Tosha Jehowa Kɛnɛ Koleki Ɔlɔlɔ le So

¹ Ɔlɛmbɛ wakasha Jehowa ase Isariyɛlɛ akɛnyaka dia nyama yakawolambolaka yakahombaka monga ‘aha la ɛkɔmɔ.’ Nyama kaki l’ɛkɔmɔ kombetawɔmaka. (Lew. 22:​18-20; Mal. 1:​6-9) Lâdiko dia lâsɔ, lam’akalambɔmaka olambo, wata tshɛ, mbut’ate etenyi koleki ɔlɔlɔ ka lo nyama, kaki ka Jehowa. (Lew. 3:​14-16) Oko wakinde She Isariyɛlɛ ndo Owandji awɔ wa Woke, Jehowa akakokaka nongola kɛnɛ koleki ɔlɔlɔ.

² Oko wakidiɔ lo nshi y’edjedja, Nzambi ngɛnangɛnaka efula la elambo w’ɔlɔlɔ wolambolaso ɛlɔ kɛnɛ. Olimu aso la dia mɛnya wɔma wɔsɔhanyemi la dilɛmiɛlɔ wele laso otsha le Jehowa. Lo mɛtɛ, onto l’onto ekɔ l’ekakatanu ande. Koko, tekɔ l’ɔkɔkɔ w’ɔlɔlɔ wa ndjasɛdingola dia ndjashikikɛ dia tekɔ lo mbosha kɛnɛ koleki ɔlɔlɔ.​—⁠Ef. 5:⁠10.

³ Olimu wa l’Otema Ɔtɔi: Di’olimu aso tombola Jehowa ndo munanda etema w’ampokami aso, vɔ hawohombe monga wa lâdiko di’ɛlɔmɔ. Kɛnɛ katatate lo dikambo dia Nzambi kaso ndo k’asangwelo ande wa weke pombaka ndja oma l’etema woludi tɔɔ la lowando. (Osam. 145:⁠7) Kɛsɔ tɔtɔmiyaka ohomba wa monga l’ekongelo k’ɔlɔlɔ ka wadielo ndo ka wekelo wa Bible w’onto ndamɛ.​—⁠Tuk. 15:⁠28.

⁴ Mbisha Jehowa kɛnɛ koleki ɔlɔlɔ nembetshiyaka nto mbokoya ngandji kende latɔ otsha le anto. (Ef. 5:​1, 2) Ngandji kaso otsha le anto kayototshutshuya dia sambisha anto efula losango l’akambo wa mɛtɛ washa lɔsɛnɔ. (Mako 6:34) Tɔ totshutshuyaka dia ndjasha le wanɛ wakasawola la so. Tɔ totshutshuyaka dia kanyiya dikambo diawɔ l’ɔkɔngɔ wa sawo diaso dia mbala ka ntondo ndo tshɔ towaenda aha la tshimbatshimba. Tɔ totshutshuyaka dia sala kɛnɛ tshɛ kakokaso sala dia mbakimanyiya dia vɔ pama lo nyuma.​—⁠Etsha 20:24; 26:​28, 29.

⁵ ‘Olambo wa Lotombo’: Yoho kina yashaso Jehowa kɛnɛ koleki ɔlɔlɔ le so ele oma l’ohetoheto aso l’olimu w’esambishelo. Naka sho ndjakongɛ dimɛna ndo mbika washo l’olimu aso, kete tayokoka sala kɛnɛ koleki ɔlɔlɔ l’etena kele laso. (1 Tim. 4:10) Ndjalɔngɔsɔla dimɛna tokimanyiaka dia tɛkɛta awui wokɛma hwe ndo l’eshikikelo, lo yoho shɔ mbakoka onto mbetawɔ losango laso esadi eto. (Tuk. 16:21) Lam’asambishaso anto akina lokumu l’ɔlɔlɔ, ɛtɛkɛta aso w’oma k’ɛse otema kokaka mbelamɛ ɔnɛ ‘olambo wa lotombo.’​—⁠Heb. 13:⁠15.

Ɛlɔngɔlɔngɔ l’Esekaseka, Nyadiake Bible!

¹ Nshi y’ɔlɔngɔlɔngɔ la y’osekaseka yekɔ nshi y’ekakatanu ndo yahombawɔ mbɔsa tɛdikɔ ta weke. Efula k’ɛlɔngɔlɔngɔ l’esekaseka w’Akristo oko nyu pomanaka lushi la lushi la tɔsɛngiya tâtshutshuya dia sekola ɛlɛmbɛ waki Nzambi wendana la lɔkɛwɔ. La ntondo ka nyu ndjaɔsɛ tɛdikɔ lo kɛnɛ kendana l’awui wa kalasa, w’olimu ndo wa tshuki, nyu pombaka tokotayadje eyango wa lo nyuma. Paka nyu mbosadi ngasɔ mbakokanyu mbɔsa tɛdikɔ tokina takoka monga la wahɔ lo nsɛnɔ yanyu. Naka nyu ndjadjɛ eyango wa lo nyuma wa shikaa, kete dui sɔ diayonyokimanyiya dia sala akambo la lomba ndo tondoya nsɛnɔ yanyu. Lo mbadiaka Ɔtɛkɛta wa Nzambi mbala la mbala ndo lo kanaka la wɔ yimba, nyayotshutshuyama dia mbɔtɔnganyiya nsɛnɔ yanyu l’alako wa lɔkɔ, ndo nyayotondoya nsɛnɔ yanyu.​—⁠Jas. 1:8; Osam. 1:​2, 3.

² Naa Wahɔ Wayonyokondja oma lo Wadielo wa Bible? Andja waki Satana ndola la tɔsɛngiya tatshutshuya otsha l’akambo wa kɔlɔ. (1 Joa. 2:​15, 16) Ondo nyu mbeyaka asekanyu wa la kalasa kana anto akina wa lo lɔlɔnga lanyu wakahomana la mpokoso l’ɔtɛ wakawayele tɔsɛngiya t’oma le asekawɔ. Ndjela alako wa lo Bible ayonyosha wolo wa lo nyuma dia nyu mbeya tona lɔkɛwɔ la kɔlɔ. Lâdiko dia lâsɔ, alako w’oma l’Ɔtɛkɛta wa Nzambi koka nyokimanyiya dia mbewɔ tolonga taki Satana ta woshamu efula. (2 Kor. 2:11; Heb. 5:14) Kɛndakɛnda lo mboka ya Nzambi ayonyela ɔngɛnɔngɛnɔ wa mɛtɛ lo nsɛnɔ yanyu.​—⁠Osam. 119:​1, 9, 11.

³ Atɔndɔ wahatshikitana wa l’Ɔtɛkɛta wa Nzambi ndeka lomba l’anto etale. (Osam. 119:​98-100) Ndjaekesanyiya l’atɔndɔ wa lo Bible ndo kanaka yimba l’asangwelo wakatosholɛ Jehowa ndo alɔmbɛlɔ w’oma k’ɛse otema koka nyokimanyiya dia nyu monga la diokanelo di’oshika la Jehowa Nzambi, ɔnɛ lele Kiɔkɔ ya Bible ndo loleki lomba. Nde ndakaka ate: “Dimi layuketshaka ndu layukenyaka mbuka ka we kendakenda, dimi layukulakaka, layukendaka.”​—⁠Osam. 32:⁠8.

⁴ Nyoyaombe Etena ka Mbadiaka Bible: Osekaseka ɔmɔtshi w’Okristo akayadjɛ oyango wa mbadia Bible k’otondo, nde akashidiya la kiada l’ɔkɔngɔ w’ɔnɔnyi ɔtɔi. Wahɔ akɔna wakandakondja? Nde mbohɔka ate: “Dimi lakeke akambo efula lo dikambo dia Jehowa, akambo wakasukanya sukesuke la nde ndo wakatshutshuya dia mbôka wɔma l’edja tshɛ ka lɔsɛnɔ lami.” (Jak. 4:⁠8) Onde nyambadiaka Bible k’otondo? Naka kema, lande na kahanyayadjɛ oyango wa sala dui sɔ na? Lo mɛtɛ Jehowa ayɔtshɔkɔla welo anyu, ndo nyayokondja ɛlɔlɔ efula.