2 Nkumi ya dikanga

23 Ɔnkɔnɛ nkumekanga akatome dui, ko wakasanganya dikumanyi tshɛ dia la Juda ndo dia la Jɛrusalɛma.+ 2 L’ɔkɔngɔ wa laasɔ, nkumekanga akatshu lo luudu la Jehowa kaamɛ l’apami tshɛ w’ase Juda ndo ase Jɛrusalɛma tshɛ, ɛlɔmbɛdi ndo amvutshi, mbuta ate anto tshɛ, oyadi akɛnda kana epalanga. Nde akadia awui tshɛ wa lo dibuku+ dia sheke+ diakawashola lo luudu la Jehowa+ lo atoyi awɔ. 3 Nkumekanga akemala l’omamu w’ekundji ndo akadje sheke* la ntondo ka Jehowa+ dia nde ayoyelaka Jehowa ndo ayokitanyiyaka ɛlɛmbɛ ande, waohwelo ande ndo wadjango ande la otema ande tshɛ ndo la anima* ande tshɛ lo nkitanyiya ɛtɛkɛta wa lo sheke wakafundama lo dibuku diakɔ. Ko anto tshɛ waketawɔ sheke+ yakɔ.

4 Oma laasɔ, nkumekanga akadjangɛ Hilikiya+ ɔlɔmbɛdi a laadiko, ɛlɔmbɛdi a lo dihole dia 2 ndo alami w’asoko dia vɔ totondja diangɔ tshɛ diakasalema dikambo dia Baala, dikambo dia kimɛta ka l’osongo*+ ndo dikambo dia alembe tshɛ wa l’olongo oma lo tɛmpɛlɔ ka Jehowa. Oma laasɔ, nde akaditshumbe l’andja wa Jɛrusalɛma lo ebondo washimba menga wa Kidirɔna, ko nde akatɔlɛ otoko adiɔ la Bɛtɛlɛ.+ 5 Ɔnkɔnɛ, nde akanya ɛlɔmbɛdi wa tozambizambi t’angɛndangɛnda wanɛ wakasɔnama oma le nkumi ya dikanga ya Juda dia tshumbaka elambo lo ahole wa la diko lo esomba wa la Juda ndo lo emamu wa Jɛrusalɛma, kaamɛ ndo wanɛ wakatshumbaka elambo dikambo dia Baala, dikambo dia wonya, dikambo dia ngɔndɔ, dikambo dia elui wa tɔɔtɔ wa zodiakɛ ndo dikambo dia alembe tshɛ wa l’olongo.+ 6 Nde akatondja kimɛta ka l’osongo*+ oma lo luudu la Jehowa otsha l’omamu wa Jɛrusalɛma lo Okidi wa Kidirɔna, ko nde akatokitshumba+ lo Okidi wa Kidirɔna, akalietɛ otoko oto ndo akahandjola otoko alɔ lo waombo w’anto ko anto.+ 7 Ndo nto, nde akanyukola mvudu ya numba y’apami ya lo tɛmpɛlɔ+ yaki lo luudu la Jehowa ndo lɛkɔ mbakasalaka wamato apɛma w’ɔtɛmwɛlɔ dikambo dia kimɛta ka l’osongo.*

8 Oma laasɔ, nde akela ɛlɔmbɛdi tshɛ oma l’esomba wa la Juda ndo nde aketɛ ahole wa la diko wakatshumbaka ɛlɔmbɛdi elambo oma la Ngɛba+ polo la Bɛrɛ-Shɛba+ ahole wahasungana salema ɔtɛmwɛlɔ. Ndo nto, nde akatola ahole wa la diko waki lo asoko wa lo mbɔtwɛlɔ ka la soko dia Jashua owandji w’osomba, waki lo lonya la lɔmɔsɔ laki onto latɔtɔ lo soko dia osomba akɔ. 9 Ɛlɔmbɛdi wa lo ahole wa la diko kokambaka lo elambwelo ka Jehowa ka la Jɛrusalɛma,+ koko wakalɛka mapa waha la wodoya kaamɛ l’anangɛwɔ. 10 Nde aketɛ ndo Tɔfɛta*+ tele lo Okidi wa Ana wa Hinɔmɛ*+ dihole diahakoke salema ɔtɛmwɛlɔ, diaha onto tshumbɛ Mɔlɛka+ ɔnande la pami kana la womoto. 11 Ndo nde akashimbe diaha mfalasa yakakimɔ nkumi ya dikanga ya Juda dikambo dia wonya mbɔtɔ lo luudu la Jehowa oma lo luudu la ndala* la ɔnɛnɛ Natana-Mɛlɛkɛ laki lo dɛfu ndo nde akatshumbe pusupusu ya wonya+ lo dja. 12 Ndo nto, nkumekanga akatola dilambwelo diakasale nkumi ya dikanga ya Juda lo dɛfu+ dia luudu la ndala la la diko laki Ahaza kaamɛ ndo dilambwelo diakasale Manase lo asɛkɛ 2 wa luudu la Jehowa.+ Nde akaatɛtshatɛtsha ndo akahandjola efushi awɔ lo Okidi wa Kidirɔna. 13 Ahole wa la diko wɛlane la Jɛrusalɛma waki lo sidɛ* ka Dikona di’Elanyelo* wakasale Sɔlɔmɔna nkumekanga k’Isariyɛlɛ dikambo dia Ashitɔrɛtɛ, jambizambi ya womoto ya nyɛtɛɛtɛ y’ase Sidɔna; dikambo dia Kɛmɔshɛ, jambizambi ya nyɛtɛɛtɛ y’ase Mɔaba, ndo dikambo dia Milikɔmɛ,+ jambizambi ya wɔnɔnyi y’ase Amɔna,+ nkumekanga akawaetɛ ahole wahasungana salema ɔtɛmwɛlɔ. 14 Nde akaatshatsha dimɛta dia l’ave, akahendjahendja dimɛta dia l’esongo*+ ndo akalodia weka w’anto lo ahole awɔ. 15 Ndo nto, nde akahandjola elambwelo ka la Bɛtɛlɛ, dihole dia la diko diakasale Jɛrɔbɔama ɔna Nebatɛ diakakonya ase Isariyɛlɛ dia nsala pɛkato.+ L’ɔkɔngɔ wa nde mpandjola elambwelo kakɔ ndo dihole dia la diko, nde akatshumbe dihole dia la diko, akadietɛ otoko oto ndo akatshumbe kimɛta ka l’osongo.*+

16 Lam’akɛwɔ Jɔsiya ndo lam’akandɛnyi waombo lo dikona, nde akɔshi weka waki lo waombo akɔ, ko akatshumbe lo elambwelo ndo akakietɛ ɛngɔ kahayosungana la ɔtɛmwɛlɔ, lo ndjela ɔtɛkɛta wa Jehowa wakandewoya lo tshimbo y’okambi wa Nzambi ka mɛtɛ wakatatshi dia awui asɔ wakahombe salema.+ 17 Oma laasɔ, nde akate ate: “Diombo dia dive diakɔna diɛnami lengo?” Ko ase osomba wakawotɛ vate: “Ongo ekɔ diombo dia okambi wa Nzambi ka mɛtɛ w’oma la Juda+ wakatatshi akambo anɛ wamboyosalɛ elambwelo ka la Bɛtɛlɛ.” 18 Ko nde akate ate: “Nyootshike omuya. Onto atofukutanyake weka ande.” Ko vɔ wakatshike weka ande aha la mbafukutanya, kaamɛ ndo weka w’omvutshi wakaye oma la Samariya.+

19 Ndo nto, Jɔsiya akanya mvudu y’ɔtɛmwɛlɔ tshɛ ya lo ahole wa la diko waki lo esomba wa la Samariya+ wakataki nkumi ya dikanga y’Isariyɛlɛ dia mbokiya Nzambi nkɛlɛ, ndo nde akasale la yɔ woho wakandasale la nyɛ ya la Bɛtɛlɛ.+ 20 Ko nde akalambola ɛlɔmbɛdi tshɛ wa lo ahole wa la diko waki lɛkɔ lo dilambwelo, ndo nde akatshumbe weka w’anto lɔkɔ.+ L’ɔkɔngɔ wa laasɔ, nde akakalola la Jɛrusalɛma.

21 Oma laasɔ, nkumekanga akadjangɛ anto tshɛ ate: “Nyosale Fɛtɛ k’Elekanelo+ dikambo dia Jehowa Nzambi kanyu oko wofundamidiɔ lo dibuku nɛ dia sheke.”+ 22 Ndooko Fɛtɛ k’Elekanelo kakasalema ngasɔ ntatɛ lo nshi yakalomboshaka toshushi lo Isariyɛlɛ kana lo nshi tshɛ yakolɛka nkumi ya dikanga y’Isariyɛlɛ ndo nkumi ya dikanga ya Juda.+ 23 Paka l’ɔnɔnyi wa 18 w’ɛlɔmbwɛlɔ ka nkumekanga Jɔsiya mbakasalema Dambo di’Elekanelo sɔ la Jɛrusalɛma dikambo dia Jehowa.

24 Laadiko dia laasɔ, Jɔsiya akanya wanɛ watɛkɛtsha dimu, waa wetshi,+ mpingu ya terafimɛ,*+ dikishi dia nyɛtɛɛtɛ* ndo diangɔ tshɛ dia nyɛtɛɛtɛ diakatanemaka l’ɛtshi ka nkɛtɛ ka Juda ndo la Jɛrusalɛma dia nkotsha ɛtɛkɛta wa lo Ɛlɛmbɛ+ wakafundama lo dibuku diakashola ɔlɔmbɛdi Hilikiya lo luudu la Jehowa.+ 25 Ndooko nkumekanga kaki oko nde la ntondo kande kakakalolɛ Jehowa la otema ande tshɛ ndo la anima*+ ande tshɛ ndo la wolo ande tshɛ lo ndjela Ɛlɛmbɛ tshɛ wa Mɔsɛ, ndo ndooko onto lakayonga oko nde l’ɔkɔngɔ ande.

26 Koko Jehowa kotshika nkɛlɛ kande kadɔdɔ kakandomalɛ ase Juda l’ɔtɛ w’akambo wa kɔlɔ tshɛ wakasale Manase dia mbookiya nkɛlɛ.+ 27 Jehowa akate ate: “Dimi layonya ndo Juda oma lo washo ami+ oko wakamanya Isariyɛlɛ,+ ndo dimi layɔsɛka Jɛrusalɛma, osomba ɔnɛ wakamasɔnɛ ndo luudu lakamate dikambo dialɔ nte: ‘Lokombo lami layongaka laawɔ.’”+

28 Lo kɛnɛ kendana l’etenyi kekina k’ɔkɔndɔ wa Jɔsiya ndo kɛnɛ tshɛ kakandasale, shi awui asɔ fundama lo dibuku di’ɔkɔndɔ wa tena dia nkumi ya dikanga ya Juda? 29 Lo nshi yande, Farawɔ Neko nkumekanga k’Edjibito akatshu dia tohomana la nkumekanga k’Asuriya suke la Ɔkɛdi w’Efaratɛ, ko nkumekanga Jɔsiya akatshu dia tɔɔlɔsha; koko kam’akawɛnyi Neko, nde akoodiake la Mengido.+ 30 Ɔnkɔnɛ ekambi ande wakɛmbɛ odo ande lo pusupusu oma la Mengido ndo wakɔɔtɔlɛ la Jɛrusalɛma, ko wakatookundɛ lo diombo diande. Oma laasɔ, anto wa lo wodja wakɔshi Jɛhɔahaza ɔna Jɔsiya, wakookite esɔ ndo wakawetɛ nkumekanga lo dihole dia she.+

31 Jɛhɔahaza+ aki l’ɛnɔnyi 23 lam’akandayala nkumekanga ndo nde akolɛ l’edja ka ngɔndɔ 3 la Jɛrusalɛma. Nyango lokombo lande Hamutala,+ ɔna Jɛrɛmiya ose Libina. 32 Nde akatatɛ nsala kɛnɛ kaki kɔlɔ lo washo wa Jehowa lo ndjela kɛnɛ tshɛ kakasale watshɛnde.+ 33 Farawɔ Neko+ akawodje lo lokanu la Ribila+ lo ɛtshi ka nkɛtɛ ka Hamatɛ dia mboshimba diaha nde mbolɛ la Jɛrusalɛma; ndo oma laasɔ, nde akahike dia wodja nkimɔ kibawo ka talata* 100 ya mfɛsa ndo lotalata la paonyi.+ 34 Ndo nto, Farawɔ Neko aketɛ Eliyakima ɔna Jɔsiya nkumekanga lo dihole dia Jɔsiya ya she ndo akatshikitanya lokombo lande, ko akawɔlɛ Jɛhɔyakima. Koko nde akɔshi Jɛhɔahaza ko akɔɔtɔlɛ l’Edjibito+ lɛnɛ akandatovɔ.+ 35 Jɛhɔyakima akasha Farawɔ mfɛsa ndo paonyi, koko nde akadjangɛ wodja dia vɔ kimɔka mfɛsa yakalɔmbɛ Farawɔ. Nde akashikikɛ lofulo la mfɛsa ndo la paonyi lakahombaka onto tshɛ la lo wodja mbisha Farawɔ Neko.

36 Jɛhɔyakima+ aki l’ɛnɔnyi 25 lam’akandayala nkumekanga ndo nde akolɛ l’edja k’ɛnɔnyi 11 la Jɛrusalɛma.+ Nyango lokombo lande Zebida, ɔna Pedaya ose Ruma. 37 Nde akatetemala nsala kɛnɛ kaki kɔlɔ lo washo wa Jehowa+ lo ndjela kɛnɛ tshɛ kakasale watshɛnde.+