Le ambadi aso

Periodikɛ kadiayɛ kakianɛ kakatatɛ tondjama lo Ngɔndɔ k’esambele 1879. Lam’ele akambo wa l’andja ɔnɛ wambotshikitana efula, diakɔ diele yoho yotomba periodikɛ kɛnɛ yambotshikitanyema. (Enda esato wele la diko engo.) Ntatɛ oma lo numɛlɔ kɛnɛ, wɛ ayɛna etshikitanu efula lo Tshoto y’Etangelo. Naa etshikitanu ɛsɔ na?

Lo wedja efula, anto kombolaka nsala eyangelo dia mbeya awui l’Ɛtɛrnɛtɛ ndo vɔ ngɛnangɛnaka nsala ngasɔ. Lam’ele Ɛtɛrnɛtɛ kimanyiyaka anto dia mbeya awui esadi, vɔ kokaka ntana awui wewɔ l’ohomba ndo wakokawɔ mbadia. Abuku efula, periodikɛ ndo tojurnalɛ kokaka mbadiema l’Ɛtɛrnɛtɛ.

Lam’ele anto efula ngɛnangɛnaka mbadia l’Ɛtɛrnɛtɛ, tambotshikitanya adrɛsɛ aso wa www.jw.org dia vɔ monga wɔdu dia nsala eyangelo lɔkɔ. Wanɛ wɔtɔ lo sitɛ kaso koka mbadia ekanda wambotondjama l’ɛtɛkɛta ndekana 430. Diakɔ diele, ntatɛ oma lo ngɔndɔ kɛnɛ, wanɛ wɔtɔ lo sitɛ kaso k’Ɛtɛrnɛtɛ kokaka mbadia asawo amɔtshi wakatondjamaka lo periodikɛ wotodjaka kakianɛ paka lo sitɛ kaso.a

Lam’ele tayanga ntatɛ mbidja asawo efula paka l’Ɛtɛrnɛtɛ, lofulo la ndjɛkɛ ya Tshoto y’Etangelo y’anto tshɛ lambokitakita oma lo ndjɛkɛ 32 oya lo ndjɛkɛ 16 ntatɛ lo numɛlɔ kɛnɛ. Tshoto y’Etangelo yekɔ lo tondjama l’ɛtɛkɛta 204. Lam’ele lofulo la ndjɛkɛ lambokitakita, Tshoto y’Etangelo y’anto tshɛ kokaka kadimɔma l’ɛtɛkɛta ekina efula.

Tekɔ l’elongamelo di’etshikitanu ɛsɔ wayotokimanyiya dia sho ndeka nsambisha anto efula losango l’oma lo Bible lashimbɛ nsɛnɔ. Tamboyashikikɛ dia tondjaka asawo lo Tshoto y’Etangelo ndo mbadjaka l’Ɛtɛrnɛtɛ di’ambadi aso efula wele la mbetawɔ lo Bible ndo walanga mbeya kɛnɛ ketshatɔ mɛtɛ.

Afundji