Woho wa Mbisha Anto Ekanda lo Mbilo Kɛnɛ Katɛkɛtama Ɛtɛkɛta Efula

1. Lande na kele tshumanelo efula diekɔ l’ohomba w’ekanda l’ɔtɛkɛta okina?

¹ L’ahole efula, mbilo yekɔ l’anto woye oma lo wedja kana prɔvɛsɛ kina. Efula l’atei awɔ mbekaka akambo wa mɛtɛ ndo mbashihodiaka esadi eto naka vɔ mbetshama l’ɔtɛkɛta awɔ wa lôtɔ. Tɛdikɔ takɔna tambɔsama dia mbisha wanɛ wayasha l’akambo wa mɛtɛ ekanda walembetshiya awui wa lo Bible l’ɔtɛkɛta walekawɔ mboka dimɛna?

2. Kakɔna kahombama naka tshumanelo pende kana ndekana diatɛkɛta ɛtɛkɛta wotshikitanyi diekɔ lo kamba lo mbilo kakɔ ɔtɔi?

² Etena Kahombaso Mbisha Anto Ekanda: Lam’akamba tshumanelo pende kana ndekana diatɛkɛta ɛtɛkɛta wotshikitanyi lo mbilo kakɔ ɔtɔi, elui wa dikumanyi wa lo tshumanelo sɔ wayokamba kâmɛ l’emendji w’olimu dia mbɔsa tɛdikɔ tɔmɔtshi t’ɔlɔlɔ di’olui tshɛ w’ɔtɛkɛta ɔmɔtshi sambishama dimɛna. Lam’asambishawɔ lo luudu la luudu, apandjudi hawohombe kahanya ekanda l’ɔtɛkɛta w’etshumanelo kana wa tshumanelo dikina. Lo wedi okina, lam’asambisha apandjudi lo tshakitudi kana l’ahole w’anto tshɛ, vɔ kokaka kahanya ekanda l’ɛtɛkɛta watɛkɛtama lo ngelo kɛsɔ.

3. Etena kakɔna kakoka etshumanelo momba ekanda l’ɔtɛkɛta w’angɛndangɛnda?

³ Etena Kahombaso Momba Ekanda: Kakɔna kahombama salema naka anto efula watɛkɛta ɔtɛkɛta ɔmɔtshi w’angɛndangɛnda wekɔ lo mbilo kɛnɛ kele ndoko etshumanelo katɛkɛta ɔtɛkɛta ɔsɔ na? L’etena kɛsɔ, tshumanelo kokaka momba lofulo lɔmɔtshi la tshitshɛ l’ekanda watanema l’ɔtɛkɛta ɔsɔ, oko traktɛ, biukubuku Katɔlɔmba la Ɔngɛnyi wa Nzambi, ndo dibuku Ewo. Apandjudi kokaka kahanya ekanda ɛsɔ l’etena tshɛ kahomanawɔ l’anto wakoka mbadia ekanda l’ɔtɛkɛta akɔ.

4. Ngande wakoka etshumanelo kondja ekanda l’ɔtɛkɛta wahawombaka ekanda lɔkɔ?

⁴ Woho wa Nɔmba Ekanda: Naka etshumanelo bu l’ekanda l’ɔtɛkɛta watɛkɛta onto ɔmɔtshi layasha l’akambo wa mɛtɛ mbadia, ngande wakokawɔ kondja ekanda l’ɔtɛkɛta ɔsɔ na? Opandjudi la dia sɛdingola kâmɛ nde l’okambi wendana l’awui w’ekanda dia shikikɛ ekanda wele l’ɔtɛkɛta ɔsɔ woho wa vɔ mbeya nɔmba ekanda wende l’ohomba l’ɔnɔngɔ wa kɔmandɛ kayosala etshumanelo.

5. Kakɔna kakoka salema naka onto ɔmɔtshi amonga l’ohomba w’ekanda la ntondo k’etshumanelo nongola ekanda wayowɔlɔmba mbala kayaye?

⁵ Naka opandjudi ekɔ l’ohomba w’ekanda ɛsɔ esadi nde kokaka nɔmba ɔnangɛso ɔmɔtshi la lo Kɔmite k’Olimu ka l’Etshumanelo dia vɔ toma kɔmandɛ kande la ntondo ka kɛnɛ kayotoma etshumanelo. Naka dikambo sɔ diambetawɔma, omendji w’ekanda kana onto ɔmɔtshi lakandasɔnɛ kokaka tomɛ filialɛ kɔmandɛ kɛsɔ aha la tshimbatshimba. Wayotomɛ etshumanelo ekanda ɛsɔ l’adrɛsɛ wokowokitomɛka kana l’adrɛsɛ ɔmɔtshi wa lo tshanda kana kokaka.

6. Oyango akɔna wele laso lo monga l’ekanda w’Akristo wahombama?

⁶ Nyɛsɔ tokambe dimɛna l’ekanda w’Akristo dia ‘weho w’anto tshɛ kondja ewo k’oshika k’akambo wa mɛtɛ ndo shimbamela,’ oyadi ɔtɛkɛta akɔna watɛkɛtawɔ.​—⁠1 Tim. 2:​3, 4.

Woho wa Mbisha Anto Periodikɛ

(Numɛlɔ kele bu l’ɔtɛkɛta anyu, ko nyu menda lo Falase)

Tshoto y’Etangelo Ngɔ. ka 7, 15

MBEWOYAKA DIOLELO DIAKI JEHOWA

“Anto efula wambɛna di’anto waya la mbekelo ka ndjânganya l’anto ko toyadjasɛ vɔ vɔamɛ. Onde wɛ fɔnyaka dia ɔsɔ ekɔ yoho ya lɔsɛnɔ ya dimɛna? [Tshikande akadimole.] Hokamɛ ɛtɛkɛta ɛnɛ w’amɛna wendana l’ohomba wa monga l’angɛnyi. [Adia Undaki 4:​9, 10.] Periodikɛ kɛnɛ mɛnyaka bonde kele sho tshɛ tekɔ l’ohomba w’akina ndo woho wayokandɔma dikambo dia ndjânganya l’anto akina.”

Réveillez-vous! Ngɔ. ka 7, 22

“Anto efula wekɔ la lonyangu lo mɛna woho wambokokanɛ awui wa kɔlɔ wa dieyanelo. Onde ɔsɔ ekɔ dikambo dia ndjakiyanya? [Tshikande akadimole.] Alako w’eshika wele lo Bible kokaka tokokɛ. [Adia Efeso 5:​3, 4.] Periodikɛ kɛnɛ mɛnyaka woho wakokaso ndjakokɛ oma lo wâle ɔsɔ.”

Tshoto y’Etangelo Ngɔ. ka 8, 1

MBEWOYAKA DIOLELO DIAKI JEHOWA

“Onde wɛ mbeyaka dia lo ndjela alapɔlɔ ɔmɔtshi, lofulo la l’atei atei l’anto wa l’andja w’otondo wekɔ lo sɛna l’ɛse ka dɔlara hiende lo lushi? Onde wɛ fɔnyaka dia dui dimɔtshi kokaka salema dia kandola okakatanu ɔsɔ? [Tshikande akadimole.] Tshoto y’Etangelo nyɛ mɛnyaka woho wɛnya Bible dia wola wayonyɛma lo pondjo.”​—⁠Adia Osambu 72:​12, 13, 16.

Réveillez-vous! Ngɔ. ka 8, 8

“L’ɛnɔnyi weke kambeta, mpokoso y’oma lo tânyi, tshitshi kana ngembe (catastrophes climatiques) yakalanya diangɔ efula l’andja w’otondo. Kakɔna kakanyiyayɛ kakoka salema dia kitshakitsha pâ yelayɔ? [Tshikande akadimole.] Periodikɛ kɛnɛ tɛkɛtaka dikambo dia mpokoso shɔ ndo woho wɛnya Bible nganɛ wayokandɔma dikambo sɔ.”​—⁠Adia Isaya 35:⁠1.