Wekelo 6
Elɛwɔ Diolelo Diaki Nzambi?
Lende ele Diolelo diaki Nzambi? (1)
Ele Nkumekanga kadiɔ? (2)
Onde anto amɔtshi wayolɛ kâmɛ la Nkumekanga kakɔ? Naka ɔsɔku, ko anto angana? (3)
Kakɔna kɛnya ɔnɛ tasɛnakɔ lo nshi y’ekomelo? (4)
Kakɔna kayosalɛ Diolelo diaki Nzambi anto lo nshi yayaye na? (5-7)
1. Lam’akinde la nkɛtɛ, Yeso akalakanya ambeki ande dia vɔ nɔmbaka eyelo ka Diolelo diaki Nzambi. Diolelo ele lowandji lalɔmbwama oma le nkumekanga kɛmɔtshi. Diolelo diaki Nzambi diekɔ lowandji la lânde. Diɔ diekɔ l’olongo ndo diayôlɛ nkɛtɛ k’otondo. Diolelo diakɔ diayokidia lokombo la Nzambi. Diɔ diayosala woho wa lolango la Nzambi tshama la nkɛtɛ oko atshamalɔ l’olongo.—Mateu 6:9, 10.
2. Nzambi akalake ɔnɛ Yeso mbayoyala Nkumekanga ka Diolelo Diande. (Luka 1:30-33) Lam’aki Yeso la nkɛtɛ, nde akɛnya ɔnɛ nde ayoyala Owandji w’ɔlɔlɔ, wa losembwe ndo wa kokele. Lam’akandakalola l’olongo, nde kombahema etena kakɔ kâmɛ l’okudi oko Nkumekanga ka Diolole diaki Nzambi. (Heberu 10:12, 13) Lo 1914, Jehowa akasha Yeso lowandji lakandôlake. Oma k’etena kɛsɔ, Yeso ôlɛkɔ l’olongo oko Nkumekanga kakasɔnama oma le Jehowa.—Danyele 7:13, 14.
3. Jehowa akasɔnɛ ndo akanga wa kɔlamelo amɔtshi, apami la amato, oma la nkɛtɛ dia vɔ ntshɔ l’olongo. Vɔ wayolɛ kâmɛ la Yeso oko nkumi ya dikanga, toshushi ndo ɛlɔmbɛdi lâdiko di’anto tshɛ. (Luka 22:28-30; Enyelo 5:9, 10) Yeso akelɛ wanɛ wayolɛ kâmɛ la nde asɔ lo Diolelo diande ate: “Limba la tshitshe l’ekoko.” Vɔ wekɔ anto 144 000.—Luka 12:32; Enyelo 14:1-3.
4. Kam’akakome Yeso Nkumekanga, nde akatshanya Satana l’andjelo wa kɔlɔ oma l’olongo oya l’emamu wa nkɛtɛ. Diɔ diakɔ diamboleka fukutana akambo nshi nyɛ la nkɛtɛ oma ko 1914. (Enyelo 12:9, 12) Ata, ndjala, hemɔ, ehamelo ka ɛɔnywɛlɔ k’ɛlɛmbɛ—akambo asɔ tshɛ wekɔ etenyi kɛmɔtshi ka “djembetelo” yɛnya ɔnɛ Yeso ekɔ lo mbolɛ ndo ɔnɛ dikongɛ nɛ diaya lo nshi yadiɔ y’ekomelo.—Mateu 24:3, 7, 8, 12; Luka 21:10, 11; 2 Timote 3:1-5.
5. Kem’edja nto, Yeso ayolomboya anto, ayowakakitola oko olami w’ɛkɔkɔ mbakakitola ɛkɔkɔ la mbudi. “Ekoko” ɛsɔ ele wanɛ wayoyaɛnya vamɛ ɔnɛ vɔ waki anto ande wa kɔlamelo. Vɔ wayokondja lɔsɛnɔ la pondjo lanɛ la nkɛtɛ. “Mbudi” ele anto wayotona Diolelo diaki Nzambi. (Mateu 25:31-34, 46) Kema edja nto, Yeso ayodiaka anto tshɛ wele oko mbudi. (2 Tesalonika 1:6-9) Endaka wɛ nangaka monga “okoko” ɔmɔtshi waki Yeso, kete wɛ pombaka nonga losango la Diolelo ndo kotsha kɛnɛ kekayɛ.—Mateu 24:14.
6. Ɛlɔ kɛnɛ, nkɛtɛ kambâtɔna lo wedja efula. Wodja la wodja wekɔ la lowandji lawɔ. Mbala efula, wedja ɛsɔ ndɔshanaka lam’asawɔ. Koko Diolelo diaki Nzambi diayɔhɛna mandji tshɛ y’anto. Diɔ diamɛ diayôlɛ oko tshɔi yakɔ ya lowandji lo nkɛtɛ k’otondo. (Danyele 2:44) L’etena kɛsɔ, ata hawotoyala nto, akambo wa ngala ndo odiakanelo. Anto tshɛ wayodjasɛ kâmɛ lo wɔladi ndo lo kâmɛ.—Mika 4:3, 4.
7. L’edja ka Lowandji laki Yeso l’Ɛnɔnyi Kinunu, akanga wa kɔlamelo wayokoma anto wa kokele, ndo nkɛtɛ k’otondo kayokadimɔ paradiso. Oya l’ekomelo k’ɛnɔnyi kinunu, Yeso ayoshidiya sala awui tshɛ wakɔ̂lɔmbɛ Nzambi dia nde sala. Ko l’ɔkɔngɔ, nde ayoyosha She Diolelo. (1 Koreto 15:24) Lande na ahayatɛ angɛnyi ayɛ ndo anto akina wokayɛ ngandji awui wayosala Diolelo diaki Nzambi na?
[Diombwɛlo di’osato wa lo lɛkɛ 13]
L’ɛlɔmbwɛlɔ ka Yeso, lohetsho tshɛ ndo akambo wa kɔlɔ wayoshila