Woho wa kamba la bɛnyɛlɔ dia mbɔtwɛlɔ

1. Ngande wahombaso mbɔsa bɛnyɛlɔ dia mbɔtwɛlɔ diatoshawɔ?

¹ Bɛnyɛlɔ dia mbɔtwɛlɔ diendana la woho wa mbisha anto periodikɛ ndo ekanda ekina tombaka mbala la mbala lo Olimu aso wa Diolelo. Lama watshɔso l’olimu w’esambishelo, hatohombe kambaka la mbɔtwɛlɔ shɔ paka woho wofundamiyɔ. Mbɔtwɛlɔ shɔ yekɔ la oyango wa tokimanyiya dia mbeya kɛnɛ kakokaso mbuta. Tayolekaka kondja etombelo w’ɔlɔlɔ naka sho salaka mbɔtwɛlɔ lo ɛtɛkɛta aso hita. Tɛkɛta lo yoho yokotɔtɛkɛtaka kimanyiyaka ompokami aso dia nde ndjaoka dimɛna ndo dui sɔ mɛnyaka dia tekɔ lo tɛkɛta l’otema ɔtɔi ndo la dietawɔ.​—⁠2 Kor. 2:17; 1 Tes. 1:⁠5.

2. Lande na kahombaso mbidja yimba lo mbekelo ya lo ngelo etena kalɔngɔsɔlaso mbɔtwɛlɔ?

² Ɔtɔnganyiya mbɔtwɛlɔ kayɛ: Mbekelo ya lo ngelo kaso mongaka la shɛngiya y’efula lo mbɔtwɛlɔ kahomba kamba laso dia mbewoya lokumu l’ɔlɔlɔ. Onde wɛ kokaka mbishana la ompokami ayɛ mɔyɔ ko oma lâsɔ wɛ mbɔtshiya sawo diayɛ, ko kana anto wa l’ɛtshi kanyu ka nkɛtɛ nongamɛka dia wɛ mbatɛ mbala kakɔ ɔtɔi kɛnɛ koyeyɛ? Mbekelo shɔ tshikitanaka lo dihole la dihole ndo mbala mɔtshi lo ndjela onto la onto. Shɛnɔdi ekɔ nto ohomba lo okambelo wa la wembola. Wembola wele ɔlɔlɔ lo dihole dimɔtshi mbeyaka mbisha anto wa lo ahole akina nkɛlɛ. Ɔnkɔnɛ, sho pombaka monga la ekanelo k’ɔlɔlɔ ndo mbɔtɔnganyiya mbɔtwɛlɔ yaso la kɛnɛ ketawɔma lo ɛtshi kaso ka nkɛtɛ.

3. Lande na kahombaso mbidja yimba lo diewo ndo lo tokanyi taki wanɛ wasambishaso?

³ Sho pombaka nto mbidja yimba lo diewo ndo lo tokanyi taki anto wa lo ɛtshi kaso ka nkɛtɛ etena kayalɔngɔsɔlaso dia ntshɔ l’olimu w’esambishelo. Ɛnyɛlɔ, wɛ mbeyaka mɛna ɔlɔlɔ kɛtshanya Mateu 6:​9, 10 la oseka Mupɛ ɔmɔtshi layasha efula lo ɔtɛmwɛlɔ awɔ lo yoho yotshikitanyi la woho wotoyɔkɛtshanya divɛsa sɔ la onto laheye dimɛna “disambɛ dia Shɛso.” Naka sho tâkanyiyisha yema la ntondo, kete sho kokaka mbɔtɔnganyiya mbɔtwɛlɔ yaso dia yɔ ndeka kotola yambalo yaki anto wahomana la so lo esambishelo.​—⁠1 Kor. 9:​20-23.

4. Lande na kele ndjalɔngɔsɔla dimɛna ekɔ ohomba efula?

⁴ Koyanga etena kakongɛso dia tokamba la ɛnyɛlɔ kɛmɔtshi ka mbɔtwɛlɔ kakatafundji yema lo dikatshi, ndoko kɛnɛ koleki ndjalɔngɔsɔla dimɛna. Sho pombaka mbadia la yambalo tshɛ sawo kana tshapita yakatakonge dia tosawola la onto ndo sɔna awui amɔtshi wakoka memula nsaki kande. Oma lâsɔ, sho kokaka mbidja akambo akɔ lo mbɔtwɛlɔ yaso. Naka sho mbekesanɛ l’akambo w’ɔlɔlɔ wele lo ekanda aso, kete sho kokaka mbasha anto la ɔngɛnɔngɛnɔ tshɛ.

5. Lande na kahombaso nɔngɔsɔla mbɔtwɛlɔ kekina, ndo ngande wakokaso sala dikambo sɔ?

⁵ Mbɔtwɛlɔ nkina: Onde sho pombaka kamba paka la mbɔtwɛlɔ yele lo bɛnyɛlɔ dia mbɔtwɛlɔ? Ndooko. Naka wɛ ekɔ la mbɔtwɛlɔ kana la divɛsa dikina diatoyɔngɛnangɛnaka kamba ladiɔ, kete kamba ladiɔ. Djekoleko lo kɛnɛ kendana la periodikɛ, ongaka suke dia kamba la asawo akina wele bu lo lohoso wakoka ndeka kotola yambalo yaki anto wa lo ɛtshi kanyu ka nkɛtɛ. Etena kasalema wɛnyɛlɔ wa mbɔtwɛlɔ yakoka kamba laso l’olimu w’esambishelo lo Losanganya l’olimu, tɛdikɔ mbeyaka la mbɔsama dia mɛnya woho tshɛ wa mbɔtwɛlɔ wonga la etombelo w’ɛlɔlɔ lo ɛtshi kanyu ka nkɛtɛ. Lo yoho shɔ anto tshɛ mbeyaka la kimanyiyama dia sambisha lokumu l’ɔlɔlɔ dimɛna.

Woho wa mbisha anto periodikɛ

(Numɛlɔ kele bu l’ɔtɛkɛta anyu, ko nyu menda lo Falase)

Tshoto y’Etangelo Ngɔ. ka 1, 15

“Sho tshɛ kombolaka dia sho ndo anaso monga la lɔsɛnɔ la dimɛna efula. Koko anto efula fɔnyaka dia hawokokaki monga la lɔsɛnɔ la ngasɔ. Onde wɛ fɔnyaka dia sho koka sala dia nshi yaso yayaye monga woho walangaso yɔ ndjala? [Tshikande akadimole.] Periodikɛ kɛnɛ mɛnyaka oma l’ekimanyielo ka Bible dia tekɔ l’akoka wa monga la lɔsɛnɔ la dimɛna efula, koko nshi yaso yayaye nemanɛka la ɛsɔnwɛlɔ wasalaso kakianɛ.” Adia Euhwelu k’Elembe 30:⁠19.

Réveillez-vous! Ngɔ. ka 1, 22

“Lam’alɔshanaso la hemɔ, sho tshɛ ngɛnangɛnaka dɔkɔtɛlɛ diadja yimba lo tokanyi taso. Ko onde wɛ fɔnyaka dia ɛkɔnyi efula tonaka ndjela tokanyi taki adɔkɔtɛlɛ awɔ? [Tshikande akadimole.] Periodikɛ kɛnɛ tɛkɛtaka dikambo dia ekakatanu wahomana la adɔkɔtɛlɛ ndo awui wakongɛ aseka enganga lo nshi yayaye.” Adia Isaya 33:⁠24.

Tshoto y’Etangelo Ngɔ. ka 2, 1

“Onde wɛ hanyange dia mɛna woho wasɔkishama anto efula ndo wahomanawɔ la awui wa ngala? [Shila dui dimɔtshi dieke ka tomba lo ngelo kanyu dieyama efula, ndo tshikande akadimole.] Periodikɛ kɛnɛ mɛnyaka woho wɔsa Nzambi lɔsɛnɔ laki onto. Tɔ nembetshiyaka nto woho wayondototshungola oma lo asui wa nshi nyɛ.” Adia Osambu 72:​12-14.

Réveillez-vous! Ngɔ. ka 2, 8

“Okakatanu ɔmɔtshi woleki wolo wahomana laso nshi nyɛ ele woho wa ndɔshana la ɔkɔmwɛlɔ. Onde wɛ hetawɔ dikambo sɔ? [Tshikande akadimole.] Bible akatatshi shikaa dia ngasɔ mbahombadiɔ monga. [Adia 2 Timote 3:⁠1.] Periodikɛ kɛnɛ mbishaka alako w’eshika wakoka kokimanyiya wɛ la nkumbo kayɛ dia ndɔshana la ɔkɔmwɛlɔ.”