Efukutanu wakonya anto dia monga l’elongamelo

“Lu nshi y’ekumelu, tena dia wulu diayuyala.”—2 TIMOTE 3:1.

ONDO wɛ ambokaka kana ambɛnaka dikambo dimɔtshi l’atei w’akambo wa kɔlɔ wayela anɛ:

● Olando ɔmɔtshi wa wolo wakadiake anto akumi.

● Ndjala kɛmɔtshi ka kasha kakadiake anto kama.

● Didimu dimɔtshi dia nkɛtɛ diakashile anto nunu ndo anto efula wakashisha mvudu yawɔ.

Lo ndjɛkɛ yayela ya periodikɛ kɛnɛ, tayɔsɛdingola akambo akina wele oko wanɛ. Wɛ ayɛna nto dia Bible akatatshi di’akambo wa ngasɔ wayosalema l’etena kelamɛ ɔnɛ “nshi y’ekumelu.”a

Koko, oyango wele l’asawo anɛ kema wa ketawoya ɔnɛ tekɔ lo nsɛna l’andja wambolola tɔ l’ekakatanu, nɛ dia ondo wɛ ambɛnaka ekakatanu wa ngasɔ. Koko, vɔ wakalɔngɔswama dia kosha elongamelo. Vɔ wayɛnya dia ekotshamelo ka prɔfɛsiya shamalo nyɛ nembetshiyaka dia “nshi y’ekumelu” yayanga komɛ. Asawo anɛ wayɛnya nto kɛnɛ kata anto efula lo kɛnɛ kendana la tolembetelo tɔsɔ ndo wayotosha ɛkɔkɔ w’eshika watotshutshuya dia sho mbetawɔ ɔnɛ dikambo dimɔtshi dia dimɛna diekɔ lo tokongɛ la ntondo.

[Nɔte ka l’ɛse ka dikatshi]

1. Adidimu wa nkɛtɛ

“Adidimu wa mamba wa kete wayuyala efula.”—LUKA 21:11.

● Winnie ɔna lele la ngɔndɔ 16 akashimbamɛ oma lo luudu lɔmɔtshi lakanyukɔ lo wodja wa Haïti. Shɛnɛ mɔtshi ya televiziɔ yakewoya ɔnɛ onto lakôshimbɛ akawoke akuma akumu la sase dia wɔma. Kânga mbakandake oma lo didimu dia nkɛtɛ sɔ, ambutshi ande wakavu.

AKAMBO ASƆ ƐNYAWƆ? Etena kakasalema didimu dia nkɛtɛ diaki la wolo wa magnitude 7 lo Ngɔndɔ ka ntondo 2010 lo wodja wa Haïti, anto ndekana 300 000 wakavu. Lâdiko dia lâsɔ, miliyɔ 1 la nunu kama shato y’anto wakashisha mvudu yawɔ. Kânga mbaki didimu dia nkɛtɛ dia lo wodja wa Haïti wolo efula, aha paka lo wodja ɔsɔ oto mbakasalema adidimu wa nkɛtɛ. Suke l’adidimu wa nkɛtɛ wa wolo 18 wakasalema l’andja w’otondo oma lo Ngɔndɔ ka nɛi 2009 polo lo Ngɔndɔ ka nɛi 2010.

KAKƆNA KATA ANTO EFULA? Anto efula mbutaka ɔnɛ hatɛnyi adidimu wa nkɛtɛ l’ɔtɛ wambofulanɛ dihomɔ dia tshulatshula nshi nyɛ, koko tamboleka mbeya awui wendana l’adidimu wa nkɛtɛ oleki anto wa lo nshi yakete.

ONDE KƐNƐ KATAWƆ KƐSƆ KEKƆ MƐTƐ? Tɔsɛdingole dikambo nɛ: Bible hate lofulo l’adidimu wa nkɛtɛ wayosalema lo nshi y’ekomelo nyɛ. Koko, tɔ mbutaka dia “adidimu wa mamba wa kete” wayoyala “lu dihuli la dihuli,” lo mbakonya dikambo dimɔtshi l’atei w’akambo w’ohomba wa l’etena kɛnɛ ka l’ɔkɔndɔ w’ana w’anto.—Mako 13:8; Luka 21:11.

KAKƆNA KAFƆNYAYƐ? Onde tekɔ lo mɛna adidimu wa nkɛtɛ wa wolo, oko wakadite Bible?

Aha paka adidimu wa nkɛtɛ ato mbakenga djembetelo yɛnya dia tekɔ lo nsɛna lo nshi y’ekomelo. Koko, vɔ wekɔ paka prɔfɛsiya kɛmɔtshi l’atei wa prɔfɛsiya yatakotshama. Tɔsɛdingole djembetelo ya hende.

[Efundelo wa l’etei w’odingɔ wa lo lɛkɛ 4]

“Sho [ambewi wa siansɛ] mbaelɛka ɔnɛ adidimu wa nkɛtɛ wa wolo. Anto akina mbaelɛka ɔnɛ adidimu wa nkɛtɛ wa kɔlɔ efula.”—KEN HUDNUT, CENTRE AMÉRICAIN D’ÉTUDES GÉOLOGIQUES.

[Efundelo wɛnya kanga osato wa lo lɛkɛ 4]

© William Daniels/Panos Pictures

2. Ndjala ya kasha

“Ndjala ya kasha yayuyala.”—MAKO 13:8.

● Pami kɛmɔtshi akalawɔ l’ɔtɛ wa ndjala lo ngielongelo mɔtshi yelɛwɔ Quaratadji lo wodja wa Niger. Ana waki kosɛ nyango ahende, la pami la la womoto vɔ lawɔ wakaye oma lo ngielongelo kina ya lo wodja ɔsɔ dia ndawɔ ndjala. Koko, pami kɛsɔ aketamaka ndamɛ lo toho diakandalaka la nkɛtɛ. Lande na kakinde ndamɛ? Sidi owandji wa ngielongelo shɔ mbutaka ɔnɛ: “Nde bu l’akoka wa ndesha [ase nkumbo kande] ndo nde hakoke ntetemala mbaenda wadiɛnɛ la ndjala.”

AKAMBO ASƆ ƐNYAWƆ? L’andja w’otondo, suke l’onto 1 l’anto 7 hawokoke ndɛ dimɛna lushi tshɛ. Lofulo lɔsɔ ndeka mbudɛ lo wedja wa l’Afrique wa lo sidɛ-Sahara, lɛnɛ ele onto 1 l’anto 3 wekɔ la ndjala kahashile. Dia sho nshihodia dikambo sɔ dimɛna, tɔshi dia nkumbo kɛmɔtshi kengama la papa, mama ndo ɔna. Naka mbo ya ndɛ yekɔ paka y’anto ahende, onto akɔna layotshikala la ndjala? Onde papa, mama kana ɔna? Ɔsɔnwɛlɔ wa ngasɔ mbahomba nkumbo ya ngasɔ nsala lo kɛnɛ kendana la mbo ya ndɛ yakondjawɔ lushi la lushi.

KAKƆNA KATA ANTO EFULA? Anto efula mbutaka ɔnɛ nkɛtɛ kekɔ lo ngɔnya mbo ya ndɛ efula yakoka anto tshɛ ndota. Koko, kɛnɛ kahombama ele nkamba dimɛna la mbo ya ndɛ yakɔ.

ONDE KƐNƐ KATAWƆ KƐSƆ KEKƆ MƐTƐ? Lo mɛtɛ, akambi wa dikambɔ kokaka ngɔnya ndo mɛmba diangɔ efula oleki woho wakasalemaka ntondo l’ɔkɔndɔ w’ana w’anto. Ndo, mandji y’ana w’anto pombaka nkamba dimɛna la mbo ya ndɛ ya la nkɛtɛ dia nkandola okakatanu wendana la ndjala. Koko, oyadi vɔ kodjaka welo dia nshidiya ndjala l’edja k’ɛnɔnyi akumi, hawokokaki nkandola dikambo sɔ pondjo.

KAKƆNA KAFƆNYAYƐ? Onde Mako 13:8 ekɔ lo kotshama? Kânga mbambohama awui wa tshulatshula, shi ndjala yekɔ lo ntetemala mpɛnyahɛnya anto wa l’andja w’otondo?

Mbala efula adidimu wa nkɛtɛ ndo ndjala ya kasha mbelaka ekakatanu ekina wakenga djembetelo yɛnya ɔnɛ tekɔ lo nsɛna lo nshi y’ekomelo.

[Efundelo wa l’etei w’odingɔ wa lo lɛkɛ 5]

“Olekanyi ɔna ɔtɔi l’ana asato wavɔ l’ɔtɛ wa hemɔ ka l’asasa, lɔkɛdi ndo hemɔ kina wotoshimbamɛ otondongaka vɔ ndeshamaka dimɛna.”—ANN M. VENEMAN, ƆNƆMBƆDI W’EDJEDJA WA TSHUNDA DIELƐWƆ UNICEF.

[Efundelo wɛnya kanga osato wa lo lɛkɛ 5]

© Paul Lowe/Panos Pictures

3. Elando

‘Anto wayodiɛnɛ l’elando wa wolo.’—LUKA 21:11.

● Bonzali, dɔkɔtɛlɛ dimɔtshi di’ose Afrikɛ diakadjasɛka lo wodja ɔmɔtshi wakadiɛnɛ l’ata akasakɛka atshimi wa mbɔkɔ wa lo ngelo kakinde wakatataka hemɔ ka Marburg.a Nde akayange ekimanyiyelo oma le ewandji wa l’esomba wa weke, koko vɔ kombokimanyiya. Ekimanyiyelo kakayotomamaka l’ɔkɔngɔ wa ngɔndɔ nyɛi, lâsɔ ko Bonzali amboshila la mvɔ. Atshimi wa mbɔkɔ wakandasakɛka wakosambiya hemɔ ka Marburg kɛsɔ.

AKAMBO ASƆ ƐNYAWƆ? Hemɔ yaya oma l’ɔhɛngɛlɔ, (ɛnyɛlɔ oko hemɔ ya l’asasa), ka lɔkɛdi, SIDA, lɔkɔsu la lohondja ndo malaria ekɔ l’atei wa hemɔ yadakisha anto l’andja w’otondo. Atete edja, elando etanu wa wolo ɛsɔ wakadiake anto oko miliyɔ 10 la nunu esambele. Ndo nto, elando wekɔ lo ndjaka suke l’onto ɔtɔi l’ɔkɔngɔ wa sɛkɔndɛ shato l’edja k’ɔnɔnyi w’otondo.

KAKƆNA KATA ANTO EFULA? Anto efula mbutaka ɔnɛ lam’ele anto wa l’andja w’otondo wekɔ lo tatetemala fulanɛ, lâsɔ elando pombaka ndjala efula. Mbokɛmaka hwe dia anto efula kokaka sambemɛ hemɔ.

ONDE KƐNƐ KATAWƆ KƐSƆ KEKƆ MƐTƐ? Anto wa l’andja w’otondo wekɔ lo tatetemala fulanɛ lo yɛdikɔ y’efula. Ngasɔ mbambofulanɛ ndo akoka wele l’anto wa nsɛdingola, mbishola ndo nsaka hemɔ. Shi lâsɔ elando ndo shɛngiya ya wolo yele lawɔ lo tshunda di’anto pombaka nkitakita? Koko aha kɛsɔ mbasalema.

KAKƆNA KAFƆNYAYƐ? Onde anto wekɔ lo ntata elando wa wolo oko wakadite Bible?

Adidimu wa nkɛtɛ, ndjala ya kasha ndo elando wamboshila miliyɔ y’anto oshiki. Miliyɔ y’anto wekɔ lo diɛnɛ oma le asekawɔ anto, mbuta ate wekɔ lo pɛnyahɛnyama oma le anto wahomba mbakokɛ. Tende kɛnɛ kakewoya prɔfɛsiya ya lo Bible ɔnɛ tɔ mbayosalema.

[Nɔte ka l’ɛse ka dikatshi]

[Efundelo wa l’etei w’odingɔ wa lo lɛkɛ 6]

“Ekɔ dui dia kɔlɔ efula dia ndɛma aha oma le kɔyi kana ɛngɔ kekina koko oma le hemɔ mɔtshi ya wolo efula ya l’etei ka demba ndo mɛna woho wahɛnyahɛnyayɔ anto wotodingi.”—MICHAEL OSTERHOLM, ÉPIDÉMIOLOGISTE.

[Efundelo wɛnya kanga osato wa lo lɛkɛ 6]

© William Daniels/Panos Pictures

4. Anto hawotonga la ngandji ka mɛtɛ

‘Anto hawotonga la ngandji ka mɛtɛ otsha le ase nkumbo yawɔ.’—2 TIMOTE 3:1-3.

● Chris ekɔ lo nkamba lo tshunda dimɔtshi diakimanyiya anto wahɛnyahɛnyawɔ l’atei wa nkumbo lo nɔrdɛ ka Royaume-Uni. Nde mbutaka ate: “Lekɔ lo mbohɔ womoto ɔmɔtshi lakawakɔmɔla wolo efula ndo dimi kokoka mbêya nto. Wamato amɔtshi kɔmamaka efula polo lo yɛdikɔ yahawakoke kânga ndjihola washo.”

AKAMBO ASƆ ƐNYAWƆ? Lo wodja ɔmɔtshi wa l’Afrikɛ, wakeyana suke la womoto 1 l’atei wa wamato 3 la wolo etena kakiwɔ ana w’akɛnda. Ɔkɔnya ɔmɔtshi wakawasale lo wodja akɔ wâmɛ akɛnya dia ndekana pami ɔtɔi l’apami asato mbɔsaka dia bu kɔlɔ vɔ nkɔmɔla wadiɛwɔ. Koko, aha wamato ato mbahɛnyahɛnyama la ngelo. Ɛnyɛlɔ lo wodja wa Canada, suke l’apami 3 lo 10 kulamaka kana pɛnyahɛnyamaka oma le wadiɛwɔ.

KAKƆNA KATA ANTO EFULA? Anto efula mbutaka ɔnɛ nshi tshɛ anto wokɔhɛnyahɛnyamaka lo nkumbo yawɔ. Koko, anto wamboleka mbidja yimba lo dikambo sɔ ɛlɔ kɛnɛ oleki woho wakawadjaka lo nshi yakete.

ONDE KƐNƐ KATAWƆ KƐSƆ KEKƆ MƐTƐ? Sho mbeyaka dia ɛhɛnyɔhɛnyɔ wamboyoleka fulanɛ l’ɛnɔnyi akumi weke kambeta. Ko, onde woho weyaso akambo asɔ ambokitshakitsha lofulo l’anto wahɛnyahɛnyawɔ lo nkumbo? Ndoko, aha ngasɔ mbediɔ. Woho wahayokana anto ngandji ka mɛtɛ l’atei wa nkumbo mbamboleka mfudia dikambo sɔ.

KAKƆNA KAFƆNYAYƐ? Onde ɛtɛkɛta wele lo 2 Timote 3:1-3 wambokotshama? Shi anto efula bu la ngandji ka mɛtɛ otsha le ase nkumbo yawɔ?

Prɔfɛsiya ka tanu katakotshama ɛlɔ kɛnɛ mendanaka la ngelo yaso ndo l’okama aso wa nkɛtɛ. Tɔsɛdingole kɛnɛ kata Bible lo dikambo sɔ.

[Efundelo wa l’etei w’odingɔ wa lo lɛkɛ 7]

“Ɛhɛnyɔhɛnyɔ wa la ngelo mbeyamaka oko dikambo dimɔtshi dioleki woke diahashile diamboleka diangana lo tshunda di’anto. Lo yɛdikɔ ya l’atei atei, womoto ɔtɔi kulamaka oma le olonganyi ande mbala 35 la ntondo ka nde mbelɛ apulushi.”—YƐMB’AWUI YA WAMATO YENDANA L’EKIMANYIYELO KA WANƐ WAHƐNYAHƐNYAMA L’ATEI WA NKUMBO.

5. Wayolanya nkɛtɛ

‘Nzambi ayolanya wanɛ watolanyaka nkɛtɛ.’—ENYELO 11:18.

● Pirri pami kɛmɔtshi kadjasɛ la Kpor, lo wodja wa Nigéria ekɔ lo munda okanda wa wanu w’ashi. Atoko wakandalaka wanu wakalanyema la pitilɔ kakawokɛ lo Delta du Niger. Nde mbutaka ate: “Pitilɔ kɛsɔ kakadiake nse yaso, kakalanya alemba aso ndo nkushi yaso. Laya bu nto l’olimu wa nkamba dia ndjasɛnya.”

AKAMBO ASƆ ƐNYAWƆ? Lo ndjela nomb’ewo mɔtshi, tɔnɛ miliyɔ 6 la nunu 500 ya mindo yekɔ lo mbikashema lo ndjale ɔnɔnyi tshɛ. Suke la pursa 50 ya mindo shɔ yekɔ diangɔ dia ponde diatshikala ɛnɔnyi nkama la ntondo ka diɔ ndanyema. Lâdiko dia ndanya nkɛtɛ, anto wekɔ lo ndanya diangɔ dia la nkɛtɛ lo yoho ya kɔlɔ efula. Wekelo ɛmɔtshi mɛnyaka ɔnɛ dia nkɛtɛ ndjokaloya diangɔ diokambi anto l’edja k’ɔnɔnyi ɔtɔi, pombaka mbeta ɔnɔnyi ɔtɔi la ngɔndɔ tshanu. Jurnalɛ mɔtshi (Sydney Morning Herald) ya lo wodja wa Australie mbutaka ɔnɛ: “Naka vɔ ntetemala ndanya nkɛtɛ lo yoho shɔ, kete tayonga l’ohomba wa nkɛtɛ ndodiama l’ahende l’ɔnɔnyi 2035.”

KAKƆNA KATA ANTO EFULA? Anto efula mbutaka ɔnɛ anto wekɔ la yimba ndo vɔ kokaka nkandola ekakatanu tshɛ watomba. Sho kokaka nkandola akambo asɔ ndo nkokɛ nkɛtɛ.

ONDE KƐNƐ KATAWƆ KƐSƆ KEKƆ MƐTƐ? Anto efula wayakambɛ vɔamɛ kana wakamba l’olui mbeyaka akambo asɔ dimɛna. Koko, nkɛtɛ kekɔ lo ntetemala ndanyema l’ahole tshɛ.

KAKƆNA KAFƆNYAYƐ? Onde ekɔ ohomba dia Nzambi mbekɛ lonya ndo nkokɛ okama aso wa nkɛtɛ diaha vɔ ndanyema oko wakandalake?

Lâdiko dia prɔfɛsiya tshanu yambotɔsɛdingola, Bible akewoya awui amɔtshi w’amɛna wayosalema lo nshi y’ekomelo. Tɔsɛdingole dui dimɔtshi lo prɔfɛsiya ka samalo.

[Efundelo wa l’etei w’odingɔ wa lo lɛkɛ 8]

“Lekɔ lo ndjaoka oko onto lambomɔ oma lo paradiso dia monga lo dihole dia kɔlɔ diokɛwɔ mindo.”—ERIN TAMBER, ONTO ƆMƆTSHI LADJASƐ LA CÔTE DU GOLFE, LO WODJA W’ÉTATS-UNIS, LAYAKIYANYA LO KƐNƐ KENDANA LA SHƐNGIYA YAKI LA PITILƆ KAKAWATSHOLA LO GOLFE DU MEXIQUE LO 2010.

[Kiombo ya lo lɛkɛ 8]

Onde Nzambi mbele lo kiɔkɔ?

Lam’ele Bible akatatshi di’akambo wa kɔlɔ wɛnaso ɛlɔ kɛnɛ wayosalema, onde kɛsɔ mɛnyaka dia Nzambi mbele lo kiɔkɔ y’akambo asɔ? Onde nde mbasala dia sho nsowa? Wɛ kokaka ntana ekadimwelo w’eshika lo ambola asɔ lo tshapita 11 ya dibuku Bible etshatɔ mɛtɛ? diakatondjama oma le Ɛmɛnyi wa Jehowa.

[Efundelo wɛnya kanga osato wa lo lɛkɛ 8]

U.S. Coast Guard photo

6. Olimu w’esambishelo wasalema l’andja w’otondo

“Lukumu l’ololo lone la diulelu layusambishama lu kete tshe.”—MATEU 24:14.

● Vaiatea ekɔ lo mbidjasɛ lo disɛnga dimɔtshi dianganyi etale efula dia lo Pacifique l’archipel wa Tuamotu. Kânga mbele disɛnga dia Tuamotu ekɔ disɛnga diokengami la tɔsɛngasɛnga suke la 80, diɔ diekɔ disɛnga diele la woke wa kilɔmɛtɛlɛ ndekana 802 900 lo ndjɛkɛ yakɔ nyɛi ndo diɔ diekɔ l’anto oko 16 000 wadjasɛ lɔkɔ. Koko, Ɛmɛnyi wa Jehowa wakasambisha Vaiatea nde l’asukanyi ande. Lande na? Nɛ dia Ɛmɛnyi wa Jehowa kombolaka nsambisha anto tshɛ lokumu l’ɔlɔlɔ la Diolelo diaki Nzambi l’ahole tshɛ wodjashiwɔ.

AKAMBO ASƆ ƐNYAWƆ? Kɛsɔ mɛnyaka dia losango la Diolelo lambokoma le anto wa l’atshuku tshɛ wa nkɛtɛ. Lo 2010, Ɛmɛnyi wa Jehowa wakasambisha wenya ndekana miliyara ɔtɔi la miliyɔ kama shamalo lo wedja 236. Kɛsɔ mɛnyaka dia Ɔmɛnyi wa Jehowa tshɛ sambishaka yɛdikɔ ya l’atei atei ya minitɛ 30 lushi tshɛ. L’ɛnɔnyi akumi weke ka mbeta, vɔ wakatondja ndo wakakahanya ekanda walembetshiya Bible ndekana miliyara 20.

KAKƆNA KATA ANTO EFULA? Anto efula mbutaka ɔnɛ losango la lo Bible lambosambishama ɛnɔnyi nunu.

ONDE KƐNƐ KATAWƆ KƐSƆ KEKƆ MƐTƐ? Lo mɛtɛ, anto efula wambosambishama losango lɔmɔtshi l’oma lo Bible. Koko, anto efula wakalisambisha paka lo tshanda ya tshitshɛ ndo l’ahole amɔtshi ato. Lo yoho yotshikitanyi, Ɛmɛnyi wa Jehowa wekɔ lo nkamba olimu w’esambishelo l’andja w’otondo lo yoho yokongɛmi dimɛna yakoka munanda miliyɔ nkama y’anto. Ɛmɛnyi wa Jehowa wekɔ lo ntetemala nsambisha kânga mbahomanawɔ l’ɔlɔshamelo wa wolo oma le ewandji wa lokumu la wa ngala ndo atshunda woleki wolo l’edja tshɛ k’ɔkɔndɔ w’ana w’anto.a (Mako 13:13) Ndo nto, Ɛmɛnyi wa Jehowa hawofutama l’ɔtɛ wasambishawɔ. Koko, la lolango tshɛ vɔ kimɔka wenya awɔ ndo ekanda awɔ aha la nɔmba anto falanga. Olimu awɔ sukamɛ oma lo weshasha wa la lolango wakimɔma.

KAKƆNA KAFƆNYAYƐ? Onde “lukumu l’ololo la diulelu” lambosambishama l’andja w’otondo? Onde okotshamelo wa prɔfɛsiya kɛnɛ mɛnyaka dia dikambo dimɔtshi dia dimɛna dianga salema kem’edja?

[Nɔte ka l’ɛse ka dikatshi]

[Efundelo wa l’etei w’odingɔ wa lo lɛkɛ 9]

“L’edja tshɛ kaketawɔ Jehowa, tayotetemala nsambisha lokumu l’ɔlɔlɔ la Diolelo l’ohetoheto, lo nkamba la toho tshɛ takoka dia munanda anto.”—ANNUAIRE 2010 DES TÉMOINS DE JÉHOVAH.

Tena di’amɛna efula diekɔ lo tokongɛ la ntondo!

“Etenyi ka tshitshe ketu, k’untu a kolo hatanema ntu . . . Keli akanga a memakana wayukita kete, ndu wayongenangena la etshoko efula wa ki.”—OSAMBU 37:10, 11.

ONDE wɛ kombolaka mɛna ekotshamelo ka prɔfɛsiya kele la diko kengo? Aha la tâmu, wɛ kombolaka. Tekɔ l’ɛkɔkɔ w’eshika watoshikikɛ dia prɔfɛsiya kengo kayanga nkotshama kem’edja.

Lo asawo wetshi, takasɛdingola prɔfɛsiya mɔtshi ya lo Bible yatoshikikɛ dia tekɔ lo nsɛna lo “nshi y’ekumelu.” (2 Timote 3:1-5) Nzambi akasambiya afundji wa Bible dia vɔ mfunda akambo asɔ dia sho monga l’elongamelo. (Romo 15:4) Ekotshamelo ka prɔfɛsiya shɔ mɛnyaka dia asui wele la so kakianɛ wanga nshila kem’edja.

Kakɔna kayosalema l’ɔkɔngɔ wa nshi y’ekomelo? Diolelo diaki Nzambi diayolɛ lo nkɛtɛ k’otondo. (Mateu 6:9) Tɔsɛdingole akambo wɛnya Bible ɔnɛ wayosalema la nkɛtɛ lo nshi shɔ:

● Ndjala yayoshila. “Kete ya l’ete w’akuna yayongonyaka mbu ya nde efula.”—Osambu 72:16.

● Hemɔ yayoshila. “Nduku untu ludjashi la Jerusalema ayuta ati: Dimi la kandji!”—Isaya 33:24.

● Nkɛtɛ kayokalola oyoyo. “Usui wa shenga la kete ya wumu wayongenangena. Kete y’ufumbu yayutundja mamasongo yato alembo w’amena.”—Isaya 35:1.

Ɔnɛ ekɔ paka prɔfɛsiya ngana ya lo Bible yasha ekeketshelo yanga nkotshama kem’edja. Lande na kahayambola Ɛmɛnyi wa Jehowa dia vɔ kɛnya bonde kewɔ l’eshikikelo k’ɔnɛ nshi y’amɛna efula yekɔ lo tokongɛ la ntondo?