Wekelo 4
Ele Diabolo?
Satana Diabolo—oma lende akandaye na? (1, 2)
Woho akɔna wakesande anto? (3-7)
Lande na kahombayɛ pakangakalɛ Diabolo? (7)
1. Tshɛkɛta “diabolo” nembetshiyaka onto lahindɛ onyande awui wa kashi ndo wa kɔlɔ. “Satana” kɛdikɛdi otunyi kana ndɔshi. Ɔsɔ kele nkombo yakawɔlɛ otunyi wa Nzambi wa woke efula. Oma k’etatelo nde aki ondjelo wa kokele wakasɛnaka la Nzambi l’olongo. Koko l’ɔkɔngɔ diko, nde akayoyâkana efula ko akayokombolaka di’anto mbɔtɛmɔla ko tete le, Nzambi oto mbasungana tɛmɔlama.—Mateu 4:8-10.
2. Ondjelo ɔsɔ, Satana, akasawola la Eva l’ekimanyielo k’olui. Oma l’akambo wa kashi wakandawotɛ, nde akôkonya lo pindolɛ Nzambi. Ɔnkɔsɔ mbakasɔmbwɛ Satana kɛnɛ ketawɔ ɔnɛ: “lowandji” la Nzambi, mbuta ate dihole dia Nkum’olongo diele lande. Satana akadje tâmu ɔnɛ Nzambi halɔmbɔla dimɛna ndo hakanɛ anto Ande. Satana akadje tâmu tokina nto ɔnɛ anto hawotolama kɔlamelo yawɔ otsha le Nzambi. Ɔnkɔsɔ mbakayaetɛ Satana ndamɛ otunyi wa Nzambi. Diɔ diakɔ diakawayowelɛka ɔnɛ: Satana Diabolo.—Etatelu 3:1-5; Jobo 1:8-11; Enyelo 12:9.
3. Satana pembaka kesa anto dia vɔ mbɔtɛmɔla. (2 Koreto 11:3, 14) Yoho mɔtshi yakesande anto ele ɔtɛmwɛlɔ wa kashi. Naka ɔtɛmwɛlɔ ɔmɔtshi mbetshaka anto awui wa kashi lo dikambo dia Nzambi, kete mɛtɛ, Satana mbakambɛwɔ olimu. (Joani 8:44) Ase ɛtɛmwɛlɔ wa kashi fɔnyaka ɔnɛ Nzambi ka mɛtɛ mbatɛmɔlawɔ. Tete le, mɛtɛ Satana mbatɛmɔlawɔ. Nde kele ‘nzambi k’andja ɔnɛ.’—2 Koreto 4:4.
4. Ɔtɛmwɛlɔ w’ɛdiɛngɛ ekɔ yoho kina yasala Satana dia mbahemɛka anto. Anto akɔ kokaka mbelɛ ɛdiɛngɛ dia mbâkokɛ, dia vɔ salɛ anto akina kɔlɔ, dia vɔ mbuta akambo wahataye, kana dia vɔ sala ahindo. Satana mbele kudu ka kɔlɔ kashama l’edia ka ditshelo sɔ tshɛ. Dia ngɛnyangɛnya Nzambi, sho pombaka kakitɔna l’akambo w’ɔtɔnganɛ l’ɔtɛmwɛlɔ w’ɛdiɛngɛ.—Euhwelu k’Elembe 18:10-12; Etsha 19:18, 19.
5. Satana kesaka anto nto oma lo otako w’efula wa lokoho la demba lele l’onto ndo oma lo woho watɛmɔlawɔ ɛlɔngɔswamelo wa pɔlitikɛ. Anto amɔtshi fɔnyaka ɔnɛ wodja awɔ ndeka ekina ndo lokoho lawɔ la demba ndeka l’anto akina. Tete le, ɔsɔ ekɔ kashi. (Etsha 10:34, 35) Anto akina mendɛka le ɛlɔngɔswamelo wa pɔlitikɛ ɔnɛ vɔ mbahomba shidiya ekakatanu w’anto. Koko lam’asalawɔ ɔsɔku, vɔ mbokaka Diolelo diaki Nzambi ɔkɔngɔ. Diɔ to mbayokandola ekakatanu aso.—Danyele 2:44.
6. Yoho kina yakesa Satana anto ele lo mbaɔnganya dia vɔ kotsha nsaki y’akambo wa kɔlɔ. Jehowa totɛka dia sho mbewɔ ditshelo dia kɔlɔ nɛ dia nde mbeyaka ɔnɛ diɔ kokaka tosalɛ kɔlɔ. (Ngalatiya 6:7, 8) Ondo anto amɔtshi kombolaka dia wɛ lawɔ sala ditshelo dia ngasɔ oko vɔ. Koko ohɔ dia, mɛtɛ Satana mbalanga dia wɛ sala akambo asɔ.—1 Koreto 6:9, 10; 15:33.
7. Satana mbeyaka kamba la ɔhɛnyɔhɛnyɔ kana la ɔlɔshanelo dia wɛ mbɛkɔ Jehowa. Anto amɔtshi wokayɛ ngandji mbeyaka komalɛ efula ɔnɛ: lêngole wɛ kêka Bible. Akina mbeyaka kɔ̂la kana kɔsɔka. Ko akɔna ele kiɔkɔ ya lɔsɛnɔ layɛ na? Satana kombolaka kokiya wɔma dia wɛ tshika mbeka awui waki Jehowa. Tetawɔke Satana kodja otshumba! (Mateu 10:34-39; 1 Petero 5:8, 9) Naka wɛ ayohangakalɛ Diabolo, kete wɛ ayɔngɛnyangɛnya Jehowa ndo ayɛnya ɔnɛ wɛ sukɛka lowandji Lande.—Tukedi 27:11.
[Diombwɛlo di’osato wa lo lɛkɛ 9]
Ɛtɛmwɛlɔ wa kashi la w’ɛdiɛngɛ, ndo ngandji k’otamanya ka wodja munganyiyaka anto
[Diombwɛlo di’osato wa lo lɛkɛ 9]
Hangakalɛ Satana lo tetemala la mbeka awui wa Jehowa