo mbɔtɔ l’etshumanelo kele l‘apandjudi efula, ndo wɛ ndjoyaokaka dia wɛ kemɛka anya mbala efula dia nkadimola ko hawokosha ɔtɛkɛta. Wɛ koka ndjɔkɔ lo djonga ya mpekɔ mbisha kɔmatɛrɛ. Koko totshikake dia mbisha kɔmatɛrɛ. Lɔngɔsɔlaka kɔmatɛrɛ efula l’oseka losanganya tshɛ. Oma laasɔ, naka hawokɔsɔnyi dia mbisha kɔmatɛrɛ oma l’etatelo ka wekelo, kete wɛ ayonga la waaso akina wa nkadimola etena katatetemala losanganya. Etena kalɔngɔsɔlayɛ wekelo wa Tshoto y’Etangelo, nkanyiya woho wɔtɔnɛ odingɔ tshɛ la lokanyi lele ohomba la l’ɔtɛ wa sawo. Naka wɛ nsala ngasɔ, kete ondo wɛ ayonga la yangɔ kina yayoyokoka nkahana l’anto akina. Ndo nto, wɛ koka ndjalɔngɔsɔla dia mbisha kɔmatɛrɛ lo edingɔ wele l’awui wa mɛtɛ wa lotshimola wele wolo efula mbalembetshiya. Lande na? Nɛ dia l’edingɔ ɛsɔ anto yema tshitshɛ ato mbemɛ anya dia mbisha kɔmatɛrɛ. Ko ayoyosala naka wɛ ambɛna dia nsanganya efula yambeta aha la wɛ nkondja diaaso dia mbisha kɔmatɛrɛ? Tɛ ɔnɔmbɔdi la ntondo ka losanganya dimbola diakɔna diayoyolanga nkadimola. w23.04 21-22 od. 9-10
Lushi la sato, Ngɔndɔ ka divwa 3
Yɔsɛfu . . . akasale akambo oko wakawotɛ ondjelo wa Jehowa ndo akɔshi wadɛnde lakande.—Mat. 1:24.
Yɔsɛfu aki suke dia nkamba l’ɛlɔmbwɛlɔ ka Jehowa ndo kɛsɔ akawetɛ omi l’oshika. Lo waaso oko esato, nde akalongola ɛlɔmbwɛlɔ k’oma le Nzambi lo kɛnɛ kendana la nkumbo kande. Tena tshɛ, nde akakitanyiyaka aha la ntshimbatshimba, kaanga mbele dui sɔ diakalɔmbaka dia nsala etshikitanu wa weke. (Mat. 1:20; 2:13-15, 19-21) Lo ndjela ɛlɔmbwɛlɔ ka Nzambi, Yɔsɛfu akakokɛ Mariya, akosukɛ ndo akokotshɛka ehomba ande. Ohokanyi woho wele awui wakasalaka Yɔsɛfu wakakonya Mariya dia mboolanga ndo mbɔɔlɛmiya efula! Waomi lee, nyu koka mbokoya Yɔsɛfu lo nyangaka alako oma lo Bible dia mbeya woho wakokanyu nkokɛ nkumbo yanyu. Etena kakitanyiyanyu dako nɛ, kaanga mbakoka dui sɔ nɔmba dia nsala etshikitanu, nyu mɛnyaka wadɛnyu ngandji ndo nyu keketshaka diwala dianyu. Kadiyɛso kɛmɔ kadjasɛ la Vanuatu, lambotshukana l’edja kolekanyi ɛnɔnyi 20 mbutaka ɔnɛ: “Etena kayanga omɛmi ndo kakambande l’ɛlɔmbwɛlɔ ka Jehowa, dimi ndekaka mbɔlɛmiya efula. Dimi ndjaokaka l’ekokelo ndo dimi mongaka l’eshikikelo lo tɛdikɔ tɔsande.” w23.05 21 od. 5