1 Samuɛlɛ

5 Lam’akɔshi ase Filistiya Ɔshɛtɛ+ wa Nzambi ka mɛtɛ, vɔ wakamɔ la wɔ oma la Ebɛnɛzɛrɛ ko wakatshu la wɔ la Ashidɔdɛ. 2 Ase Filistiya wakɔshi Ɔshɛtɛ wa Nzambi ka mɛtɛ, ko wakawodje lo luudu* la Dangɔna ndo wakookitsha l’omamu wa Dangɔna.+ 3 La wedi a pindju, lam’akemɔ ase Ashidɔdɛ, vɔ wakatane Dangɔna akakwɛ ekukumadi la ntondo k’Ɔshɛtɛ wa Jehowa.+ Ko vɔ wakonyiya Dangɔna ndo wakookitsha lo dihole+ diande. 4 Lam’akawemɔ nto la pindju ka lushi lakayele, vɔ wakatane Dangɔna akakwɛ ekukumadi la ntondo k’Ɔshɛtɛ wa Jehowa. Ɔtɛ wa Dangɔna ndo awambo w’anya akɔ 2 wakahembwe ndo wokalemi l’odihe. Paka etenyi kele oko lose* mbakatshikala otondo. 5 Diakɔ diele ɛlɔmbɛdi wa Dangɔna ndo wanɛ tshɛ wɔtɔ lo luudu la Dangɔna hawokamɛ odihe wa Dangɔna wele lo Ashidɔdɛ polo ndo ɛlɔ.

6 Lonya la Jehowa lakalɔsha ase Ashidɔdɛ wolo ndo nde akaalanya lo ntatsha ase Ashidɔdɛ la bɛtshi diawɔ dia nkɛtɛ hemɔ ka kasadi.+ 7 Lam’akɛnyi ase Ashidɔdɛ kɛnɛ kakasalemaka, vɔ wakate vate: “Aha sho mbetawɔ dia Ɔshɛtɛ wa Nzambi k’Isariyɛlɛ ntshikala kaamɛ la so, nɛ dia lonya lande lekɔ lo tɔlɔsha wolo sho la nzambi kaso Dangɔna.” 8 Ko vɔ wakatome dui ndo wakatshumanya nkumi tshɛ y’ase Filistiya ko wakawambola vate: “Ahombaso nsala la Ɔshɛtɛ wa Nzambi k’Isariyɛlɛ?” Vɔ wakakadimola vate: “Tɔtɔlɛ Ɔshɛtɛ wa Nzambi k’Isariyɛlɛ la Ngata.”+ Ɔnkɔnɛ, vɔ wakatɔlɛ Ɔshɛtɛ wa Nzambi k’Isariyɛlɛ lɛkɔ.

9 L’ɔkɔngɔ wa vɔ mbɔtɔla lɛkɔ, lonya la Jehowa lakalɔsha osomba akɔ, ko dui sɔ diakawaokiya wɔma w’efula. Nde akadiake ase osomba akɔ, oyadi akɛnda kana epalanga ndo wakadiɛnɛ+ la hemɔ ka kasadi. 10 Ɔnkɔnɛ, vɔ wakatome Ɔshɛtɛ wa Nzambi ka mɛtɛ la Ɛkɛrɔna,+ koko kam’akakome Ɔshɛtɛ wa Nzambi ka mɛtɛ la Ɛkɛrɔna, ase Ɛkɛrɔna wakatatɛ mbida ekoko vate: “Wambotela Ɔshɛtɛ wa Nzambi k’Isariyɛlɛ dia ndjotodiaka+ sho l’anto aso!” 11 Ko vɔ wakatome dui ndo wakasanganya nkumi tshɛ y’ase Filistiya ndo wakate vate: “Nyonya Ɔshɛtɛ wa Nzambi k’Isariyɛlɛ; nyowokaloya lo dihole diawɔ diaha sho l’anto aso ndjovɔ.” Nɛ dia wɔma wa nyɔi wakahandjɔnɛ l’osomba w’otondo. Lonya la Nzambi ka mɛtɛ lakalɔshaka wolo lɛkɔ,+ 12 ndo anto waki komvɔ wakandama la hemɔ ka kasadi. Delo diakalelaka ase osomba ekimanyielo diakadɛ polo l’olongo.