Onde wɛ atakombolaka dia mbadia Bible ko ndjotshika l’ɔtɛ wakayayonga la tokanyi tele oko t’anto wɔtɛkɛtshiso la diko? Le anto efula, mbadia Bible mbishaka ɔkɔmwɛlɔ. Ko kayotota naka wɛ ambeya dia Bible koka kokimanyiya dia wɛ monga l’ɔngɛnɔngɛnɔ ndo ndeka monga la lɔsɛnɔ la dimɛna? Ayoyosala naka wɛ ambeya dia ekɔ alako amɔtshi wakoka kokimanyiya dia mbetɛ wadielo wa Bible dui dia dimɛna efula? Onde wɛ ayonga suke dia mbidja yimba lo kɛnɛ kakoka Bible kosha?

Tɔsɛdingole awui amɔtshi wakate anto wakakondja wahɔ etena kakawatatɛ mbadia Bible.

Ezekiel leke kodikotshaka ɛnɔnyi 20 l’ɛmɔtshi mbutaka ate: “Ntondo, laki oko onto latakɛndjakɛndja mutuka aha la mbeya dihole shikaa diatandatshu. Koko wadielo wa Bible wakankimanyiya dia monga la lɔsɛnɔ lele l’oyango. Tɔ kekɔ l’alako w’eshika wakokami kambaka la wɔ lushi tshɛ.”

Frieda lele nde lawɔ l’ɛnɔnyi 20 l’ɛmɔtshi mbutaka ate: “Dimi lakasalaka akambo la esasesase. Koko diɛsɛ la wadielo ami wa Bible, lakeke dia monga la ndjakimɛ. Dui sɔ diakayonkimanyiyaka dia kandolaka akambo lo yoho ya dimɛna ndo kakianɛ laya l’angɛnyi efula.”

Womoto ɔmɔ lelɛwɔ Eunice lele l’ɛnɔnyi 50 l’ɛmɔtshi mbutaka lo dikambo dia Bible ate: “Tɔ kimanyiyakami dia dimi monga onto ɔlɔlɔ ndo ntshika mbekelo yami ya kɔlɔ.”

Oko wakashihodia ambadi asɔ ndo miliyɔ kina y’anto, wadielo wa Bible koka kokimanyiya dia wɛ ndeka monga la lɔsɛnɔ l’ɔngɛnɔngɛnɔ. (Isaya 48:17, 18) L’atei wa wahɔ wakokayɛ nkondja mbele ndo tɔ koka kokimanyiya dia 1) mbɔsa tɛdikɔ t’eshika, 2) monga l’angɛnyi w’eshika, 3) ndɔshana l’ekiyanu ndo 4) kɛnɛ koleki tshɛ ele, wɛ ayeka akambo wa mɛtɛ wendana la Nzambi. Alako wa lo Bible ndja oma le Nzambi, ɔnkɔnɛ, wɛ hakoke pondjo nkondja etombelo wa kɔlɔ l’ɔtɛ wamboyayela. Nzambi hasha pondjo alako wa kɔlɔ.

Dui di’ohomba diakokayɛ nsala ele ntatɛ kiadia. Naa alako wakoka mbetɛ dui sɔ wɔdu ndo ɔngɛnɔngɛnɔ w’efula?

Alako akɔna wayokokimanyiya dia wɛ ngɛnangɛna wadielo wa Bible ndo ndeka nkondja wahɔ oma lɔkɔ? Dja yimba lo alako atanu anɛ wambokimanyiya anto efula.

Sɔna dihole dia dimɛna. Sala la wolo dia ntana dihole diele bu la londjo. Nya awui wakoka kekola yimba dia wɛ ndeka ndjasha lo kɛnɛ kadiayɛ. Osase wa dimɛna ndo lɔpɛpɛ la tshitshi koka kokimanyiya dia wɛ ndeka nkondja wahɔ oma lo wadielo ayɛ.

Onga l’ekanelo k’ɔlɔlɔ. Lam’ele Bible ndja oma le Shɛso lele l’olongo, wɛ ayokondja wahɔ efula oma lɔkɔ naka wɛ monga la dionga diele la ɔna lele suke dia mbeka akambo oma le ombutshi wa ngandji. Naka wɛ ekɔ la kanyi mɔtshi ya kɔlɔ lo dikambo dia Bible, kete nyayɔ dia Nzambi ketsha.—Osambo 25:4.

Sala dɔmbɛlɔ la ntondo ka wɛ mbadia. Bible kekɔ la tokanyi taki Nzambi, diakɔ diele keema dui dia diambo lo woho weso l’ohomba w’ekimanyielo kande dia sho kishihodia. Nzambi ndakaka dia mbisha “nyuma k’ekila le wanɛ wɔɔlɔmbatɔ.” (Luka 11:13) Nyuma k’ekila koka kokimanyiya dia nshihodia kanyi ya Nzambi. L’edjedja ka wonya, tɔ kayodihola yimba yayɛ dia nshihodia “kaanga akambo wa lotshimola waki Nzambi.”—1 Kɔrɛtɔ 2:10.

Adia l’oyango wa nshihodia. Tadiake tsho l’oyango wa mana la mbadia. La wangasanu tshɛ, kana lomba lo kɛnɛ kadiayɛ. Yambola ambola wele oko wanɛ: ‘Waonga akɔna watanami le onto latamadia dikambo diande? Ngande wakokami nkamba la dui nɛ lo lɔsɛnɔ lami?’

Yadjɛ eyango shikaa. Dia nkondja wahɔ oma lo wadielo ayɛ wa Bible, sala dia nshihodia dui dimɔ diakoka mɛtɛ ndowanya lɔsɛnɔ layɛ. Wɛ koka ndjadjɛ eyango wayela ɛnɛ: ‘Dimi nangaka mbeka akambo efula wendana la Nzambi ndamɛ.’ ‘Dimi nangaka nkoma onto ɔlɔlɔ, omi kana wadi l’oshika.’ Oma laasɔ, nsɔna tenyi dia lo Bible diayokokimanyiya dia nkotsha eyango ɛsɔ.a

Alako atanu anɛ wayokokimanyiya dia wɛ ntatɛ mbadia Bible. Ko ngande wakokayɛ ndeka mbetɛ wadielo ayɛ dui di’ɔngɛnɔngɛnɔ? Sawo diayela mbishaka alako amɔtshi lo dikambo sɔ.

Ngande wele wadielo wa Bible le yɛ? Onde dui diasha eshi? Ko kana dui di’ɔngɛnɔngɛnɔ? Dui sɔ nemanɛka la yoho yadiayɛ Bible. Ɛsɔ tɔsɛdingole kɛnɛ kakokayɛ nsala dia mfudia nsaki ndo ɔngɛnɔngɛnɔ ayɛ lo wadielo wa Bible.

Sɔna ekadimwelo ka dimɛna ndo ka lo ɔtɛkɛta wa nshi nyɛ. Naka wɛ mbadia awui wele wolo efula ndo wele la tɔtɛkɛta tambeta loowe tahayeye, kete ondo wɛ hɔngɛnangɛna kɛnɛ kadiayɛ. Ɔnkɔnɛ, yanga Bible kele la tɔtɛkɛta ta wɔdu nshihodia tayonanda otema ayɛ. L’etena kakɔ kaamɛ, tɔ pombaka monga Bible kakakadimɔma la yambalo ndo la kɔlamelo tshɛ.a

Kamba la tshulatshula dia nshi nyɛ. Ɛlɔ kɛnɛ, Bible hatanema tsho lo dibuku dia lokakatanya, mbuta ate dibuku diakatondjama, koko ndo lo fɔrma ka nimerikɛ. Bible mɔtshi koka mbadiema l’Ɛtɛrnɛtɛ kana ndjitelesharjɛ dia wadielo w’onto ndamɛ lo ɔrdinatɛrɛ, lo tablɛtɛ kana lo telefɔnɛ. Dikadimwelo dimɔtshi diekɔ ndo la prɔgramɛ yayokokimanyiya esadi eto dia wɛ menda avɛsa akina wa lo Bible watɛkɛta dui diakɔ diaamɛ kana mbɛdika dikadimwelo dia Bible diotshikitanyi. Naka wɛ nangaka mpokamɛ lo dihole dia mbadia, eya dia Bible tanemaka ndo lo eshinga. Anto efula nangaka mpokamɛ etena kewɔ lo mituka wɛmba anto tshɛ, etena kasolawɔ ahɔndɔ kana etena kasalawɔ elimu ekina wawasha akoka wa mpokamɛ. Lande na kahayahembe yoho yɔtɔnganɛ la yɛ?

Kamba la dihomɔ dia wekelo wa Bible. Dihomɔ dia wekelo wa Bible koka kokimanyiya dia wɛ ndeka nkondja wahɔ oma lo wadielo ayɛ. Ekɔ kartɛ yɛnya ngelo yatɛkɛtama lo Bible yayokokimanyiya dia wɛ mbeya dihole diakasalema kɛnɛ kadiayɛ ndo wɛ monga oko onto lɛna kɛnɛ kadiayɛ. Asawo wele oko wanɛ watanema lo periodikɛ kɛnɛ kana lo etenyi kata ɔnɛ: “Wetshelo w’oma lo Bible” katanema lo sitɛ k’Ɛtɛrnɛtɛ ka jw.org koka kokimanyiya dia wɛ mbeya kitshimudi ya tenyi efula dia lo Bible.

Tshikitanya yoho yayɛ ya mbadia. Naka wɛ mɛnaka dia ekɔ wolo mbadia Bible oma lo dikatshi dia ntondo polo di’ekomelo, lande na kahayafudia nsaki kayɛ lo mimɛ la etenyi kaleka kɔngɛnyangɛnya? Naka wɛ nangaka mbeya awui wendana l’anto waleka mbeyama lo Bible, wɛ koka mbadia awui wendana l’anto akɔ. Yoho mɔtshi ya wɔdu yakokayɛ mbadiaka Bible tanemaka lo kiombo yele l’ɔtɛ a dui ɔnɛ: “Sala eyangelo lo Bible dia mbeya anto watɛkɛtama lɔkɔ.” Kana, mbeyaka monga ko wɛ nangaka mbadia Bible lo ndjela ɔkɔndɔ kana lo ndjela woho wakayahɔnaka awui. Lande na kahayahembe yoho mɔtshi l’atei wa tɔsɔ?

Bible ntshikitana l’abuku akina tshɛ. Tɔ kekɔ l’alako w’oma le Otungi aso. (2 Timɔte 3:16) Losango lele lɔkɔ koka monga la shɛngiya y’efula le so. Bible mbutaka ɔnɛ: “Ɔtɛkɛta wa Nzambi wekɔ la lɔsɛnɔ ndo la wolo.” (Hɛbɛru 4:12) Tɔ kekɔ la wolo wa ndowanya lɔsɛnɔ laso lo toho tohende t’amɛna, mbuta ate tosha ɛlɔmbwɛlɔ lo lɔsɛnɔ laso la lushi la lushi, oma ko nshi nyɛ ndo tokimanyiya dia mbeya Nzambi ndo alaka ande.—1 Timɔte 4:8; Jakɔba 4:8.

Tɔ koka ndowanya lɔsɛnɔ layɛ oma ko kakianɛ. Bible koka kokimanyiya lo awui ayɛ hita. Tɔ mbishaka alako w’eshika lo kɛnɛ kendana la:

• Diɔtɔnganelo dia l’anto akina.—Ɛfɛsɔ 4:31, 32; 5:22, 25, 28, 33.

• Tokanyi ndo yonge.—Osambo 37:8; Tokedi 17:22.

• Atɔndɔ wendana la lɔkɛwɔ.—1 Kɔrɛtɔ 6:9, 10.

• Awui wendana l’ekondjelo.—Tokedi 10:4; 28:19; Ɛfɛsɔ 4:28.a

Wadi l’omi amɔtshi weke katshukana wadjasɛ l’Asie wakangɛnangɛna efula nɛmɔ diele l’alako wa lo Bible. L’ɛnyɛlɔ k’atshukanyi efula w’eyoyo, vɔ waki l’okakatanu dia mbekesanɛ lam’asawɔ ndo sawola dimɛna. Koko vɔ wakatatɛ nkamba la kɛnɛ kakawadiaka oma lo Bible. Etombelo akɔna waki la dui sɔ? Vicent lele omi mbutaka ate: “Kɛnɛ kakamadiaka oma lo Bible akankimanyiya dia ndɔshana la ekakatanu wa lo diwala diaso la ngandji tshɛ. Sɛna lo ndjela kɛnɛ kata Bible ambotosha lɔsɛnɔ l’ɔngɛnɔngɛnɔ kaamɛ.” Annalou wadɛnde mbutaka ate: “Mbadiaka bɛnyɛlɔ dia lo Bible akatokimanyiya. Kakianɛ laya la ɔlɔ ndo l’ɔngɛnɔngɛnɔ lo diwala diaso ndo eyango wele la so lo lɔsɛnɔ.”

Tɔ kimanyiyaka dia mbeya Nzambi. Laadiko dia ntɛkɛta dia diwala, Vicent mbutaka nto ate: “Diɛsɛ la wadielo wa Bible, loyaoka suke suke la Jehowa nshi nyɛ oleki nshi ya ntondo.” Kɛnɛ kakate Vicent mendanaka la dui dimɔtshi di’ohomba, mbuta ate, Bible koka kokimanyiya dia wɛ monga la diɔtɔnganelo dia dimɛna la Nzambi. Lo nsala ngasɔ, wɛ hatokondja tsho wahɔ oma lo alako ande, koko wɛ ayɛna dia wɛ koka mbeeya oko ɔngɛnyi. Ndo wɛ ayɛna dia nde mbisholaka awui wendana la nshi yayaye y’amɛna, etena kayoyɔngɛnangɛna la “lɔsɛnɔ l’oshika” layotshikalaka pondjo pondjo. (1 Timɔte 6:19) Ndooko dibuku diakoka kosholɛ dui sɔ.

Naka wɛ ntatɛ mbadia Bible ndo ntetemala aha la mpekɔ, kete ndo wɛ koka nkondja wahɔ ɛsɔ, mbuta ate ndowanya lɔsɛnɔ layɛ nshi nyɛ ndo mbeya Nzambi. Koko etena katayadia Bible, wɛ koka ndjaoka ambola efula. Etena kayoyongaka la ambola, kohɔke ɛnyɛlɔ ka dimɛna ka ɔlɛnga ɔmɔtshi w’ose Etiyɔpiya lakasɛnɛ ambeta ɛnɔnyi 2 000. Nde aki la ambola efula wendana la Bible. Etena kakawawombola dia kana nde akashihodia kɛnɛ kakandatadiaka, nde akakadimola ate: “Ngande mɛtɛ wayomoshihodia naka onto hambetshisha?”b Oma laasɔ, nde aketawɔ la nsaki tshɛ ekimanyielo kakawosha Filipɛ laki ombetsha wa Bible waki l’akoka ndo laki ombeki waki Yeso wa lo ntambe ka ntondo. (Etsha 8:30, 31, 34) La yimba yakɔ yaamɛ, naka wɛ nangaka mbeya awui akina wendana la Bible, tambokɔlɔmba dia wɛ ndodia dɛmandɛ lo Ɛtɛrnɛtɛ lo www.jw.org kana wɛ fundɛ adrɛsɛ ɔmɔtshi woleki suke la yɛ wele lo periodikɛ kɛnɛ. Wɛ koka nto mɛnana l’Ɛmɛnyi wa Jehowa wele suke la yɛ kana wɛ ntshɔ lo Mbalasa ka Diolelo kele lo ngelo keyɛ. Onde wɛ hakoke ntatɛ mbadia Bible oma lo ɛlɔ ndo mbetawɔ dia tɔ kɔlɔmbɔla otsha lo lɔsɛnɔ la dimɛna?