Shaka anto periodikɛ etena kasambishayɛ

1, 2. Shɛngiya yakɔna yele la Tshoto y’Etangelo la Réveillez-vous ! lo nsɛnɔ ya anto?

¹ “Amɛna, tɛkɛtaka di’akambo weta nshi nyɛ ndo keketshaka.” “Tojurunalɛ toleki keketsha temi talâdiaka.” Ɔsɔ ekɔ waa kɔmatɛrɛ yɛnya woho wayaoka ambadi wa l’andja w’otondo etena kadiawɔ Tshoto y’Etangelo la Réveillez-vous ! Lo mɛtɛ, periodikɛ yaso yekɔ dihomɔ di’ohomba efula dia sambisha ‘weho w’anto tshɛ’ lokumu l’ɔlɔlɔ.​—⁠1 Tim. 2:⁠4.

² Omundji ɔmɔtshi w’okanda akalongola numɛlɔ kɛmɔtshi ka Réveillez-vous! kendana la dui dimɔtshi diakakotola yambalo yande. L’ɔkɔngɔ diko, nde akadia ndo Tshoto y’Etangelo yakandakondja etena kakɔ kâmɛ. Sawo dimɔtshi diakôtshutshuya dia nde sɛdingola dimɛna wetshelo wokondetawɔka nshi tshɛ wa Losato l’osanto. Dikambo sɔ akemula nsaki kande. L’ɔkɔngɔ wa ngɔndɔ shamalo, nde akabatizama. Pami kekina akalongolaka waa periodikɛ mbala la mbala koko nde kombadiaka. Lo wedi okina, wadɛnde lakatonaka Ɛmɛnyi wa Jehowa akadiaka waa periodikɛ yakawatshikɛka omɛnde. Otema ande wakanandema lo alaka washa Bible wendana la paradiso ka la nkɛtɛ kayolola la anto wa losembwe. L’edjedja wonya, nde, ɔnande ndo kosɛnde ka womoto wakakome ekambi waki Jehowa.

3. Wahɔ akɔna wonga lo mbisha anto periodikɛ yakɔ hiende?

³ Sha periodikɛ yakɔ hiende: Oko wadiɛnya bɛnyɛlɔ dia lâdiko ndo, hatokoke mbeya onto akɔna ayadia periodikɛ yaso kana sawo diakɔna diayemula nsaki kande. (Und. 11:⁠6) Ɔnkɔnɛ, ekɔ ohomba mbisha anto Tshoto y’Etangelo la Réveillez-vous ! kânga mbele mbala efula paka awui wa lo periodikɛ ɔtɔi mbayotoleka tɔtɔmiya lo mbɔtwɛlɔ yaso. Tena dimɔtshi, mbeyaka monga dimɛna mbisha onto numɛlɔ yotshikitanyi ya periodikɛ yaso lo wendelo ɔmɔtshi.

4. Ngande wakokaso mbidja okahanyelo wa periodikɛ lo ekongelo kaso?

⁴ Ekɔ ohomba sɔna lushi ɔtɔi lomingu tshɛ dia tombaka lo olimu w’okahanyelo wa periodikɛ. Lo Calendrier des Témoins de Jéhovah 2005, Lushi la samalo tshɛ layɔsamaka oko “Journée des périodiques.” Lo mɛtɛ, lam’ele awui ndo ekakatanu w’onto l’onto tshikitana, anto amɔshi mbeyaka la sɔna lushi lokina dia mbishaka anto periodikɛ yaso. Onde wɛ ambodjaka dikambo sɔ lo ekongelo kayɛ ka lomingu la lomingu?

5. Waaso akɔna wa kahanya periodikɛ wahombaso mambalɛka ndo kakɔna kakoka tokimanyiya dia sala dui sɔ?

⁵ Yadjɛ oyango: Ndjadjɛ oyango ngɔndɔ tshɛ dia kahanyaka periodikɛ kokaka tokimanyiya dia sho nyomoleka mbidja yimba lo okahanyelo wa periodikɛ. Onde wɛ ekɔ la anto watoyoshaka periodikɛ mbala la mbala? Onde wɛ mbishaka anto wahomana la yɛ l’esambishelo periodikɛ? Onde wɛ kokaka mbisha anto periodikɛ lo esambishelo ka lo toshinga, lo mbilo y’amundji w’okanda kana lo ahole w’anto tshɛ? Onde wɛ mbɔsaka periodikɛ etena katayatshu lo lɔkɛndɔ, lo lobingu kana lo ahole akina? Kamba la diaaso tshɛ dia kimanyiya anto akina dia vɔ kondja wahɔ oma lo Tshoto y’Etangelo la Réveillez-vous !

6. Ngande wakokaso kamba la periodikɛ y’edjedja lo yoho ya dimɛna?

⁶ Sho mbeyaka nto ndjadjɛ oyango wa kahanya periodikɛ y’edjedja yele laso. Oyadi hatokahanyisha periodikɛ l’atei a ngɔndɔ ɔtɔi kana hiende, awui wele lɔkɔ wekɔ paka ohomba efula. Sha anto wɛnya nsaki periodikɛ yakɔ. Le miliyɔ y’anto, Tshoto y’Etangelo la Réveillez-vous ! ekɔ ‘dui diotami lo etena kadiɔ.’ (Tuk. 25:11) Nyɛsɔ tokambe layɔ dia kimanyiya miliyɔ efula y’anto dia vɔ mbeya ndo kambɛ Jehowa.

Woho wa mbisha anto periodikɛ

(Numɛlɔ kele bu l’ɔtɛkɛta anyu, ko nyu menda lo Falase)

Tshoto y’Etangelo Ngɔ. ka 2, 15

“Tena efula, sho mbokaka waa alapɔlɔ wɛnya dia dihindo dimɔtshi diambosalema lɛkɛ lɔmɔtshi. [Sha ɛnyɛlɔ kɛmɔtshi.] Anto amɔtshi mbetawɔka alapɔlɔ ɛsɔ. Akina hawowaetawɔ kânga yema tshitshɛ. Periodikɛ kɛnɛ mɛnyaka dia kana ahindo wɔkɔndwami lo Bible wakasalema mɛtɛ ndo kana akambo wa woho ɔsɔ salemaka ɛlɔ kɛnɛ.” Adia Jeremiya 32:⁠21.

Réveillez-vous! Ngɔ. ka 2, 22

“Lo nshi y’edjedja, Nzambi akadjangɛ ana w’akɛnda dia nɛmiyaka anyangɛwɔ la washɛwɔ. [Adia Etumbelu 20:12.] Onde wɛ fɔnyaka dia ambutshi wa wamato wekɔ lo nɛmiyama lo yoho ya dimɛna ɛlɔ kɛnɛ? [Tshikande akadimole.] Periodikɛ kɛnɛ tɛkɛtaka di’ekakatanu wahomana la ambutshi wa wamato lo wedja efula ndo woho watondoyawɔ ekakatanu ɛsɔ.”

Tshoto y’Etangelo Ngɔ. ka 3, 1

“Onde wɛ fɔnyaka dia andja wayonga dihole dia dimɛna efula naka onto l’onto kamba la dako nɛ? [Adia Romo 12:​17, 18. Oma lâsɔ, tshikande akadimole.] Lonyangu ko, mbala efula ewanu tombaka lam’asaso. Periodikɛ kɛnɛ mɛnyaka dia kamba la alako wa lo Bible koka tokimanyiya dia sho kandola ewanu ndo mbidja wɔladi.”

Réveillez-vous! Ngɔ. ka 3, 8

“Ɔnɔnyi tshɛ, lofulo l’efula la anto wele la ohomba wa osase lekɔ lo tahame. Onde wɛ kokaka kanyiya yema kɛnɛ kakoka tomba naka lushi lɔmɔtshi osase wele laso ohomba amboshila? [Tshikande akadimole.] Periodikɛ kɛnɛ tɛkɛtaka dia ehamelo wambosalema dia nɔngɔsɔla tɔkɔkɔ tasha osase. Tɔ mɛnyaka nto ele Kiɔkɔ ya osase tshɛ.” Adia Isaya 40:⁠26.