Ɛzɛkiyɛlɛ

41 Oma laasɔ, nde akantɔlɛ l’andja wa tɛmpɛlɔ k’ekila,* ko nde akɛdika dikundji dia l’omamu; diɔ diaki la kubita* 6 lo wedi ɔmɔtshi ndo kubita 6 lo wedi okina. 2 Ɛɔtwɛlɔ kaki la woke wa kubita 10 ndo mpele dia l’emamu* wa ɛɔtwɛlɔ diaki la kubita 5 wedi ɔmɔtshi ndo kubita 5 wedi okina. Nde akɛdika, ko otale atɔ waki kubita 40 ndo woke atɔ kubita 20.

3 Oma laasɔ, nde akɔtɔ l’etei,* ko akɛdika ekundji ka l’omamu ka lo ɛɔtwɛlɔ ko tɔ kaki la woke wa kubita 2 ndo ɛɔtwɛlɔ kaki la woke wa kubita 6. Mpele dia l’emamu dia lo ɛɔtwɛlɔ diaki* la kubita 7. 4 Oma laasɔ, nde akɛdika luudu lɛlane la l’andja wa tɛmpɛlɔ k’ekila, ko lɔ laki la otale wa kubita 20 ndo woke wa kubita 20.+ Ko nde akambutɛ ate: “Ɔnɛ ekɔ Dihole dioleki Ekila.”+

5 Oma laasɔ, nde akɛdika ehele ka lo tɛmpɛlɔ, ko tɔ kaki la kubita 6. Mvudu ya l’emamu yakadinge tɛmpɛlɔ yaki la woke wa kubita 4.+ 6 Mvudu ya l’emamu yaki la etajɛ 3, etajɛ ɔmɔtshi laadiko dia okina, mvudu 30 lo etajɛ tshɛ. Ehembo wakikɔ l’emamu wa ehele ka tɛmpɛlɔ mbaki oko osukɔ wa mvudu ya l’emamu, diaha esukɔ akɔ nkoma polo lo tshondo ya ehele ka tɛmpɛlɔ.+ 7 Lo wedi akɔ 2 wa tɛmpɛlɔ, aki ɔsɛsɛ* ɔmɔtshi wele la wadelo wakatanunaka lam’akawatadɛka otsha lo mvudu ya la diko.+ Woke awɔ wakatanunaka oma lo etajɛ la etajɛ lam’akawatadɛka oma lo etajɛ wa l’ɛse polo lo etajɛ woleki la diko lo mbeta oma lo etajɛ wa l’atei.

8 Dimi lakɛnyi dia lɔyɛnga lɔmɔtshi laki l’otshimbedi wa tɛmpɛlɔ k’otondo ndo atshina wa mvudu ya l’emamu waki la woke wa shongo y’otondo ya kubita 6 polo lo tshuku. 9 Woke wa ehele ka l’andja ka mvudu ya l’emamu aki kubita 5. Dihole dimɔtshi dia hwe* diakikɔ suke la luudu laki la mvudu ya l’omamu yaki etenyi kɛmɔtshi ka tɛmpɛlɔ.

10 Lam’asa tɛmpɛlɔ la mvudu y’oleelo*+ aki sɛkɛ diaki la woke wa kubita 20 lo wedi adiɔ tshɛ. 11 Ɛɔtwɛlɔ kɛmɔtshi kaki lam’asa mvudu ya l’omamu la dihole dia hwe lo lɛkɛ la nɔrdɛ ndo ɛɔtwɛlɔ kekina lo lɛkɛ la sidɛ. Dihole diakɔ dia hwe diaki la woke wa kubita 5 lo wedi akɔ tshɛ.

12 Luudu laki lo owɛstɛ mbɛlanɛ la dihole dia hwe laki la woke wa kubita 70 ndo otale wa kubita 90; ehele ka luudu lakɔ kaki la woke wa kubita 5 lo wedi akɔ tshɛ.

13 Nde akɛdika tɛmpɛlɔ, ko tɔ kaki l’otale wa kubita 100. Dihole dia hwe, luudu* ndo mpele dialɔ aki nto otale wa kubita 100. 14 Woke wa ntondo ka tɛmpɛlɔ kakɛlɛ otsha lo ɛstɛ ndo dihole dia hwe aki kubita 100.

15 Nde akɛdika otale wa luudu lakɛlɛ otsha lo dihole dia hwe, l’otshimba, kaamɛ la ekole alɔ wa lo wedi akɔ 2, ko aki kubita 100.

Nde akɛdika ndo l’andja wa tɛmpɛlɔ k’ekila, l’etei ka tɛmpɛlɔ k’ekila+ ndo totshoto t’etale ta lo sɛkɛ, 16 kaamɛ ndo ɛɔtwɛlɔ, adidishi wele la kadrɛma yele oko weolɔ+ ndo ekole waki lo ahole 3 asɔ. Suke la ɛɔtwɛlɔ aki ehele k’abaya+ oma lo odihe polo lo adidishi; ndo adidishi wakakombama. 17 Wɛdikelo wakasalema la diko dia soko ndo lo tɛmpɛlɔ ka l’etei ndo l’andja ndo l’ehele k’otondo wedi akɔ tshɛ. 18 Tɔ kaki la asango wa akɛruba+ ndo w’atoko+ lɔkɔ, toko la toko l’asa akɛruba 2 ndo ɔkɛruba tshɛ aki la dungi pende. 19 Elungi k’onto kakɛlɛ otsha lo toko lo wedi ɔmɔtshi ndo elungi ka ntambwɛ* otsha lo toko lo wedi okina.+ Ngasɔ mbakawasange lo tɛmpɛlɔ k’otondo. 20 Oma lo odihe polo lo dihole diele la diko dia ɛɔtwɛlɔ, wakasange akɛruba ndo atoko lo ehele ka tɛmpɛlɔ k’ekila.

21 Dikundji dia lo soko* dia tɛmpɛlɔ k’ekila diaki la atshuku 4 wɛdimi.+ La ntondo ka dihole dioleki ekila aki ɛngɔ kɛmɔtshi kele oko 22 elambwelo+ ka l’esongo kaki la tanga dia kubita 3 ndo otale wa kubita 2. Tɔ kaki la dikundji dia l’atshuku ndo wemema* atɔ ndo emamu atɔ wakasalema la esongo. Oma laasɔ, nde akambutɛ ate: “Ɔnɛ ekɔ mɛsa wele la ntondo ka Jehowa.”+

23 Tɛmpɛlɔ k’ekila kaki la asoko 2 ndo dihole dioleki ekila diaki la asoko+ 2. 24 Asoko akɔ waki la nkuke ya bɛtshi 2 yatshimba, bɛtshi 2 lo lokuke la lokuke. 25 Asango wa akɛruba ndo wa atoko wakikɔ lo nkuke ya tɛmpɛlɔ k’ekila oko wanɛ waki lo mpele.+ Akikɔ nto dɛfu di’abaya la ntondo ka tshoto y’otale ya l’andja. 26 Aki nto adidishi wele la kadrɛma yele oko weolɔ+ ndo asango w’atoko lo wedi akɔ 2 wa tshoto y’otale ndo lo mvudu ya l’emamu ya lo tɛmpɛlɔ ndo lo alɛfu.