kuyanga utali, kuyanga ohongo, kuyanga engo kekina kakatungama kayeya ntanganya uma lu ngandji ka [Nzambi] keli le Kristu Jesu Khumesu.” (Romo 8:37-39) Naka sho mbeka dia ndjaɛkɛ le Nzambi ndo mbôkitanyiya, kete tayokoka kondja wahɔ oma lo ngandji ka shikaa kokaso Nkum’Olongo. Ande diɛsɛ diele la so dia nangema oma le Nzambi lo yoho shɔ lee!

4 Tekɔ la lowando lo kɛnɛ kambosala Nzambi lo dikambo diaso. Jehowa mbele Otungi aso. Lâdiko dia lâsɔ, nde kotshaka aha tsho ehomba aso wa lo lɔsɛnɔ, koko nde toshaka ndo diangɔ dietɛ lɔsɛnɔ lakɔ ɔlɔ. Lo mɛtɛ, nde mbele Kiɔkɔ ya woshasha tshɛ w’ɔlɔlɔ. (Jakoba 1:17) Davidi, pami ka kɔlamelo kaki la lowando lo ngandji ka lɔsɛngɔ kaki Nzambi akafunde ate: “We [Jehowa Nzambi k]ami, akambu wa mamba wakayatshi, la tukanyi takayakani lu dikambu diasu, . . . vo weko efula kaheyama mbala.”​—Osambu 40:5.

5 Atunyi aso amɔtshi mbeyaka ndjokadimɔ. Wɛ koka kimanyiya atunyi ayɛ lo tetemala mboka Nzambi wɔma ndo mbôlanga, aha lo sekola ɛlɛmbɛ ande. Tɔsɛdingole kɛnɛ kakatshe ewotɔ waki Yeso. L’etatelo, vɔ komonga la mbetawɔ le nde, koko wakate ɔnɛ: “Ndi ambudjo dadi.” (Mako 3:21; Joani 7:5) L’ɔkɔngɔ wa nyɔi ka Yeso ndo wa eolwelo kande, efula ka l’atei awɔ wakayokomaka ambetawudi. Jakɔba la Judɛ w’anango Yeso wakayoshaka lonya l’ofundelo wa Afundelo. Ɛnyɛlɔ kekina ele ka Saulo laki osoyanyi ndo lakayokomaka ɔpɔstɔlɔ Paulo. Anto amɔtshi watosoya l’etena kɛnɛ mbeyaka ndjokoma lo mɛna dia tekɔ la akambo wa mɛtɛ wa lo Bible l’ɔtɛ wayashikikɛso la dihonga tshɛ dia nama kɔlamelo yaso.​—1 Timote 1:13.

Ɛnyɛlɔ, Aberash, womoto ɔmɔtshi la lo Afrikɛ akalɔmbɛ dia nde mbeya akambo wa mɛtɛ wendana la Nzambi. L’ɔkɔngɔ wa nde tatɛ mbeka Bible la Ɛmɛnyi wa Jehowa, ase nkumbo kande la ewandji wa l’ɔtɛmwɛlɔ wakinde wakɔhɛnyahɛnya wolo efula. Ewotɔ ande ɛmɔtshi wakatatɛ mbeka Bible wakayotshikaka mbeka l’ɔtɛ wa wɔma w’onto. Koko, nde akasɛngasɛnga Nzambi dia nde mbosha wolo ndo dihonga ndo nde akayobatizamaka oko Ɔmɛnyi ɔmɔtshi wa Jehowa. Etombelo akɔna wakonge? Ewotɔ ande enanɛi wakayokondjaka dihonga oma lo ɛnyɛlɔ kande, wakayotatɛka mbeka Bible nto ndo wekɔ lo tahame dimɛna lo nyuma.

Wɛ koka nɛndja wɔma w’onto

Diaha wɛ nkɔ lo ndjonga ya wɔma w’onto, sala kɛnɛ tshɛ kakokayɛ sala dia keketsha ngandji kokayɛ Nzambi. Wɛ koka sala dui sɔ lo mbekaka Bible la lo kanaka yimba la avɛsa wele oko Heberu 13:6, divɛsa diata ɔnɛ: “Khumadiondjo keli ukimanyidi ami; haluki woma. Kayuntshela untu?” Tohɛke ɛkɔkɔ wɛnya dia mboka Nzambi wɔma lo dihole dia anto mbele dui di’ɔlɔlɔ ndo dia lomba dia sala.

Tohɛke nto dia anto kondjaka wahɔ efula lo kamba la kɛnɛ kekawɔ oma lo Bible. Wɛ kokaka kondja ekadimwelo wa shikaa lo ambola w’ohomba wa lo lɔsɛnɔ. Wɛ koka kondja lomba l’oshika layokokimanyiya dia kandola ekakatanu wa lo lɔsɛnɔ. Wɛ koka monga l’elongamelo ka dimɛna kânga l’atei wa lɔsɛnɔ la pâ lele nshi nyɛ. Ndo etena tshɛ, wɛ koka ndjasukanya la Nzambi Kanga-Wolo-Tshɛ l’ekimanyielo ka dɔmbɛlɔ.

Ɔpɔstɔlɔ Joani akafunde ate: “Akambu wa la kete la saki yawo wayushila. Keli one latutshaka lulangu la [Nzambi], atuyalaka pundju.” (1 Joani 2:17) Ɔnɛ ekɔ etena ka tshikala nge ndo ka kɛndakɛnda lo wɔma wa Nzambi. Lo dihole dia tshika dia wɔma w’onto kɔkɔmɔla, wɛ koka sɔna dia kitanyiya dako diaki Nzambi nɛ: “On’ami, uyali kanga yimba, ongenyangenya utema ami. Ku dimi layeya nkaluya diui le one latomonyolaka.” (Tukedi 27:11) Ande diɛsɛ dia woke lee!

Ohɔ dia ndoko onto lakoka kosha kɛnɛ kayosha Nzambi wanɛ wawoka wɔma: “Difutu dia ndjakitshakitsha la woma wa [Jehowa] dieli: ekundji, nemo la lumu.”​—Tukedi 22:4.

Paka Nzambi Mbakoka Shimbɛ Nkɛtɛ

“ƐNGƆ K’OLANGALA, K’ODIMA NDO KA WƐMA.” Kɛsɔ mbakate nomb’ewo Edgar Mitchell lo dikambo di’okama aso wa nkɛtɛ etena kakandendaka okama akɔ oma lo dihole dia wodjima dia lo loowa.

Nzambi akadje welo efula dia nɔngɔsɔla nkɛtɛ woho wa tɔ monga dihole di’anto mbidjasɛ. Etongelo katɔ kakatshutshuya andjelo dia ‘nembɔlembɔ l’ɔngɛnɔngɛnɔ.’ (Jobo 38:7) L’ɔkɔngɔ wa sho mbeka diangɔ dia diambo dia l’okama aso wa nkɛtɛ, sho lawɔ tekɔ l’ɔkɔkɔ wa nembɔlembɔ l’ɔngɛnɔngɛnɔ. Tekɔ la diangɔ efula dia wolo shihodia l’okama aso wa nkɛtɛ diakimanyiya dia lɔsɛnɔ monga la nkɛtɛ. Kɛmɔtshi l’atei adiɔ ekɔ woho wakamba tombatomba la esase wa wonya, gaz carbonique k’oma lo hiɛlɛlɛ ndo ashi dia tondja mbo ya ndɛ. Oma lo diangɔ sɔ mbotombi ndo hiɛlɛlɛ yahɛngaso.

Bible mɛnyaka dia Nzambi akasha onto ɔkɛndɛ wa nama nkɛtɛ. (Etatelu 1:28; 2:15) Koko diaha nde kilanya, onto akahombe monga la dionga di’ɔlɔlɔ. Nde akahombe nanga edjaselo kande, mbuta ate nkɛtɛ. Nde akahombe kombola dia kietɛka nshi tshɛ olangala. Koko lam’ele onto akatongama la lotshungɔ la nsɔna, nde akakoke nsɔna dia kamba la nkɛtɛ lo yoho ya kɔlɔ. Kɛsɔ mɛtɛ mambosala onto. Etombelo wa kɔlɔ wamboya oma lo woho waki onto konama nkɛtɛ dimɛna ndo oma lo lokaki lande.

Ekakatanu ɛmɔtshi wamboya oma lo dikambo sɔ vɔ ɛnɛ: 1) Lomanu l’esongo wa l’okonda hayosha nkɛtɛ diaaso dia monga la gaz carbonique kakimanyiya diaha avula kana ɔwɔ wambotamanya ndjala. 2) Okambelo wa tshambandeko wa la ekanga wadiaka tofumbɔfumbɔ ekɔ lo ndjaka tofumbɔfumbɔ efula takimanyiya dia mbidja ɛtɛtɔ l’esongo kana lo waa ntɔngɔ yonɛma. 3) Wondelo wa nse wa tshambandeko ndo mindo yakashawɔ l’ashi a wake kana lo waa nkushi nkina yekɔ lo kitshakitsha lofulo la nse. 4) Woho wakamba onto la lokaki tshɛ la ekundji wa la nkɛtɛ pondjaka nɔnga yayaye kɛnɛ kewɔ l’ohomba ndo kokaka konya esadi eto dia tanyi ndeka mbalɛ l’andja w’otondo. Waa nomb’ewo mɔtshi yendana l’ahole wadjasɛ anto mɛnyaka dia tanyi ta wolo tayonga l’andja w’otondo lo woho ɔnɛ wele waa glaciers (ekama wa tosaka tosaka wa longe l’ekama) yele lo pôle sud (koma ka nkɛtɛ ka sidɛ) la lo pôle nord (koma ka nkɛtɛ ka nɔrdɛ) yayɔlɛlɔ.

Lo menda mpokoso y’oma lo diangɔ diakatongama yatatetemala la tomba, anto amɔtshi kokaka mbuta ɔnɛ nkɛtɛ yɔ lawɔ yayɔtɔmbɔkɔ lushi lɔmɔtshi, ko anto wayodiɛnɛ. Nzambi akatosha nkɛtɛ woshasha. Wakasha onto nkɛtɛ dia nde mbidjasɛ lɔkɔ aha la futa kânga ɛngɔ. (Etatelu 1:26-29) Koko, awui weta nshi nyɛ l’andja w’otondo mɛnyaka dia anto efula hawokombola dia kokɛ okama a nkɛtɛ wodjashiwɔ w’olangala ɔnɛ. Lo dihole dia vɔ kokɛ nkɛtɛ, vɔ wekɔ lo ndjasha l’eyango kana l’elimu awɔ wa lokaki. Ɔnkɔnɛ, anto wambɛnya dia vɔ wekɔ ambidjashi wa kɔlɔ ‘walanya nkɛtɛ’ oko wakadiatama lo Enyelo 11:18.

Prɔfɛsiya ya lo Bible mɛnyaka dia Jehowa Nzambi Kanga-Wolo-Tshɛ, ndo Otungi wa diangɔ diasɛna la nkɛtɛ ‘ayolanya’ anto wa kɔlɔ wodjashi la nkɛtɛ. (Zefaniya 1:14; Enyelo 19:11-15) La ntondo k’anto ndanya nkɛtɛ kɛnɛ lo yoho yambotamba olelo, Nzambi ayekɛ lonya aha la tshimbatshimba oleki ndo woho walongamɛso.a (Mateu 24:44) Lo mɛtɛ, paka Nzambi mbakoka shimbɛ nkɛtɛ.

[Nɔte ka l’ɛse ka dikatshi]

Onto hayala la lomu nɛ dia mma to Woho wakamahande lo mpango ya nkanu y’ase Nazi

KƆNDWAMA OMA LE JOSEPH HISIGER

Dimi lakambola osekami ɔmɔtshi la lo lokanu nte: “Kakɔna kadiayɛ?” Nde akakadimola ate: “Bible,” ndo akakotsha ate: “Layokoshatɔ naka wɛ mbishami mbo ya ndɛ yayɛ ya lomingu l’otondo.”

DIMI lakotɔ lo Ngɔndɔ ka sato 1, 1914, l’osomba wa Moselle, wele lo etena kɛsɔ vɔ waki lo lɛkɛ l’ase Allemagne. L’ɔkɔngɔ wa Ta dia ntondo di’andja w’otondo komɛ lo 1918, osomba wa Moselle wakayongaka nto lo ɛlɔmbwɛlɔ ka wodja wa France. Lo 1940, vɔ wakayendamaka nto oma le wodja w’Allemagne. Oma lâsɔ, lam’akayokomɛka Ta dia hende di’andja w’otondo lo 1945, osomba ɔsɔ wakayendamaka nto oma le wodja wa France. Lo waaso asɔ tshɛ, lakatshikitanyaka wodja ami, ɔnkɔnɛ, lakeke ɔtɛkɛta wa Falase la wa allemand.

Ambutshi ami waki andjashi Nzambi w’aseka Mupɛ. Otsho tshɛ la ntondo ka sho ndala, takakaka adwe dia nɔmba. Lo nshi ya mingu ndo ya vakashi ya wodja, takatshɔka l’ɔtɛmwɛlɔ. Dimi lakayasha tshɛ l’ɔtɛmwɛlɔ ami ndo lakayokomaka ɔmɔtshi la l’olui wa wekelo wa l’ɔtɛmwɛlɔ w’aseka Mupɛ.

Lakayoyasha l’olimu w’Ɛmɛnyi wa Jehowa l’ohetoheto

Ɛmɛnyi wa Jehowa ehende wakatshu tosambisha ambutshi ami lo 1935. Sawo diawɔ diakendanaka la woho wakayatambiya ase ɛtɛmwɛlɔ lo Ta dia ntondo di’andja w’otondo. L’ɔkɔngɔ wa lâsɔ, nsaki kami ka mbeya akambo efula wa lo Bible kakahame ndo lo 1936, lakalɔmbɛ osasɛrdɔsɛ ɔmɔtshi dia nde mbishami Bible kɛmɔtshi. Nde akambutɛ ate dia wɛ kishihodia dimɛna, wɛ pombaka mbeka teoloji. Ɔnkɔnɛ, okadimwelo ɔsɔ wakafudia nsaki kami ka monga la Bible kɛmɔtshi ndo kiadiaka.

Lo Ngɔndɔ ka ntondo 1937 Albin Relewicz, osekami ɔmɔtshi la l’olimu laki Ɔmɛnyi wa Jehowa akatatɛ sawola la mi akambo wetsha Bible. Dimi lakawombola nte: “Onde wɛ ekɔ la Bible kɛmɔtshi?” Nde akakadimola ate, eelo, ndo esadi eto nde akamɛnya lokombo laki Nzambi, Jehowa lo Bible kɛmɔtshi kakatondjama oma le ose Allemagne ɔmɔtshi lelɛwɔ Elberfelder, ndo nde akambishatɔ. Lakatatɛ kiadia l’ohetoheto tshɛ ndo lakatatɛ mbɔtɔ lo nsanganya y’Ɛmɛnyi wa Jehowa yakasalemaka l’osomba wa Thionville wakasukana la so.

Lo Ngɔndɔ k’enanɛi 1937, lakatshindɛ Albin lo losanganya lɔmɔtshi la woke la wedja efula lakasale Ɛmɛnyi wa Jehowa l’osomba wa Paris. Lɛkɔ mbakamatotatɛ sambisha lo soko la soko. Kombeta edja, lakabatizama ndo l’etatelo k’ɔnɔnyi 1939, lakakome ombatshi mboka, mbuta ate okambi w’Okristo wa lo tena tshɛ, ndo wakatome l’osomba wa Metz. Oma lâsɔ, lo Ngɔndɔ k’esambele wakambete dia tokamba lo Bɛtɛlɛ k’Ɛmɛnyi wa Jehowa ka l’osomba wa Paris.

Asui wa lo nshi ya ta

Olimu ami lo Bɛtɛlɛ kombiviya nɛ dia lo Ngɔndɔ k’enanɛi 1939, wakanɔmbɛ dia dimi tokamba olimu w’ɔsɔlayi kâmɛ l’alembe wa wodja wa France. Dimi kokoka mbetawɔ dia mbɔtɔ l’ata nɛ dia nkum’otema kami kombetawɔka dia dimi sala dikambo sɔ, oma lɔkɔ wakambidje lo lokanu. Etena kakimi lo lokanu lo Ngɔndɔ ka tanu kakayele, alembe wa wodja w’Allemagne wakɔtwɛ alembe wa wodja wa France la ta la shashimoya. Oya lo Ngɔndɔ ka samalo, wodja wa France wakalɛndjama ndo lakayokoma nto ose Allemagne. Ɔnkɔnɛ, lo Ngɔndɔ k’esambele 1940 etena kakawatondja oma lo lokanu, lakakalola dia todjasɛ l’ambutshi ami.

Lam’ele takalɔmbwamaka oma le ase Nazi, takasanganaka dia mbeka Bible lo woshɛshɛ. Takalongolaka Tshoto y’Etangelo oma lo tshimbo yaki Maryse Anasiak, kadiyɛso kɛmɔtshi k’Okristo kaki la dihonga kakahomanaka la mi lo luudu lakawasalaka mapa laki Ɔmɛnyi wa Jehowa ɔmɔtshi. Polo lo 1941, lakewɔ ekakatanu wakahomanaka l’Ɛmɛnyi wa Jehowa lo wodja w’Allemagne.

Ɔnkɔnɛ lushi lɔmɔtshi apulushi wakawelɛka waa Gestapo wakaye ndjomenda. L’ɔkɔngɔ w’owandji awɔ nembetshiyami ɔnɛ olimu w’Ɛmɛnyi wa Jehowa wakashimbama, nde akamumbola dia kana dimi nangaka tshikala Ɔmɛnyi wa Jehowa. Etena kakamakadimola nte, “eelo,” nde akambutɛ dia dimi mboyela. Mama akandama la sase dia wɔma, ko akakɔ hohakayi la nkɛtɛ. Kam’akandɛnyi dikambo sɔ, owandji wa waa Gestapo akambutɛ dia dimi tshikala dia mbokokɛ.

Lo kɔmpanyi kakamakambaka, dimi kombishaka owandji w’olimu mɔyɔ ɔnɛ: “Hitler akemwe!” Lakatone nto dia monga ɔmɔtshi la lo tshunda dia pɔlitikɛ di’aseka Nazi. Ɔnkɔnɛ, waa Gestapo wakamunde la wedi a pindju. Etena kakawambokaka ambola, lakatone dia mbuta nkombo y’Ɛmɛnyi wa Jehowa ekina. Ɔnɛ lakambokaka ambola, akakɔmɔla tshindji di’okoma l’ɔtɛ la wolo tshɛ ko lakakɔ hohakayi. Lo Ngɔndɔ ka divwa 11, 1942, tuminadi ta lânde takawelɛka Sondergericht ta l’osomba wa Metz takafundɛ lokanu l’ɛnɔnyi esato, nɛ dia wakafɔnyaka dia “lakasalɛka Association Les Témoins de Jéhovah ndo Ambeki wa Bible pɔlɔpangandɛ.”

Mingu hiende l’ɔkɔngɔ, wakatondja oma lo lokanu la l’osomba wa Metz ko lakande lɔkɛndɔ yema yema otsha lo mpango ka lokanu ka la Zweibrücken kakawakambishaka anto elimu la wolo. Lɛkɔ, wakambisha olimu wa nɔngɔsɔlaka mboka ka kawolo. Takatshikitanyaka mboka ya kawolo lo keketsha mbolo ya wetsho ko mbokɛ abanga lâdiko. Mbo ya ndɛ yakawatoshaka yaki paka dikɔhɔ di’eloko ɔtɔi la tɛtshi ta mapa tohende la tshenyi la ndjɔngalɔnga y’oshi la midi ndo la dikɔlɔ. Oma lâsɔ, wakayotomaka lo lokanu laki l’osomba wosukanyi la so ndo lɛkɔ lakatokambaka lo luudu lɔmɔtshi lakawalɔngɔsɔlaka sabata. L’ɔkɔngɔ wa ngɔndɔ efula, wakanyomotoma nto la Zweibrücken dia tokamba lo dikambɔ.

Lakayala la lɔsɛnɔ, koko aha nɛ dia mma to

Onto ɔtɔi laki la mi lo lokanu aki ɔna pami ɔmɔtshi laki oma lo wodja wa Pays-Bas. Lo mbeka ɔtɛkɛta ande lo yɛdikɔ mɔtshi, lakonge l’akoka wa mbewoya dietawɔ diami. Nde akahame efula lo nyuma lo yɛdikɔ yele nde akambutɛ dia mbobatiza l’ashi. Etena kakandatombe oma l’ashi, nde akakumbatɛ ndo akate ate: “Joseph, dimi laya ɔnanyɔ la lo nyuma!” Takakakitɔna etena kakawakaloya nto dia tɔlɔngɔsɔlaka mboka ya kawolo.

Etena kɛsɔ, ɔnɛ laki la mi lo lokanu aki ose Allemagne. La dikɔlɔ dimɔtshi, nde akatatɛ mbadia dibuku dimɔtshi dia tshitshɛ, mbuta ate Bible. L’etena kɛsɔ mbakandambutɛ dia nde ayombisha Bible kakɔ naka dimi mbosha mbo ya ndɛ yami ya lomingu l’otondo. Lakokadimola nte: “Kawɔ!” Kânga mbele komonga dikambo dia tshitshɛ dia dimi mbosha mbo ya ndɛ ya lomingu l’otondo, dimi konyanga pondjo l’ɔtɛ wakamasale dikambo sɔ. Lakatatɛ shihodia kitshimudi y’ɛtɛkɛta waki Yeso wata ɔnɛ: “Untu hayala la lumu ne dia ma tu, keli ayuyala la lo ne dia aui tshe watumba uma l’unyo wa [Nzambi].”​—Mateu 4:4.

Oko wakamashile kondja Bible, okakatanu waki la mi aki wa kilama. Otshikitanyi la ase lokanu akina, Ɛmɛnyi wa Jehowa komonga la lotshungɔ la monga la Bible. Ɔnkɔnɛ, lakakiadiaka l’otsho lo woshɛshɛ loyakombi olangitshi. La yanyi, lakakisɔsɔmiyaka la tshina dia shumishi yami ndo lakatɛngɔlaka la tɔ. Takamakokaka kitshika lo lokanu nɛ dia alami wakakokaka ndjɔsɛngɔla diangɔ diami etena kakimi bu laawɔ.

Lushi lɔmɔtshi, etena kakatatshumana dia mbisha alapɔlɔ w’olimu, lakohɔ dia lakohe Bible kami. La dikɔlɔ sɔ, lakakalola la viangowango otsha lo luudu lami la lokanu dia tokiɔsa, koko dimi kokitana. L’ɔkɔngɔ wa dimi nɔmba Nzambi, lakatshu dia tɛnana l’olami wa lokanu ndo lakawotɛ dia onto ɔmɔtshi akɔshi dibuku diami dimɔtshi ndo lekɔ lo nanga dia nde kaloyamidiɔ. Nde akadiɔshi oko dibuku di’anyanya, ɔnkɔnɛ lakayosholaka Bible kami. Lakoke Jehowa losaka oma k’ɛse otema!

Lo diaaso dikina, wakatome otsha lo kihanga ka mbɔka. Etena kakamakololaka ahɔndɔ ami wa mindo, lakakɔsha Bible la mayɛlɛ tshɛ l’odihe. Etena kakambahola olami washo, lakakisɛlɔla la lokolo lami otsha lo kihanga ka mbɔka. Lɛkɔ, dimi lakakishɛ l’omamu etena kakamɔkaka. Etena kakamatombe oma lo kihanga, lakasale woho akɔ wâmɛ ko lakasɔsɔmiya Bible l’atei w’ahɔndɔ wa pudipudi.

Tena di’ɔngɛnɔngɛnɔ ndo dia pâ etena kakimi lo lɔhɔmbɔ

La pindju kɛmɔ lo 1943 etena kakawatshumanya ase lokanu lo sɛkɛ, lakɛnyi Albin! Wakawonde nde lawɔ. Nde akamende tɛɛ ndo akakitsha lonya lande lo tolo dia mɛnya ɔnɛ tekɔ anto l’ɔnango. Oma lâsɔ, nde akamɛnya lo tɔjɛstɛ dia nde ayofundɛ mukanda. Lushi ɔtɔi l’ɔkɔngɔ, etena kakandete lalemi, nde akakɔsha yɛtshi ya dikatshi. Koko, olami wa lokanu akayiɛnyi ko dimi la nde takalongola dilanya dia mingu hiende ya lokanu l’onto ndamɛ. Takikɔ paka la mapa wamboma la ashi ndo takalalaka lâdiko di’abaya aha la ndjakomba olangitshi.

Oma lâsɔ, lakatɔlama otsha lo lokanu la la Siegburg, lɛkɔ lakatokambaka lo makashinyi watshulawɔ fɛsa. Olimu wakikɔ wolo efula koko wakatoshaka mbo ya ndɛ yema tshitshɛ tsho. L’otsho lakɛnyi lo dɔ lalɛ mbo ya ndɛ y’amɛna, mbuta ate ekate l’elowa, koko lakemɔka lele otema hwe ndo la mposa k’ashi. Lakɔndɛ efula. Koko lushi tshɛ, lakadiaka