Ɛzɛkiyɛlɛ
30 Ɔtɛkɛta wa Jehowa wakaye le mi nto ɔnɛ: 2 “Ɔna onto, ta prɔfɛsiya wate: ‘Nkum’Olongo Nkumadiɔndjɔ Jehowa kata ate:
“Lela wate: ‘Hayii, lushi lakɔ loyaye!’
3 Nɛ dia lushi lakɔ laya suke, ɛɛ, lushi la Jehowa laya suke.+
Lɔ layoyala lushi la wange,+ etena kakashikikɛma ka wedja.+
4 Lokuwa la ta layoya dia ndjɔlɔsha Edjibito ndo wɔma wayonda Etiyɔpiya etena kayokalema edo lo Edjibito;
Ɛngɔnyi awɔ wambɔsama ndo atshina awɔ wambonyukɔ.+
5 Etiyɔpiya,+ Puta,+ Luda ndo anto tshɛ wosanganyemi,*
Ndo Kubɛ kaamɛ la ana wa lo wodja wa sheke,*
Vɔ tshɛ wayodiakema la lokuwa la ta.”’
6 Jehowa kata ate:
‘Wanɛ wasukɛ Edjibito vɔ lawɔ wayɔkɔ,
Ndo wolo w’otako awɔ wayoholoyama.’+
“‘Oma la Mingidɔlɛ+ polo la Siyɛnɛ,+ vɔ wayodiakema la lokuwa la ta lo wodja,’ mbata Nkum’Olongo Nkumadiɔndjɔ Jehowa. 7 ‘Vɔ wayetɛma tɔngɔ to oleki wedja ekina ndo esomba awɔ wayonga tɔngɔ to oleki esomba ekina.+ 8 Ndo vɔ wayohomba mbeya dia dimi kele Jehowa lam’ayomodja dja lo Edjibito ndo wanɛ tshɛ wakokana la wɔ wayɔtɛtshatɛtshama. 9 Lushi lɔsɔ dimi layotoma akɛndji lo masuwa dia tosatsha Etiyɔpiya layaɛkɛ le nde ndamɛ lokomba; sase dia wɔma diayowanda lo lushi layaye le Edjibito, nɛ dia ndooko onyake lɔ layoya.’
10 “Nkum’Olongo Nkumadiɔndjɔ Jehowa kata ate: ‘Dimi layokamba la Nɛbukadinɛza* nkumekanga ka Babilɔna+ dia nkomiya nyemba y’ase Edjibito. 11 Nde la elui ande wa asɔlayi, wedja+ woleki esehe, wayɔtɔlama lɛkɔ dia tolanya wodja. Vɔ wayɔsɔmɔla tokuwa tawɔ ta ta dia ndɔsha Edjibito ndo ndodia wodja la edo.+ 12 Dimi layetɛ ɛkɛdi wa Nilɛ+ nkɛtɛ y’ofumbo ndo layosondja wodja le akanga wa kɔlɔ. Dimi layokamba la angɛndangɛnda+ dia mbetɛ wodja ndo kɛnɛ tshɛ kele lɔkɔ tɔngɔ to. Dimi Jehowa dimɛ kambɔtɛkɛta.’
13 “Nkum’Olongo Nkumadiɔndjɔ Jehowa kata ate: ‘Dimi layolanya nto dikishi dia nyɛtɛɛtɛ* ndo layokomiya tozambizambi t’anyanya ta Nofu.*+ Ndooko owandji wayotomba nto lo wodja wa Edjibito ndo dimi layodja wɔma lo wodja wa Edjibito.+ 14 Dimi layetɛ Patɛrɔsɛ+ tɔngɔ to, layodja dja la Zɔana ndo layolombosha No.*+ 15 Dimi layohongola nkɛlɛ kami le Sinɛ, longele la Edjibito ndo layolanya anto wa la No. 16 Dimi layodja dja lo Edjibito; Sinɛ ayondama la wɔma ndo No ayotondɔma wosho ndo Nofu* ayohomana la ɔlɔshamelo la yanyi ya tɛ! 17 Ɛlɔngɔ w’apami wa la Ɔnɛ* ndo wa la Pibɛsɛtɛ wayodiakema la lokuwa la ta ndo esomba wayɔtɔlama lo lɔhɔmbɔ. 18 Etena kayomɔɔkɔla esembe wa Edjibito lɛkɔ,+ wonya wayodja la Tɛhafinɛhɛsɛ. Wolo wa lotamanya lande wayokomɛ,+ wange wayowokomba ndo tosombasomba tande tayɔtɔlama lo lɔhɔmbɔ.+ 19 Dimi layela elombwelo le Edjibito, ko vɔ wayohomba mbeya dia dimi kele Jehowa.’”
20 Ndo lo ɔnɔnyi wa 11 ngɔndɔ ka ntondo nshi 7, ɔtɛkɛta wa Jehowa wakaye le mi ɔnɛ: 21 “Ɔna onto, dimi lambɔɔkɔla lonya la Farawɔ nkumekanga ka Edjibito; lɔ halotosolama mpota dia nkɔnɔ kana mɔmbama la dihɔndɔ dia likeketsha dia lɔ nkimɛ lokuwa la ta.”
22 “Diakɔ diata Nkum’Olongo Nkumadiɔndjɔ Jehowa ate: ‘Dimi layanga ndɔsha Farawɔ nkumekanga ka Edjibito,+ ndo layɔkɔla anya ande, lɔnɛ la wolo ndo lɔnɛ lakɔɔkɔ,+ ndo layosala dia lokuwa la ta nkɔ oma lo lonya lande.+ 23 Oma laasɔ, dimi layohandjola ase Edjibito l’atei wa wedja ndo layowadianganya l’atei wa wedja.+ 24 Dimi layokeketsha anya* wa nkumekanga ka Babilɔna+ ndo layodja lokuwa lami la ta lo lonya lande,+ ko dimi layɔkɔla anya wa Farawɔ, ko nde ayokuma akumu wolo oko onto layanga mvɔ la ntondo kande.* 25 Dimi layokeketsha anya wa nkumekanga ka Babilɔna, koko anya wa Farawɔ wayɔtɛwɔ; ndo vɔ wayohomba mbeya dia dimi kele Jehowa etena kayomodja lokuwa lami la ta lo lonya la nkumekanga ka Babilɔna ndo kayondokamba la lɔ dia ndɔsha wodja wa Edjibito.+ 26 Ndo dimi layodianganya ase Edjibito l’atei wa wedja ndo layowahandjola l’atei wa wedja,+ ko vɔ wayohomba mbeya dia dimi kele Jehowa.’”