Ngande Wakokaso Kimanyiya Elonganyi Wele Kema Ɛmɛnyi?

¹ Ekambi waki Jehowa efula tshukana l’anto wele la lɔngɛnyi otsha le Ɛmɛnyi wa Jehowa ndo wele la diɔtɔnganelo l’etshumanelo, koko hawolange koma ekambi waki Nzambi. Om’aki kadiyɛso kɛmɔtshi lele bu Ɔmɛnyi wa Jehowa akasuya ate: “Kanyi ya tatshɔka lo luudu la luudu aki mɛtɛ okakatanu wa woke le mi.” Mbeyaka monga ko akina wekɔ la ditshelo diahɔtɔnɛ l’Afundelo dialangawɔ tshika, kana vɔ mɛnaka dia hawokoke sala efula k’akambo wa teokrasi woho wɛnawɔ elonganyi awɔ wasala. Ngande wakokaso mbakimanyiya?

² Toyasha Le Wɔ: Ndjasha le anto akina ndo mbeya ekiyanu awɔ koka mbadiholɛ mboka dia vɔ mbetawɔ akambo wa mɛtɛ wa lo Bible. (Fil. 2:⁠4) Wanɛ wele ntondo komonga mbetawɔ ɔtɔi l’elonganyi awɔ mbutaka mbala efula woho wakayasha Ɛmɛnyi wa Jehowa ekina la ngandji otsha le wɔ. Om’aki kadiyɛso lakatatɛkɛtshi dikambo diande la diko akate ate: “José, ekumanyi kɛmɔtshi ka l’etshumanelo, akayasha tshɛ le mi. Dimi fɔnyaka dia ekeketshelo kande mbakatshutshuya l’ekomelo dia dimi tatɛ la mbɔsa wekelo la nɛmɔ di’efula.” Omi okina mbohɔka di’anangɛso wakayaka dia ndjowenda wakasalaka la wolo dia sawola la nde awui wakandayashaka lɔkɔ. Nde akate ate: “Dimi lakatatɛ monga la kanyi yotshikitanyi la nyɛ yaki lami la ntondo lo dikambo dia mbetawɔ ka [wadɛmi]. Angɛnyi ande waki ase timba efula wakakokaka sawola la mi awui wa weho la weho.”​—⁠1 Kor. 9:​20-23.

³ Tosha Ekimanyielo k’Oshika: Etema w’elonganyi wele bu Ɛmɛnyi wa Jehowa koka nto munandema oma lo woho wakawakimanyiyama la ngandji tshɛ. (Tuk. 3:27; Ngal. 6:10) Lam’akalana mutuka waki om’aki kadiyɛso kɛmɔtshi lele bu ombetawudi, dikɛnda dimɔtshi dia pami di’Ɔmɛnyi akokimanyiya. Nde kɔndɔlaka ate: “Mɛtɛ dikambo sɔ diakamambia heyama. Ɔnangɛso okina aketsha lushi l’otondo dia kimanyiya om’aki kadiyɛso kɛmɔtshi lele bu ombetawudi dia mbika lokombo lo parsɛlɛ kande. Lam’ele vɔ wakakambaka ndo wakasawolaka, vɔ wakayongaka angɛnyi. Mingu hiende l’ɔkɔngɔ, pami kɛsɔ akatɛ ɔnangɛso ɔsɔ ate: “Etena ka dimi sala etshikitanu lo lɔsɛnɔ lami tɔ kɛnɛ. Onde wɛ koka mbeka la mi Bible?” Nde akahame esadi esadi ndo ɛlɔ kɛnɛ nde aya Ɔmɛnyi wambobatizama.

⁴ Lam’atshɔso toyanga anto wakoka lo bɛtshi diaso dia nkɛtɛ, nyɛsɔ totetemale la kimanyiya wanɛ wotshukanyi l’asekaso ambetawudi.​—⁠1 Tim. 2:​1-4.