Onde Davidɛ aki l’ɔkɔkɔ wa nongamɛ dia Nzambi mbodja yimba? Onde Nzambi kodjaka yimba? Anto efula wekɔ l’okakatanu dia mbetawɔ ɔnɛ Nzambi Kanga-Wolo-Tshɛ ndjashaka le wɔ. Lande na?

Ɔkɔkɔ ɔmɔtshi ele Nzambi ekɔ la yoho ya lɔsɛnɔ yoleki y’anto la fwa. Oma lo dihole dia laadiko sɔ, nde mɛnaka dia wedja tshɛ “weko uku dipopo di’ashi lu mbaka. Vo weli uku loseke la ditshu ladiku dia kilo.” (Isaya 40:15) Ofundji ɔmɔtshi wa lo nshi yaso nyɛ wa taamu efula akakome polo lo mbuta ɔnɛ: “Ekɔ wolo heyama dia mbetawɔ ɔnɛ Nzambi kɛmɔtshi kayasha le yɛ ndo kadja yimba lo kɛnɛ kasalayɛ ekɔ.”

Lo wedi okina, anto amɔtshi fɔnyaka dia Nzambi hakoke mbadja yimba l’ɔtɛ w’etsha awɔ. Ɛnyɛlɔ, pami kelɛwɔ Jim kahatayala opalanga w’efula, mbutaka ate: “Dimi nɔmbaka Nzambi mbala la mbala dia monga la wɔladi ndo mbahemɛ kɛlɛ kami, koko l’ɔkɔngɔ wa tshanda mɔtshi dimi ndjomalaka nto. L’ekomelo, lakayoshihodia ɔnɛ dimi mbele kanga kɔlɔ ndo Nzambi hakoke kimanyiyami.”

Onde etale kanganyi Nzambi l’anto mbawokonya diaha todja yimba? Ngande mɛtɛ wayaokande lo dikambo dia ditongami diande diele keema kokele? Naka Nzambi hakimanyiyisha onto dia mbeya akambo wendana la nde, kete ndooko lakoka ntɛkɛta lo dikambo dia Nzambi ndo nkadimola ambola asɔ. Koko, awui wakafundama lo ɛlɔmbwɛlɔ ka nyuma ka Nzambi wele lo Bible, toshikikɛka dia Nzambi bu etale l’anto ndo nde ndjashaka le onto l’onto. Bible mbutaka ɔnɛ: “Lo mɛtɛ nde bu etale oma le ɔmɔmɔ la l’atei aso.” (Etsha 17:27) Lo asawo anɛi wayela, tayɔsɛdingola kɛnɛ katotɛ Nzambi lo woho wayashande le anto ndo woho wakandɛnya dia nde ndjashaka le anto wele oko wɛ.

KƐNƐ KAKONYA ANTO AMƆ DIA MONGA LA TAAMU: Lo ndjela eyangelo weke kasalema, galaksi kaso keto mbeyaka monga la planɛtɛ miliyara 100. Lo menda woke woke wele loowa, anto efula ndjambolaka ɔnɛ: ‘Lande na kenda Otungi wele Kanga-Wolo-Tshɛ kɛnɛ kasala anto w’anyanya wele lo planɛtɛ ka tshitshɛ kɛnɛ?’

KƐNƐ KETSHA ƆTƐKƐTA WA NZAMBI: Nzambi kotosha tsho Bible ko ntshika dia ndjasha le so. Diakɔ diatoshikikɛ Jehowa ɔnɛ: “Dimi layukulakaka, layukendaka.”—Osambu 32:8.

Tɔshi ɛnyɛlɔ ka Hangara, womoto l’ose Edjibito lakasɛnaka lo ntambe ka 20 N.T.D. Lam’ele Hangara kɔnɛmiya nkumɛnde Sara, Sara akasha Hangara sɔnyi ko nde akalawɔ l’oswe wa shɛnga. Onde Nzambi kombidja Hangara yimba l’ɔtɛ wakandasale munga? Bible mbutaka ɔnɛ: “Ondjelo wa [Jehowa] akutani.” Ko ondjelo akɔ akashikikɛ Hangara ɔnɛ: “Jehowa akenyi shoko yaye.” Oma laasɔ, Hangara akatɛ Jehowa ɔnɛ: Wɛ ekɔ “[Nzambi] Latomenaka.”—Etatelu 16:4-13.

‘Nzambi latɛnaka,’ kɛnaka ndo wɛ. Tɔshi ɛnyɛlɔ kɛnɛ: Ombutshi wa womoto tolekaka nkokɛ ɔnande la dikɛnda, nɛ dia etena kele ɔna eke dikɛnda mbalekande monga l’ohomba w’ekokelo k’ombutshi ande. Woho akɔ waamɛ mbele, Nzambi tokokɛka lo yoho ya laande etena keso wɔdu ndo kayaokaso oko taya bu l’okokedi. Jehowa mbutaka ɔnɛ: “Dimi [mbi]djase ladiku lu dihuli di’ekila, kame la kanga utema wambate ndu wa ndjakitshakitsha, dia mbulula lumu la kanga ndjakitshakitsha la nkikitsha kanga utema wambate.”—Isaya 57:15.

Koko, wɛ koka ndjambola ɔnɛ: ‘Lo woho akɔna wamenda Nzambi? Onde nde nomboshakami lo ndjela ɛnamelo kami kana nde mendaka lonto lami la l’etei k’otema ndo mbeyaka woho w’onto wemi?’

KƐNƐ KAKONYA ANTO AMƆTSHI DIA MONGA LA TAAMU: Anto efula fɔnyaka dia Nzambi mbɔsaka anto paka oko atshi wa pɛkato kana oko anto wele bu pudipudi ndo wahandakoke mbidja yimba. Kendra akadiɛnɛka l’ɔkɔmwɛlɔ ndo la nkum’otema kawɛndja onongo l’ɔtɛ wakinde komonga l’akoka wa nsɛna tshɛ lo tshɛ lo yoho yɔtɔnɛ l’ɛlɛmbɛ wa Nzambi. Etombelo wakonge ele, nde mbutaka ɔnɛ: “Lakatshike nɔmba.”

KƐNƐ KETSHA ƆTƐKƐTA WA NZAMBI: Jehowa mbeyaka woho w’onto weyɛ mɛtɛ ndo nde hende tsho eongelo kayɛ kele keema kokele. Bible mbutaka ɔnɛ: “Ndi mbeyaka uma lu na akatatungama. Ndi atuhoka ati: Ditshu mbesu.” Kɛnɛ koleki tshɛ ele, nde hatosalɛ akambo “uku kolo yasu,” koko la kɛtshi tshɛ nde todimanyiyaka munga yaso naka tamboyatshumoya.—Osambu 103:10, 14.

Tɔsɛdingole kɛnɛ kakate Davidɛ nkumekanga k’Isariyɛlɛ lakatatɛkɛtshi lo sawo dia ntondo dia l’ɔnɔngɔ w’asawo anɛ. Lo dɔmbɛlɔ diakandalɔmbɛ Nzambi, Davidɛ akate ate: “Ashu aye wakamenaka lam’akimi ehuluku; ndu biyu diami tshe diakafundama [lo buku diayɛ] . . . [Nzambi] li, unshishimi, umani utema ami fundu.” (Osambu 139:16, 23) Davidɛ aki mɛtɛ l’eshikikelo dia kaanga mbakandasale munga ka woke l’etena kɛsɔ, Jehowa akakoke nsɛdingola otema ande wa ndjatshumoya.

Jehowa mbeyaka dimɛna awui wele la yɛ oleki anto. Bible mbutaka ɔnɛ: “Untu atendaka kene kenandi lu ashu, keli [Jehowa] atendaka utema.” (1 Samuele 16:7) Nzambi mbeyaka lande na kasalayɛ kɛnɛ kasalayɛ kengo, kɛnɛ kakayahowɔ, woho wakayodiama, anto wokodingi ndo lonto layɛ lo tshɛ kalɔ. Nde mɛnaka ndo mbɔsaka la nɛmɔ welo wadjayɛ dia monga la lonto l’ɔlɔlɔ kaanga mbasalayɛ munga.

Ko ngande wakamba Nzambi la dikoka diele la nde dia mbeya awui wele la yɛ dia kokeketsha?

KƐNƐ KAKONYA ANTO AMƆTSHI DIA MONGA LA TAAMU: Kaanga mbongawɔ l’ohomba w’ekeketshelo etena kakɔmɔwɔ, anto amɔ fɔnyaka di’ekɔ tshondo ya lokaki dia nɔmba Nzambi dia mbekɛ lonya ndo mbakimanyiya dia nkandola ekakatanu awɔ. Womoto ɔmɔtshi lelɛwɔ Raquel mbutaka ate: “Etena kendami nyemba y’anto wa l’andja ɔnɛ ndo ekakatanu wa wolo wele la wɔ, dimi mɛnaka di’ekakatanu ami wekɔ totshitshɛ ndo dimi mengengaka dia nɔmba Nzambi ekimanyielo.”

KƐNƐ KETSHA ƆTƐKƐTA WA NZAMBI: Nzambi okekɛka lonya lo yoho ya diambo dia nkimanyiya ndo nkeketsha anto. Anto tshɛ wele la nkɛtɛ ɛlɔ kɛnɛ wakahowɔ pɛkato, vɔ hawokokaki pondjo nsɛna tshɛ lo tshɛ lo yoho yɔtɔnɛ l’ɛlɛmbɛ wa Nzambi. Koko, Nzambi “akatoke ngandji ndo akatotomɛ Ɔnande [Yeso Kristo] oko olambo wadimanyiya pɛkato yaso.” (1 Joani 4:10) Diɛsɛ la nyɔi k’olambo wa Yeso, Nzambi todimanyiyaka pɛkato yaso, sho mongaka la nkum’otema ka pudipudi ndo elongamelo ka lɔsɛnɔ la pondjo l’andja w’oyoyo wa wɔladi.a Ko onde olambo ɔsɔ wakakimɔma lo dikambo di’anto tshɛ, ko kana vɔ mɛnyaka dia Nzambi ndjashaka le yɛ?

Tende ɛnyɛlɔ k’ɔpɔstɔlɔ Pɔɔlɔ. Nde akate di’olambo ka Yeso ate: “Lekɔ lo nsɛna lo yoho yɔtɔnɛ la mbetawɔ kele la mi le Ɔna Nzambi lakamboke ngandji ndo lakayakimɔ dikambo diami.” (Ngalatiya 2:20) Teye dia Yeso akavu la ntondo ka Pɔɔlɔ nkoma Okristo. Koko, Pɔɔlɔ akɔshi olambo ɔsɔ oko woshasha wa Nzambi hita wakandawosha.

Nyɔi k’olambo ka Yeso ekɔ woshasha wa Nzambi hita wakandakosha ndo wɛ. Woshasha ɔsɔ mɛnyaka dia wɛ ekɔ la nɛmɔ lo washo wa Nzambi. Vɔ koka kosha ‘esambelo ka pondjo ndo elongamelo ka dimɛna,’ ndo dui sɔ ‘diakokeketsha dia wɛ salaka ndo mbutaka nshi tshɛ kɛnɛ kele ɔlɔlɔ.’—2 Tɛsalɔnika 2:16, 17.

Ambeta ɛnɔnyi suke la 2000 wakakimɔ Yeso lɔsɛnɔ lande oko olambo. Kakɔna kɛnya dia Nzambi ndjakiyanyaka dikambo diayɛ ɛlɔ kɛnɛ?

KƐNƐ KAKONYA ANTO AMƆ DIA MONGA LA TAAMU: Anto efula wele la mbetawɔ le Nzambi fɔnyaka dia nde ekɔ etale la wɔ. Christina ladjasɛ lo Irlande latshɔ l’ɔtɛmwɛlɔ lomingu tshɛ mbutaka ate: “Lakɔsaka Nzambi tsho oko Otungi wa diangɔ tshɛ. Koko, dimi kombeeyaka. Ndooko lushi lakamayaoke suke la nde.”

KƐNƐ KETSHA ƆTƐKƐTA WA NZAMBI: Etena kakɔmɔso, Jehowa hahekɔ tokimanyiya. Yeso akasha ɛnyɛlɔ kɛnya woho watokokɛ Nzambi ɔnɛ: “Naka onto ɔmɔtshi ekɔ la ɛkɔkɔ lokama ko ɔmɔtshi wamboshishɔ, onde nde hatotshika akumi divwa la divwa lo akona ko nde ntshɔ toyanga wɔnɛ wamboshishɔ?” Naa wetshelo wakondjaso? “Woho akɔ waamɛ mbele, Papa lele l’olongo hangɛnangɛna kaanga ɔtɔi ɔmɔtshi wa l’atei w’anto wele oko ana w’akɛnda nshishɔ.”—Mateo 18:12-14.

Onto tshɛ “l’atei w’anto wele oko ana w’akɛnda” asɔ ekɔ la nɛmɔ le Nzambi. Ngande wayanga Nzambi “wɔnɛ wamboshishɔ?” Lo ndjela divɛsa diele lo mbɔtwɛlɔ, Jehowa kotolaka anto oya le nde.

Tende woho wakatatɛ Nzambi nkotola anto w’etema ɛlɔlɔ. Lo ntambe ka ntondo T.D., Nzambi akatome Filipɛ ombeki w’Okristo dia tohomana la ɔlɔhɛ w’ose Etiyɔpiya waki lo pusupusu dia toolembetshiya prɔfɛsiya ka lo Bible kakandadɛka. (Etsha 8:26-39) Oma laasɔ, Nzambi akalɔmbɔla ɔpɔstɔlɔ Petero lo luudu Kɔrnɛliyo ɔnɔmbɔdi w’alembe w’ose Rɔmɔ lakalɔmbaka ndo lakasalaka la wolo dia ntɛmɔla Nzambi. (Etsha 10:1-48) Nzambi akalɔmbɔla nto ɔpɔstɔlɔ Pɔɔlɔ nde l’asekande otsha l’ɔkɛdi ɔmɔ waki l’andja w’osomba wa Filipɛ. Lɛkɔ, vɔ wakatotana Ludiya womoto “[l]akatɛmɔlaka Nzambi,” ko “Jehowa akadihola otema ande dia nde mpokamɛ.”—Etsha 16:9-15.

Lo bɛnyɛlɔ sɔ tshɛ, Jehowa akashikikɛ dia wanɛ wakawoyangaka asɔ waki la diaaso dia mbeeya. Waa na watshɔ toyanga anto ɛlɔ kɛnɛ lo ngelo yawɔ ndo l’ahole wa lo nsɛkɛ dia mbasambisha losango l’oma lo Bible lendana la Nzambi? Anto efula kadimolaka ɔnɛ: “Ɛmɛnyi wa Jehowa.” Yambola ɔnɛ: ‘Shi ondo Nzambi ekɔ lo nkamba la wɔ dia kimanyiyami dia dimi ndjaekesanyiya la nde? Tambokokeketsha dia wɛ nɔmba Nzambi dia kokimanyiya dia nsala akambo lo yoho yɔtɔnɛ la welo wadjande dia kokotola oya le nde.a