Oyadi sho kongaka la nsaki kana koyashimbaka awui amɔ, tayotetemalaka monga la nshi ya kɔlɔ. Ɛnyɛlɔ, “awui wa shashimoya” koka tolelɛ wenya weso la wɔ ohomba dia nkotsha oyango aso. (Ond. 9:11) Sho koka mpomana l’okakatanu wakoka tɔkɔmɔla ndo toshishɛ wolo. (Tok. 24:10) Demba diaso diele bu kokele, koka tokonya dia nsala akambo wahatokimanyiya dia nkotsha oyango aso. (Rɔmɔ 7:23) Kana sho koka ndjaoka tsho dia tambɔkɔmɔ. (Mat. 26:43) Kakɔna kakoka tokimanyiya dia ntondoya nshi ya kɔlɔ shɔ? Ohɔ diaha naka wɛ ambohomana la nshi ya kɔlɔ kete wɛ ambokita tatala. Bible mbutaka dia sho koka mpomana l’ekakatanu mbala la mbala. Koko, tɔ mbutaka nto dia sho koka mbatondoya. Eelo, lo ntetemala ntshɔ otsha la ntondo kaanga lo nshi ya kɔlɔ, wɛ mɛnyaka Jehowa dia wɛ nangaka mbɔngɛnyangɛnya. Jehowa pombaka mɛtɛ monga l’ɔngɛnɔngɛnɔ etena kakɛnande atetemala mbidja welo dia nkotsha oyango ayɛ! w23.05 30 od. 14-15

Olimu w’ombatshi mboka kimanyiyaka ɔlɔngɔlɔngɔ dia mbeka woho wa nkamba olimu dimɛna l’anto wele la waonga wotshikitanyi. Vɔ mbokimanyiyaka nto dia nkamba la lomba la falanga yakondjande ndo diaha nde ndjitshupaka otshupatshupa. (Flpɛ. 4:​11-13) Yoho ya dimɛna ya ntatɛ olimu wa lo tena tshɛ ele, mbɔsa olimu w’ombatshi mboka wa tshanda ndo dui sɔ kimanyiyaka onto ɔmɔ dia monga suke dia ndjokamba oko ombatshi mboka wa pondjo. Olimu w’ombatshi mboka wa pondjo koka ndjokokonya lo weho ekina w’elimu wa lo ntena tshɛ, oko olimu wa lo wokelo kana wa lo Bɛtɛlɛ. Akristo w’apami pombaka ndjadjɛ oyango wa nkotsha kɛnɛ kalɔmbama dia kambɛ anangɛwɔ l’akadiyɛwɔ oko dikumanyi dia l’etshumanelo. Bible mbutaka di’apami wakombola diɛsɛ sɔ “[w]ekɔ lo nkombola olimu w’ɔlɔlɔ.” (1 Tim. 3:1) Ntondotondo, ɔnangɛso pombaka nkotsha kɛnɛ kalɔmbama dia nkamba oko okambi wakimanyiya. Ekambi wakimanyiya kimanyiyaka dikumanyi lo toho efula t’ohomba. Oyadi dikumanyi kana ekambi wakimanyiya, vɔ tshɛ kambɛka anangɛwɔ l’akadiyɛwɔ l’okitshakitsha tshɛ ndo vɔ mongaka l’ohetoheto l’esambishelo. w23.12 28 od. 14-16

Nkumekanga Jɔsiya akatatɛ nyanga Jehowa etena kakinde l’ɛnɔnyi 16. Nde akalangaka mbeka awui wendana la Jehowa ndo nsala lolango Lande. Koko, lɔsɛnɔ komonga wɔdu le nkumekanga ka dikɛnda kɛsɔ. Nde akahombe mamɛ ɔtɛmwɛlɔ wa pudipudi etena kakadiangana ɔtɛmwɛlɔ wa kashi. Ndo kɛsɔ akalɔmbaka dia nde monga la dihonga. La ntondo ka Jɔsiya nkotsha ɛnɔnyi 20, nde akatatɛ minya ɔtɛmwɛlɔ wa kashi oma lo wodja. (2 Ɛk. 34:​1, 2) Oyadi wɛ eke dikɛnda di’efula, wɛ koka mbɔsa yɛdikɔ ya mbokoya Jɔsiya lo nyanga Jehowa ndo mbeka waonga Ande wa diambo. Etena kayoyosala awui asɔ, wɛ ayɔngɛnangɛna dia ndjakimɔ le nde. Ko shɛngiya yakɔna yayonga la dui sɔ lo lɔsɛnɔ layɛ la lushi la lushi? Luke, lakabatizama l’ɛnɔnyi 14 mbutaka ate: “Oma l’etena kɛnɛ, dimi letsha olimu wa Jehowa lo dihole dia ntondo lo lɔsɛnɔ lami ndo losala la wolo dia mbɔɔngɛnyangɛnya.” (Makɔ 12:30) Ande ɛtshɔkɔ wayoyokondja naka wɛ monga la nsaki ka nsala woho akɔ waamɛ lee! w23.09 11 od. 12-13