Onde Ɛmɛnyi wa Jehowa kakitolaka nkumbo ko kana vɔ ndjikakatanyaka?

Oko weso Ɛmɛnyi wa Jehowa, sho salaka la wolo dia nkeketshaka waa nkumbo, oyadi nkumbo yaso kana y’asukanyi aso. Sho nɛmiyaka Nzambi lele Otungi wa nkumbo. (Etatelo 2:21-24; Ɛfɛsɔ 3:14, 15) Lo Bible, nde tetshaka atɔndɔ wakakimanyiya anto wa l’ andja w’otondo dia monga l’awala wele nge ndo wele l’ɔngɛnɔngɛnɔ.

Woho wasala Ɛmɛnyi wa Jehowa dia nkeketsha waa nkumbo

Sho salaka tshɛ keso l’akoka wa nsala dia ndjela alako wa lo Bible, nɛ dia dui sɔ tokimanyiyaka dia monga waomi, waa wadi ndo ambutshi w’eshika. (Tokedi 31:10-31; Ɛfɛsɔ 5:22–6:4; 1 Timɔte 5:8) Lomba latanema lo Bible nkimanyiyaka kaanga nkumbo yele la waetawɔ wotshikitanyi dia yɔ ntondoya. (1 Petero 3:1, 2) Tohokamɛ awui amɔtshi wakate anto wele bu Ɛmɛnyi wa Jehowa wele elonganyi awɔ wakakome Ɛmɛnyi wa Jehowa:

• “Ɛnɔnyi esamalo wa ntondo wa diwala diaso wakalole l’ewanu ndo l’awui wa lonyangu. Koko, l’ɔkɔngɔ wa Ivette nkoma Ɔmɛnyi wa Jehowa, nde akayonga womoto loka anto akina ngandji ndo lele la solo dia lotutsha. Etshikitanu wakandasale mbakashimbɛ diwala diaso.”​—Clauir, oma la Brésil.

• “Lakatone, etena kakatatɛ omɛmi Chansa ntatɛ mbeka Bible nde l’Ɛmɛnyi wa Jehowa, nɛ dia lakafɔnyaka dia vɔ pandjolaka waa nkumbo. Koko oma k’etena kɛsɔ, lakɛnyi dia Bible kakakimanyiya mɛtɛ diwala diaso.”​—Agness, oma la Zambie.

L’olimu aso w’esambishelo, sho mɛnyaka asukanyi aso woho wele nkamba la lomba l’oma lo Bible koka mbakimanyiya dia

• Sɔna olonganyi la lomba tshɛ

• Ntondoya ɔnɔnyi wa ntondo wa diwala

• Mbidjasɛ dimɛna l’akilo

• Mbeya nkamba la falanga

• Tshika ewanu

• Mbeka woho wa dimanyiyaka anto

• Mbetsha ana

Onde ntshikitanya dietawɔ mbelaka ewanu lo diwala?

Lo ntena dimɔtshi, dui sɔ mbelaka ewanu lo diwala. Ɛnyɛlɔ, alapɔlɔ ɔmɔtshi wakatondja tshunda dimɔtshi diasala eyangelo dielɛwɔ Sofres lo 1998 akɛnya dia diwala 1 lo awala 20 wele olonganyi ɔtɔi mbaki Ɔmɛnyi wa Jehowa diakonge l’ekakatanu wa wolo etena kakatshikitanya olonganyi okina dietawɔ diande.

Yeso akatatshi wanɛ wayela wetshelo ande wayodienɛ l’ewanu wa lo nkumbo. (Mateo 10:32-36) Ombewi w’ɛkɔndɔ welɛwɔ Will Durant mɛnyaka dia l’ɛlɔmbwɛlɔ ka diolelo dia Rɔmɔ, “anto wakate di’Akristo wekɔ lo mpandjola waa nkumbo,”a ndo kɛsɔ mbatawɔ dikambo di’Ɛmɛnyi wa Jehowa ɛmɔtshi ɛlɔ kɛnɛ. Onde dui sɔ mɛnyaka di’Ɛmɛnyi wa Jehowa tongaka ewanu?

Lo mpembola onongo wendana la woho wakawafunde Ɛmɛnyi wa Jehowa ɔnɛ vɔ pandjolaka waa nkumbo, Cour européennes des droits de l’homme akate di’ase nkumbo wele bu Ɛmɛnyi wa Jehohwa mbatondja ewanu mbala efula lo ntona “dia mbetawɔ ndo dia nɛmiya lotshungu la ntɛmɔla lele la ewotɔ awɔ.” Tominadi tɔsɔ takakotsha ɔnɛ: “Okakatanu ɔsɔ wekɔ l’awala tshɛ wele ase nkumbo bu ɔtɛmwɛlɔ ɔtɔi, ndo Ɛmɛnyi wa Jehowa hawohandwe oma lo dikambo sɔ.”b Koko kaanga la ntondo k’anto watona ɔtɛmwɛlɔ awɔ, Ɛmɛnyi wa Jehowa salaka la wolo dia ndjela dako dia lo Bible diata ɔnɛ: “Tanyokaloyake kɔlɔ lo kɔlɔ. . . . Naka kokaka, lo edja tshɛ kaakadialemanɛ la nyu, nyodjasɛ l’anto tshɛ ki.”​—Rɔmɔ 12:17, 18.

Ɔkɔkɔ wetawɔ Ɛmɛnyi wa Jehowa dia vɔ pombaka ntshukana paka l’ase ɔtɛmwɛlɔ awɔ

Vɔ kitanyiyaka dako dia lo Bible diata dai “ntshukana paka lo Nkumadiɔndjɔ,” mbuta ate l’onto lele lawɔ mbetawɔ ɔtɔi. (1 Kɔrɛtɔ 7:39) Didjango sɔ ntomba oma lo Bible ndo diekɔ shikaa. Ɛnyɛlɔ, sawo dimɔtshi diakatondjama lo 2010 lo jurnalɛ mɔtshi (Journal of Marriage and Family) diakate dia “atshukanyi wele dietawɔ ndo ditshelo di’ɔtɛmwɛlɔ waamɛ mongaka la diɔtɔnganelo dioleki dimɛna lam’asawɔ.c

Koko Ɛmɛnyi wa Jehowa hawokeketsha wanɛ wele bu la wɔ mbetawɔ kaamɛ dia vɔ nkakitɔna l’elonganyi awɔ wele bu Ɛmɛnyi wa Jehowa. Bible mbutaka ɔnɛ: “Naka ɔnangɛso ɔmɔtshi ekɔ la wadi lele bu ombetawudi ko womoto akɔ mbetawɔka mbidjasɛ kaamɛ la nde, nde atootshikake. Ndo naka womoto ekɔ la omi lele bu ombetawudi ko omɛnde mbetawɔka ntshikala kaamɛ la nde, nde atotshikake omɛnde.” (1 Kɔrɛtɔ 7:12, 13) Ɛmɛnyi wa Jehowa kimamɛ la didjango sɔ.