Aha Christopher, Hannah ndo Gina ato mbayaoka ngasɔ. Anto efula wa l’andja w’otondo wekɔ l’eshikikelo dia Nzambi mbaɔsaka oko angɛnyi ande. Ko kayotota lo dikambo dia yɛ? Onde wɛ ndjaokaka dia wɛ ekɔ suke la Nzambi? Onde wɛ kombolaka ndjasukanya ko kana wɛkombolaka ndeka ndjasukanya la nde? Ondo wɛ toyambolaka ɔnɛ ‘onde onto l’anyanya koka monga la diɔtɔnganelo dia ma ma la Nzambi Kanga-Wolo-Tshɛ? Naka ngasɔ mbediɔ ko, lo woho akɔna?’

ONTO KOKA NDJASUKANYA LA NZAMBI

Lo ndjela Bible, onto koka ndjasukanya la Nzambi ndo monga la diɔtɔnganelo dia ma ma la nde. Bible mbutaka dia Nzambi akelɛ Abrahama owandji wa nkumbo w’ose Hɛbɛru ate “ongenyi ami.” (Isaya 41:8) Lembetɛ nto leeta la la wangasanu lele lo Jakɔba 4:8 lata ɔnɛ: “Nyoyasukanya la Nzambi, ko nde ayoyasukanya la nyu.” Mbokɛmaka hwe di’onto koka monga la diɔtɔnganelo dia ma ma la Nzambi ndo monga ɔngɛnyi ande. Ko lam’ele Nzambi hɛnama, ngande wakokaso “ndjasukanya” ndo monga la diɔtɔnganelo dia dimɛna la nde?

Dia nkadimola dimbola sɔ, tende kɛnɛ kasalema lam’asa anto ahende wakombola monga angɛnyi. Mbala efula dui sɔ tatɛka lo anto akɔ ahende mbeyana nkombo yawɔ. Oma laasɔ, etena kayowotalekaka nsawola, kayowoshanaka tokanyi ndo kayowotanɛka nsaki yawɔ, mbayotalekaka lɔngɛnyi lawɔ nkeketala. Ndo etena kandjawɔ welo dia salanɛ akambo amɔtshi, vɔ keketshaka dimama dia lɔngɛnyi lawɔ. Kɛsɔ mbakokaso mbuta ndo lo kɛnɛ kendana la diɔtɔnganelo dia ma ma diakokaso monga la diɔ lam’asaso la Nzambi. Ɛsɔ tende woho wakoka dui sɔ salema.

Onde wɛ ekɔ l’ɔngɛnyi ayɛ ɔmɔtshi wa ma ma wahayeye lokombo lande? Ondo bu. Womoto ɔmɔtshi l’ose Bulgarie lelɛwɔ Irina aki la shadiya ya mbuta ɔnɛ: “Onto hakoke ndjasukanya la Nzambi naka nde heye lokombo lande.” Dui di’ɔngɛnɔngɛnɔ ele, oko wakatadiɛnyi lo sawo dietshi, Nzambi nangaka dia wɛ ndjasukanya la nde. Koko l’ekimanyelo ka Bible, nde amboshilaka ndjaeyanya le yɛ lo mbuta ɔnɛ: “Dimi keli Jehowa. Oso keli lukumbu lami.”—Isaya 42:8.

Onde mɛtɛ mbeya lokombo lande ndo nkamba lalɔ ekɔ la shɛngiya mɔtshi le Jehowa kana bu? Tɔshi ɛnyɛlɔ kɛnɛ: Lokombo laki Nzambi lakafundama lo alɛta anɛi w’ekuku wa lo Hɛbɛru welamɛ ɔnɛ Tetragramɛ, watanema l’Afundelo wa lo Hɛbɛru suke la mbala 7000. Lokombo lɔsɔ mboleki tanema mbala efula lo Bible ndeka nkombo tshɛ yatanema lɔkɔ. Dui sɔ mɛnyaka mɛtɛ dia, Jehowa nangaka dia sho mbeya lokombo lande ndo nkamba la lɔ.a

Anto amɔtshi mbeyaka mfɔnya dia lam’ele Nzambi ekɔ ekila ndo Kanga-Wolo-Tshɛ, ekɔ dui dia lɔsɛndji dia nkamba la lokombo lande. Kɛnɛ kele mɛtɛ ele, ekɔ dui dia kɔlɔ nkamba la lokombo laki Nzambi lo yoho ya kɔlɔ oko wahayakoke nsala lo dikambo di’ɔngɛnyi ayɛ wa ma ma. Koko, Jehowa nangaka di’anto wawoka ngandji nɛmiya lokombo lande ndo lieyanya. (Osambu 69:30, 31; 96:2, 8) Ohɔ dia Yeso aketsha ambeki ande dia nɔmbaka ɔnɛ: “Shɛso lele l’olongo, lokombo layɛ lakidiame.” Sho koka mbisha lonya dia nkidia lokombo laki Nzambi lo lieyanya. Lo nsala ngasɔ mbayotoleka ndjasukanya la nde.—Mateo 6:9.

Bible mɛnyaka dia Nzambi mbidjaka ‘onto lakanyiya [kana lɔsa la nɛmɔ]lokombo lande’ yimba lo yoho ya laande. (Malaki 3:16) Lo kɛnɛ kendana la onto la ngasɔ, Jehowa mbolakaka ɔnɛ: “Layuwumbiya, ne dia ndi ateyaka lukumbu lami. Lam’ayundumbetaka, dimi layuwetawoka, layuyalaka la ndi lu pa.” (Osambu 91:14, 15) Ɔnkɔnɛ, mbeya ndo nkamba la lokombo laki Jehowa ekɔ ohomba efula naka sho nangaka monga la diɔtɔnganelo dia ma ma la nde.

Oyadi sawo di’elongi l’elongi, lo telefɔnɛ, lo tshimbo ya mesajɛ wa l’Ɛtɛrnɛtɛ, vidɛo kana lo tshimbo ya mikanda, angɛnyi wa ma ma sawolaka mbala tshɛ kakondjawɔ diaaso. Diakɔ diele, dia sho ndjasukanya la Nzambi, sho pombaka sawolaka la nde tena tshɛ. Ko, ngande wakoka dui sɔ salema?

Sho koka nsawola la Jehowa lo tshimbo ya dɔmbɛlɔ. Koko, dɔmbɛlɔ diasalaso otsha le Nzambi hakoke monga oko sawo di’anyanya diakokaso nsawola l’angɛnyi aso. Sho pombaka mbeya dia etena kalɔmbaso, tekɔ lo nsawola l’Otungi aso lele Nkum’Olongo. Dui sɔ pombaka totshutshuya dia monga la dilɛmiɛlɔ di’efula etena kasalaso dɔmbɛlɔ. Dia alɔmbɛlɔ aso mbetawɔma le Nzambi, sho pombaka nto nkotsha awui amɔtshi walɔmbama. Awui amɔtshi asato wa l’atei awɔ vɔ anɛ:

Dui dia ntondo ele, sho pombaka tomaka alɔmbɛlɔ aso paka le Jehowa Nzambi koko, aha le Yeso, ‘asanto’ kana efanelo kɛmɔtshi. (Etumbelu 20:4, 5) Bible mbutaka hwe ɔnɛ: “Lo oseka dikambo tshɛ, tanyoyakiyanyake, koko nyote Nzambi ehomba anyu lo dɔmbɛlɔ la ɛsɛngɔsɛngɔ kaamɛ ndo la eokelo ka losaka.” (Filipɛ 4:6) Dui dia hende ele, sho pombaka komiyaka alɔmbɛlɔ aso lo lokombo la Yeso Kristo, Ɔna Nzambi. Yeso Kristo ndaamɛ akalembetshiya ɔnɛ: “Ndooko onto laya le Papa paka lo tshimbo yami.” (Joani 14:6) Dui dia sato ele, alɔmbɛlɔ aso pombaka mbɔtɔnɛ la lolango laki Nzambi. Bible mbutaka ɔnɛ: “Kɛnɛ tshɛ kayotɔɔlɔmba kɔtɔnɛ la lolango lande, nde ayotokɛ.”a—1 Joani 5:14.

Lo mɛtɛ, lɔngɛnyi la lam’asa anto ahende halototshikala edja naka onto ɔtɔi oto mbaamamala l’ɔtɛkɛta. Oko watoshanaka angɛnyi ahende diaaso dia onto l’onto ntɛkɛta etena kasawolawɔ, sho laawɔ pombaka mbisha Nzambi diaaso dia nde ntɛkɛta la so ndo mbohokamɛ etena katɛkɛtande. Onde wɛ mbeyaka lo woho akɔna watɛkɛta Nzambi la so?

Ɛlɔ kɛnɛ, Jehowa Nzambi “tɛkɛtaka” la so lo tshimbo y’Ɔtɛkɛta ande Bible. (2 Timɔte 3:16, 17) Lande na kataso ngasɔ? Tɔshi ɛnyɛlɔ: Ohosa dia wɛ ambolongola mukanda oma le ɔngɛnyi ayɛ wa ma ma. L’ɔkɔngɔ wa wɛ mbaadia, wɛ koka mbutɛ anto akina l’ɔngɛnɔngɛnɔ tshɛ ɔnɛ: “Dimi malasawola l’ɔngɛnyi ami!” Lo mɛtɛ, kaanga mbahawasawodi elongi l’elongi, koko wakasawodi lo tshimbo ya mukanda. Woho akɔ waamɛ mbele, etena kadiayɛ Bible wɛ mbishaka Jehowa diaaso dia ntɛkɛta la yɛ. Oma laasɔ, Gina lakatatɛkɛtshi l’etatelo ka sawo nɛ mbutaka ate: “Dimi fɔnyaka dia naka dimi nangaka dia Nzambi mbɔsami oko ɔngɛnyi ande, kete dimi pombaka mbadiaka ‘mukanda’ wakandatotomɛ, mbuta ate: Bible.” Nde kotshaka ɔnɛ: “Wadielo wa Bible wa lushi la lushi wamboleka sukanyami la Nzambi.” Onde wɛ mbishaka Jehowa diaaso dia sawolaka la yɛ lushi tshɛ lo mbadiaka Ɔtɛkɛta ande, Bible lushi la lushi? Naka wɛ salaka ngasɔ, kete dui sɔ diayokokimanyiya dia wɛ ndeka ndjaoka suke la Nzambi.

“Kɛnɛ tshɛ kalangayɛ, ta paka dui to ko dimi layonga l’ɔngɔnɛngɛnɔ dia kisala.” Ondo wɛ mbeyaka mengenga dia mbutɛ onto lahayeye kaanga yema kana lahaleke mbɔtɔnɛ la yɛ ɛtɛkɛta wa ngasɔ. Koko, wɛ hakoke mengenga dia mbutɛ ɔngɛnyi ayɛ w’oshika ɛtɛkɛta ɛsɔ. Lo mɛtɛ, angɛnyi w’eshika nɔmbanaka dia salanɛ akambo lam’asawɔ.

Bible mbutaka dia mbala la mbala, Jehowa salɛka atɛmɔdi ande kɛnɛ keyande dia kayowangɛnyangɛnya. Ɛnyɛlɔ, nkumekanga Davidɛ laki la diɔtɔnganelo dia ma ma la Nzambi akate ate: “We Jehowa, Nzambi kami, akambu wa mamba wakayatshi, la tukanyi takayakani lu dikambu diasu. . . . Vo weko efula kaheyama mbala.” (Osambu 40:5) Kɛnɛ koleki tshɛ ele, Jehowa salɛka kaanga wanɛ wahataweye awui waangɛnyangɛnya lo ‘mbasha mbo ya ndɛ ndo lo ndodia etema awɔ l’ɔngɛnɔngɛnɔ.’—Etsha 14:17.

Lam’ele Jehowa salaka kɛnɛ kangɛnyangɛnya anto akina, ekɔ diui dia lomba dia wanɛ walanga monga angɛnyi wa Nzambi nsala kɛnɛ kahomba ngɛnyangɛnya “utema” ande. (Tukedi 27:11) Ko, kakɔna mɛtɛ kahombayɛ nsala dia ngɛnyangɛnya Nzambi? Bible kadimolaka ɔnɛ: “Tanyohɛke nsala ɔlɔlɔ ndo nkimanyiya anto akina la diangɔ diele la nyu, nɛ dia Nzambi ngɛnangɛnaka woho w’elambo wa ngasɔ.” (Hɛbɛru 13:16) Onde kɛsɔ nembetshiyaka dia nsala kɛnɛ kele ɔlɔlɔ ndo nkahana l’anto akina kɛnɛ kele la so mbele kɛnɛ tshɛ kele ohomba dia ngɛnyangɛnya Jehowa?

Bible mbutaka ɔnɛ: “Onto lele bu la mbetawɔ hakoke ngɛnyangɛnya Nzambi.” (Hɛbɛru 11:6) Diakɔ diele, paka l’ɔkɔngɔ wa “Abrahama [monga] la mbetawɔ le Jehowa [mb]akandayokoma lo mbelamɛ ɔnɛ: Ɔngɛnyi wa Jehowa.” (Jakɔba 2:23) Yeso Kristo akɛnya nto ohomba wa ‘monga la mbetawɔ le Nzambi’ naka sho nangaka nkondja ɛtshɔkɔ w’oma le Nzambi. (Joani 14:1) Ko, ngande wakokayɛ monga la mbetawɔ kalɔmba Nzambi wanɛ wakotolande ndaamɛ oya le nde? Ntondotondo ekaka Ɔtɛkɛta waki Nzambi, Bible mbala la mbala. Lo nsala ngasɔ, wɛ ayokondja “ewo k’oshika ka lolango lande” ndo oma laasɔ, eka woho wa “mbɔngɛnyangɛnya lo akambo tshɛ.” Laadiko dia laasɔ, etena katayaleke mfudia ewo kayɛ k’akambo wa mɛtɛ wendana la Jehowa ndo kakambayɛ la kɛnɛ kekayɛ oma l’ɛlɛmbɛ ande wosembwe, mbayoleka mbetawɔ kayɛ le nde mpama ndo mbayondoleka ndjasukanya la yɛ.—Kɔlɔsayi 1:9, 10.

Akokayɛ nsala dia ndjasukanya la Nzambi? Wanya amɔtshi wakatasɛdingodi wakokayɛ ntakola dia monga la diɔtɔnganelo la nde vɔ anɛ:

1. Mbeya lokombo laki Nzambi, Jehowa ndo nkamba lalɔ.

2. Nsawolaka la nde mbala la mbala lo tshimbo ya dɔmbɛlɔ ndo mbekaka Ɔtɛkɛta ande Bible.

3. Ntetemala nsala kɛnɛ kangɛnyangɛnya Jehowa.

Naka wɛ ntakola wanya anɛ, shi wɛ koka mbuta dia wɛ ekɔ lo nsala kɛnɛ kele ohomba dia ndjasukanya la Nzambi? Onde wɛ fɔnyaka dia ekɔ awui amɔtshi wakokayɛ ndjalowanya lɔkɔ? Mbokɛmaka hwe dia, ekɔ ohomba mbidja welo, koko enda etombelo wayonga la dui sɔ.

Jennifer, womoto ladjasɛ l’États-Unis mbutaka ate: “Welo tshɛ wadjama dia monga la diɔtɔnganelo dia ma ma la Nzambi mandɔmaka. Diɔtɔnganela dia ngasɔ mbelaka ɛtshɔkɔ efula: wɛ ayoleka ndjaɛkɛ le Nzambi, ayoleka nshihodia l’onto lande, koko kɛnɛ koleki tshɛ ele wɛ ayoleka mbooka ngandji. Ndooko yoho ya lɔsɛnɔ yoleki dimɛna!”

Naka wɛ kombolaka monga la diɔtɔnganelo dia ma ma la Nzambi, kete Ɛmɛnyi wa Jehowa wayɔngɛnangɛna dia kokimanyiya. Vɔ koka nkongɛ dia mbekaka la yɛ Bible ofele aha la nɔmba falanga. Ndo nto, wɛ ayolongɔma l’ɔngɛnɔngɛnɔ efula naka wɛ ndja dia ndjɔtɔ lo nsanganya yawɔ yasalema lo Mbalasa ka Diolelo ka lo ngelo kanyu, lɛnɛ ayoyotonga kaamɛ la wanɛ wɔsa diɔtɔnganelo diasawɔ la Nzambi la nɛmɔ.a Naka wɛ nsala ngasɔ, kete wɛ ayoyaoka oko wakayaoke omembi w’esambo lakate ate: “Keli dia dimi nsukana lasuki la [Nzambi] mbeli ololo.”—Osambu 73:28.