Sho Pombaka Nɛmiya Lowandji Laki Jehowa
Dionga diakɔna diakoyɛ lo yimba etena kokayɛ nkombo y’edjedja nyɛ: Kɔra, Datana la Abirama? Dionga di’ɔtɔmbɔkwɛlɔ! Otsha le na? Otsha le lowandji laki Nzambi. Ɔkɔndɔ w’awui awɔ wa kɔlɔ tanemaka lo Walelu tshapita 16, ndo akambo asɔ tɛkɛtama lo tshena pe lo sawo diele l’ɔtɛ a dui ɔnɛ: “Tokitanyiya Lowandji Laki Nzambi la Kɔlamelo Tshɛ,” diele lo Tshoto y’Etangelo ya Ngɔndɔ k’Enanɛi 1, 2002. Wɛ ayɛna ohomba mbadia awui asɔ, ko oma lâsɔ wɛ ndjenda woho wɛnyami awui akɔ lo bandɛ vidɛo Respect Jehovah’s Authority. Wɛ ayɛna owanu waki lam’asa ana wa Kɔra wa kɔlamelo l’ɔtɔmbɔki wa shɛwɔ, lakâmanyanaka l’Omboledi w’andja w’otondo. (Wal. 26:9-11) Dramɛ sɔ diele l’awui wa mɛtɛ pombaka totshutshuya dia sho nyomoleka pamia kɔlamelo yaso otsha le Jehowa.
Etena kendayɛ bandɛ vidɛo kɛsɔ, yanga tolembetelo tɛnya dia Kɔra nde l’asekande atɔmbɔki kɔmɛnya kɔlamelo l’awui asamalo w’ohomba anɛ: (1) Ngande wakawɔnyɔla lowandji laki Nzambi? (2) Ngande wakawetawɔ dia lotamanya, nsaki ka lokumu, ndo kandjema monga la shɛngiya le wɔ? (3) Ngande wakawake washo awɔ lo munga ya wanɛ wakasɔnwama oma le Jehowa? (4) Naa dionga di’engunungunu diakonge lawɔ? (5) Lande na kakiwɔ kɔngɛnangɛna la waɛsɛ w’olimu waki la wɔ? (6) Ngande wakawetawɔ dia kɔlamelo yawɔ otsha le angɛnyi awɔ ndo nkumbo yawɔ mbeta la ntondo ka kɔlamelo yawɔ otsha le Nzambi?
Tɔsɛdingole woho wendana wetshelo w’oma lo dramɛ dia lo Bible sɔ la woho wɔsaso sho shoamɛ lowandji la Nzambi ɛlɔ kɛnɛ: (1) Ngande wahombaso sala la ntondo ka tɛdikɔ tɔsa dikumanyi dia l’etshumanelo, ndo lande na? (2) Ngande wakokaso shika tanga la ntondo ka shɛngiya tshɛ ya kɔlɔ yele l’otema aso? (3) Ngande wahombaso sala la ntondo ka munga ya wanɛ wakasɔnwama dia nɔmbɔla? (4) Kakɔna kahombaso sala naka dionga di’engunungunu diambomɛ sɔnga edio l’etema aso? (5) Ngande wahombaso ndjaoka lo kɛnɛ kendana la waɛsɛ wambowotosha? (6) Waa na wahahombe mbeta la ntondo ka kɔlamelo yaso otsha le Nzambi, ndo etena kakɔna kakoka dikambo sɔ koma ohemba a wolo le so?
L’ɔkɔngɔ wa nyu kɛtshanya awui asɔ l’etshumanelo, lande na kahayanyomenda bandɛ vidɛo kɛsɔ nto? Bandɛ kɛsɔ akakatshiya lo timba taso ɛkɔkɔ watotshutshuya dia nɛmiya lowandji la Jehowa!—Osam. 18:25; 37:28.