Lende atatshu lɔsɛnɔ layɛ?

• Anto efula ndekaka ndjasha l’awui wa lo lɔsɛnɔ la lushi la lushi woho ɔnɛ wele hawoyoleka kanyiya dimɛna lende atawatshu.

• Bible tewoyaka awui wa diambo efula watokongɛ la ntondo. Tɔ tewolaka nto dikambo di’etshikitanu wa mamba wayosalema l’atshunda w’anto wa l’andja w’otondo. Dia sho kondja wahɔ oma lo kɛnɛ katotɛ Bible ndo mbewɔ mpokoso, sho la dia mbɔsa yɛdikɔ y’ɔlɔlɔ aha la tshimbatshimba.

• Ekɔ anto amɔtshi weya kɛnɛ kata Bible ndo wahemba dia kamba la tɔ koko mbetawɔka di’ekiyanu wa lo lɔsɛnɔ mbatɔla otsha lo kɔlɔ.

• Onde sho ngɛnangɛnaka lɛnɛ atatshu lɔsɛnɔ laso? Etena kakongɛyɛ elimu ayɛ, onde wɛ sɛdingolaka shɛngiya yakoka monga l’elimu akɔ l’eyango ayɛ wa lo lɔsɛnɔ?

[Kiombo/Esato wa lo lɛkɛ 9]

Dui diakɔna dioleki ohomba le yɛ?

Ngande wayoyɔlɔnga awui anɛ lo ndjela ehomba awɔ? Lɔngawɔ oma lo 1 polo 10 lo ndjela ehomba awɔ.

Efula l’atei awɔ wekɔ ohomba lo lɔsɛnɔ, ko naka wɛ pombaka sɔna, dui diakɔna diayeta lo dihole dia ntondo? dia hende? ndo l’ahole akina.

․․․ Tɔkɛnyɔ/ɔsɛnyɛlɔ a washo

․․․ Olimu ami

․․․ Yônge yami ya demba

․․․ Ɔngɛnɔngɛnɔ w’onto ndamɛ

․․․ Olonganyi ami

․․․ Ambutshi ami

․․․ Anami

․․․ Luudu ndo ahɔndɔ w’amɛna

․․․ Mongaka onto loleki lo kɛnɛ tshɛ kasalami

․․․ Ɔtɛmwɛlɔ wa Nzambi

[Kiombo ya lo lɛkɛ 10, 11]

Onde ɛsɔnwɛlɔ ayɛ kɔtɔlaka otsha lɛnɛ alangayɛ mɛtɛ ntshɔ?

SƐDINGOLA WEMBOLA ƐNƐ

TƆKƐNYƆ/ƆSƐNYƐLƆ A WASHO: Onde tɔkɛnyɔ tasɔnami keketshakami? Onde tɔ koka mbishami ɔngɛnɔngɛnɔ wakoka mbidja yônge yami ya demba lo wâle kana tshikami l’ɛkɔmɔ ka pondjo? Onde tɔ tekɔ weho wa “tɔkɛnyɔ” takoka mbishami ɔngɛnɔngɛnɔ wa wenya engana eto ko l’ɔkɔngɔ diko ndjombisha pâ ka l’asolo kahashile? Oyadi tɔkɛnyɔ tamomɔsɔna tekɔ amɛna, onde dimi mbetshaka wenya efula lɔkɔ woho ɔnɛ wele tɔ hatoyombisha wenya efula wa sala akambo woleki ohomba?

OLIMU AMI: Onde vɔ wekɔ paka dia kimanyiyami dia kotsha ehomba wa lo lɔsɛnɔ, ko kana laya fumbe k’olimu akɔ? Onde olimu akɔ nɔmbakami akambo wakoka mbidja yônge yami lo wâle? Onde layokombola kamba wenya ekina lâdiko ko kana layokombola mbetshaka wenya kâmɛ l’olonganyi ndo la anami? Naka owandji ami w’olimu ambɔnɔmba dia kamba olimu walɔshana la nkum’otema kami kana wakoka mbidjɛmi wekamu l’akambo wa lo nyuma, onde layowokamba la wɔma waha dimi ndjoshisha olimu ami?

YÔNGE YAMI YA DEMBA: Onde dimi ndjiɔsaka oko dui diele bu ohomba ndo mɛnaka ohomba wa kokɛ yônge yakɔ? Onde dimi ndeka tɛkɛta dia yônge yami ya demba? Onde woho wayakiyanyami dia yônge yami ya demba mɛnyaka dia dimi kanɛka nkumbo kami?

ƆNGƐNƆNGƐNƆ W’ONTO NDAMƐ: Onde ɔngɛnɔngɛnɔ ami mbêtshami lo dihole dia ntondo? Onde dimi mbetshaka ɔngɛnɔngɛnɔ ami la ntondo ka w’olonganyi ami kana wa nkumbo kami? Onde yoho yayangami ɔngɛnɔngɛnɔ akɔ mbɔtɔnɛka la woho wemi ɔtɛmɔdi wa Nzambi ka mɛtɛ?

OLONGANYI AMI: Onde dimi mbɔsaka olonganyi ami oko osekami paka wonya wakotshande ehomba ami? Onde dimi mbɔsaka olonganyi ami la nɛmɔ diahomba onto nongola? Onde mbetawɔ kami le Nzambi kekɔ la shɛngiya lo woho wɔsami olonganyi ami?

AMBUTSHI AMI: Naka lêke dikɛnda, onde lekɔ l’okitanyiya le ambutshi ami, lo mbakadimolaka la dilɛmiɛlɔ, lo salaka elimu wambishawɔ, ndo lo komaka la ngelo lo wonya wakawashikikɛ, lo mbewɔ angɛnyi wa kɔlɔ ndo elimu wambewolawɔ? Naka laya opalanga, onde dimi mpokamɛka ambutshi ami la dilɛmiɛlɔ, lo mbasha ekimanyielo kahombama etena kele dui sɔ ohomba? Onde yoho yasɛnami la wɔ nɔmbwamaka la nango yami kana la dako di’oma l’Ɔtɛkɛta wa Nzambi?

ANAMI: Onde dimi mbeyaka dia lekɔ l’ɔkɛndɛ wa mbetsha anami ɛlɛmbɛ wendana la lɔkɛwɔ l’ɔlɔlɔ ko kana dimi nongamɛka dia vɔ têka awui asɔ la kalasa? Onde dimi mbetshaka wenya kâmɛ l’anami, kana dimi nongamɛka dia vɔ ndjasha lo tɔkɛnyɔ, lo wendelo wa televiziɔ kana lo tɔkɛnyɔ ta l’ɔrdinatɛrɛ? Onde dimi mingolaka anami mbala la mbala etena kɔnyɔlawɔ waohwelo waki Nzambi, kana dimi salaka dui sɔ paka etena kemi la kɛlɛ?

LUUDU NDO AHƆNDƆ W’AMƐNA: Kakɔna kashikikɛ woho wa yambalo yadjami l’ɛnamelo kami ndo lo diangɔ diele lami, onde woho walangami anto akina mbɔsami? ɔlɔlɔ wa nkumbo kami? woho ɔnɛ wemi ɔtɛmɔdi waki Nzambi?

MONGAKA ONTO LOLEKI LO KƐNƐ TSHƐ KASALAMI: Onde dimi mbeyaka dia ekɔ ohomba sala akambo lo yoho ya dimɛna? Onde dimi salaka la wolo dia monga onto loleki? Onde dimi mbokaka kɛlɛ naka onto okina ambosala dui dimɔtshi dia dimɛna efula?

ƆTƐMWƐLƆ WA NZAMBI: Onde mbetawɔma le Nzambi ekɔ dui dioleki ohomba le mi oleki mbetawɔma le olonganyi ami, anami, ambutshi ami, kana owandji ami w’olimu? Dia dimi monga la lomombo, onde paka dimi mbetsha olimu wakambɛmi Nzambi lo dihole dia hende?

TƆSƐDINGOLE DIMƐNA ALAKO WA LO BIBLE

Dihole diakɔna diele la Nzambi lo lɔsɛnɔ layɛ?

Undaki 12:13: “Uki [Nzambi ka mɛtɛ] woma, ulamaki elembe andi. Oso eli okende w’untu tshe.”

YAMBOLA WATE: Onde lɔsɛnɔ lami mɛnyaka dia dimi mɛnaka akambo lo yoho shɔ? Onde okitanyiya lo wadjango waki Nzambi mbashikikɛ woho wakotshami ɛkɛndɛ wa lo nkumbo, wa l’olimu, kana wa la kalasa? Kana onde awui akina kana tɔsɛngiya ta lo lɔsɛnɔ mbashikikɛ dia kana dimi pombaka ndjaombɛ etena dikambo di’awui wa Nzambi?

Diɔtɔnganelo dia ngande diele lam’asayɛ la Nzambi?

Tukedi 3:5, 6: “Ekamaki [Jehowa] l’utema aye tshe, tekamaki yimba yaye hita. Uwetawoki lu akambu aye tshe, ku ndi ayukolongoswela mbuka yaye.”

Mateu 4:10: ‘Jehowa Nzambi kayɛ mbahombayɛ tɛmɔla, ndo nde oto mbahombayɛ kambɛ olimu w’ekila.’

YAMBOLA WATE: Onde ngasɔ mbɔsami Nzambi? Onde elimu ami wa lushi la lushi ndo woho walɔshanami l’ekakatanu mɛnyaka woho wa wɛkamu ndo w’omamemelo ɔsɔ?

Ohomba wa ngande wele la wadielo ndo wekelo wa Bible le yɛ?

Joani 17:3: “Lumu la pundju lone, eli [mbeka dia] nkêya, weme [Nzambi ɔtɔi k]a mete, la Jesu Kristu, lakayatumi.”

YAMBOLA WATE: Onde dihole diashami wadielo w’Ɔtɛkɛta wa Nzambi ndo woho wakanami la wɔ yimba mɛnyaka dia lekɔ mɛtɛ la mbetawɔ lɔkɔ?

Ohomba wa ngande wele la wɔtwɛlɔ wa lo nsanganya ya l’etshumanelo k’Akristo le yɛ?

Heberu 10:24, 25: “Tukananeli untu l’untu dia [tshutshuyana] lu ngandji la lu elimu w’ololo. Tatukimoki nsangana kame. . . . Tuleki ntsha okone, ne dia nyambena nyati: Lushi lako laya suki.”

Osambu 122:1: “Dimi lakangenangena lam’akawamvutela vati: Tutshu utsha lu luudu la [Jehowa]!”

YAMBOLA WATE: Onde yoho yami ya lɔsɛnɔ mɛnyaka lowando lami l’ɛlɔmbwɛlɔ kɛsɔ katanema l’Ɔtɛkɛta wa Nzambi? Lo ngɔndɔ ketshi kɛnɛ, dimi laketsha nsanganya mɔtshi y’Akristo nɛ dia laketawɔ di’awui amɔtshi mbidjɛmi wekamu?

Onde wɛ ekɔ l’ohetoheto lo mbewoya anto akina awui wendana la Nzambi ndo la sangwelo diande?

Mateu 24:14: “Lukumu l’ololo lone la diulelu layusambishama lu kete tshe. . . . L’okongo diku, ekumelu kayuya.”

Mateu 28:19, 20: ‘Ɔnkɔnɛ, nyotshu ndo nyetɛ anto wa lo wedja tshɛ ambeki, . . . nyowaetshake dia vɔ sɛdingola akambo tshɛ wakamanyodjangɛ.’

Osambu 96:2: “Nyimbeli [Jehowa], nyutumbuli lukumbu landi, nyutaki dia panda kandi la lushi la lushi!”

YAMBOLA WATE: Onde olimu ɔsɔ wekɔ la dihole diɛdimi lawɔ lo lɔsɛnɔ lami? Onde nganɛ wakambami olimu akɔ mɛnyaka dia dimi mbetawɔka dia tekɔ lo nsɛna lo tena dia wolo?