Lokoho lele la wɛɔsa la odiya wa lo ndjale

NYAMA efula ya l’ashi yalɔnya yasɛna l’ashi wa tshitshi mongaka la ekoho kele la esɔ la tshina dia lokoho kawakimanyiya dia vɔ mongaka lo djungudungu. Koko odiya wa lo ndjale wekɔ la ekoho kɛmɔtshi kawokimanyiya, mbuta ate lokoho lele la wɛɔsa.

Tɔsɛdingole yema: Lokoho la odiya wa lo ndjale lekɔ wolo efula ndeka nkoho ya nyama nkina tshɛ yalɔnya, lɔ lekɔ la wɛɔsa 155 000 lo satimɛtrɛ kare tshɛ. Etena kɔtɔ odiya l’ashi, ekoho katɔ kutolaka lɔpɛpɛ lo demba diawɔ. Lɔpɛpɛ lɔsɔ mongaka oko lohoso, lɔ kimanyiyaka diaha ashi wa tshitshi nkoma lo lokoho la nyama ndo mbokimanyiyaka dia demba diatɔ ntshikala djungudungu.

Ambeyi wa siansɛ mbutaka dia ekɔ wetshelo ɔmɔtshi wakokawɔ nkondja oma lo lokoho la odiya wa lo ndjale. Vɔ wakasale eyangelo la akɔti efula wa losala, lo ndjela otale ndo otaloyelo wa wɛɔsa. Anyangiyangi wakayokomaka lo mbuta ɔnɛ “woho wele wɛɔsa etale ndo wolo, mbakimanyiya diaha ashi mbeta lo ekoho kele la wɛɔsa.” Lo ɛtɛkɛta ekina, paka odiya wa lo ndjale mbakoka mɛtɛ monga la lokoho l’oshika lele la wɛɔsa.

Anyangiyangi wekɔ lo nongamɛ dia wekelo awɔ wayowakonya dia awui wa tshulatshula mpama lo nsala ndo lo ntondja ahɔndɔ wakimanyiya diaha ashi mbeta. Kɛsɔ mbeyaka nkonya dia anto amɔtshi ndjambola dia kana anto wahomba mbɔtɔ l’ashi wa tshitshi wayokoka monga l’akɔti wele la wɛɔsa, mbuta ate akɔti wele oko lokoho la odiya wa lo ndjale!

Kakɔna kafɔnyayɛ? Onde lokoho la odiya wa lo ndjale lawokimanyiya lo mbosha djungudungu, lakahilɔ ko kana lakatongama?