Tɔlɔmbɔlɛ wekelo wa Bible watahame

Etenyi 6 : Etena koka ombeki dimbola

¹ Naka tamboshila kongɛ dimɛna dia mbekaka la onto Bible, kete, ayoleka dimɛna dia tasɛdingolaka wetshelo wa lo Bible lo yoho yaha l’ofukutanu lo dihole dia tatambatambaka la akambo. Kɛsɔ kimanyiyaka dia ewo k’oshika k’ombeki monga la ehikamelo ndo dia nde pama lo nyuma. (Kol. 1:​9, 10) Mbala efula, ambeki mbokaka ambola lo akambo wa weho la weho lo wonya wa wekelo. Ngande wahomba ambola asɔ kadimɔma na?

² Onga la shɛnɔdi: Tena efula ambola wɔtɔnɛ la awui wekama mbeyaka kadimɔma mbala kakɔ ɔtɔi. Naka dimbola dimɔtshi diayɔkɛtshanyema l’ɔkɔngɔ diko lo okanda wa wekelo, kete ayonga ohomba mbewoya ombeki dikambo sɔ. Koko, naka dimbola hɔtɔnɛ la awui wekama kana ayɔlɔmba dia sala yema ya eyangelo dia kadimola dimɛna, kete ayonga dimɛna dia sɛdingola dikambo sɔ l’ɔkɔngɔ wa wekelo kana etena kekina. Apandjudi amɔtshi wakɛnyi dia funda dimbola dioki ombeki yema l’omamu shikikɛka ombeki dia dimbola diande diambɔsama la nɛmɔ ndo dui sɔ kimanyiyaka diaha wekelo shisha oyango awɔ.

³ Abuku efula wekaso la anto Bible sɛdingolaka paka lo tshena pe wetshelo efula wa lo Bible. Kakɔna kayotosala naka ombeki ekɔ la okakatanu dia mbetawɔ wetshelo ɔmɔtshi kana nde sukɛka la wolo tshɛ dietawɔ dimɔtshi dia kashi? Mbeyaka monga ohomba efula sɛdingola akambo akina walembetshiya dimɛna kɛnɛ kata Bible lo dikambo diakɔ. Naka ombeki eke paka la tâmu, kete nyu mbeyaka tokotshika dikambo diakɔ l’omamu ko tetemala la wekelo anyu wa mbala la mbala ko ndjodisawola nshi nkina. (Joa. 16:12) Oko watahame ewo kande ka Bible ndo katahame lonyuma lande, nde mbeyaka ndjoshihodia wetshelo wa lo Bible ɔsɔ.

⁴ Eya elelo ayɛ: Naka wɛ bu la okadimwelo wa shikaa lo dimbola dimɔtshi, kete tonake dia mbisha kanyi yayɛ hita. (2 Tim. 2:15; 1 Pet. 4:11) Tɛnde dia wɛ ayotosala eyangelo lo dikambo diakɔ ndo ayoyôkadimola. Wɛ mbeyaka kamba la diaaso diakɔ dia mbetsha ombeki woho wasalawɔ eyangelo. Yema yema ɛnyande woho wa kamba la dihomɔ dia eyangelo diotshikitanyi diatosha ɔlɔngɔswamelo waki Jehowa. Lo yoho shɔ, nde ayonga la akoka wa kadimola lo ambola ande hita.​—⁠Etsha 17:11.

Tâkimanyiya dia vɔ sambishama nto

¹ Etena kasambishaso lokumu l’ɔlɔlɔ, tena efula sho pomanaka la anto wele bu lo ɛtshi ka nkɛtɛ ka etshumanelo kaso kana watɛkɛta ɔtɛkɛta okina, mbidja ndo ɔtɛkɛta w’akanga a mpoke. Anto akina wakasawolaka la so lo Bible mbeyaka monɔ oma lo mbilo kaso. Ngande wakokaso sala dia anto asɔ sambishama nto? Ele lo kamba la fɔrmilɛrɛ Intérêt à suivre dans une langue étrangère (S-70a) katanema lo tshumanelo diaso. L’ɔkɔngɔ diko tayokamba la fɔrmilɛrɛ Veuillez suivre l’intérêt (S-43).

² Tena efula anto ndekaka mpokamɛ lokumu l’ɔlɔlɔ la yambalo y’efula etena kâsambishawɔ lo ɔtɛkɛta awɔ wa lôtɔ. (Etsha 22:​1, 2) Ɔnkɔnɛ, mbala efula sho pombaka ndodiaka fɔrmilɛrɛ kɛsɔ etena kasawolaso la onto latɛkɛta ɔtɛkɛta okina oyadi onto akɔ hɛnyisha nsaki lo losango la Diolelo. Koko, lo dihole diele anto watɛkɛta ɔtɛkɛta okina wekɔ efula ndo wekɔ lo sambishama mbala la mbala lo ɔtɛkɛta awɔ hita, honga ohomba ndodia fɔrmilɛrɛ kɛsɔ onyake paka onto ambɛnya nsaki.

³ Lodia fɔrmilɛrɛ: La yewo tshɛ sala la wolo dia mbeya lokombo laki onto, adrɛsɛ ndo numɛlɔ ka telefɔnɛ kande. Ɛnya polo lo yɛdikɔ yakɔna yakandɛnyisha nsaki, etena kakoka onto ntshɔ tôsambisha, okanda wakayawosha kana wakandalɔmbɛ ndo ɔtɛkɛta walekande mboka dimɛna. L’ɔkɔngɔ wa wɛ ndodia fɔrmilɛrɛ, shatɔ esadi eto sekeletɛlɛ ka l’etshumanelo, layohomba toma fɔrmilɛrɛ kɛsɔ lo etshumanelo kana olui wakoka kimanyiya onto akɔ.

⁴ Toma fɔrmilɛrɛ: Naka sekeletɛlɛ heye etshumanelo kana olui wahomba nongola fɔrmilɛrɛ kɛsɔ kana nde bu la adrɛsɛ awɔ, kete nde mbeyaka la telefɔnɛ Biro ka filialɛ kendana la olimu dia kondja awui walangawɔ mbeya. Aya bu ohomba mbewoya omendji w’osomba etena katomayɛ fɔrmilɛrɛ.

⁵ Kam’alongola etshumanelo kana olui fɔrmilɛrɛ Intérêt à suivre dans une langue étrangère, tɛdikɔ pombaka mbɔsama esadi eto dia tenda onto akɔ. Naka sho sala la etete tshɛ kɛnɛ kahombaso sala, kete sho kokaka ndjashikikɛ ɔnɛ Jehowa ayodihola etema waki ‘anto wakoka dia kondja lɔsɛnɔ la pondjo.’​—⁠Etsha 13:⁠48.