Ekimanyielo ka l’Etena Kahombama

¹ Lam’akɛnyi ɔpɔstɔlɔ Petero ohomba wa keketsha asekande ambetawudi, nde akatshutshuyama dia mbaohola akambo la ngandji tshɛ ndo dia mbakeketsha. (2 Pet. 1:​12, 13; 3:⁠1) Nde akakeketsha ‘wanɛ waki la mbetawɔ’ dia vɔ mpamia waonga awɔ wa lo nyuma di’aha vɔ ndjonga “tusuasua kana uku antu wahato elua dia nimbitela Khumesu Jesu Kristu.” (2 Pet. 1:​1, 5-8) Sangwelo diaki Petero aki dia mbakimanyiya dia vɔ shikikɛ leeta lakawalongola oma le Jehowa ndo woho wakawasɔnama oma le nde, dia vɔ mbeya “ntanema la ki, aha la vadi, aha la unungu lu ashu andi.” (2 Pet. 1:​10, 11; 3:14) Le ambetawudi efula, ekeketshelo kande aki ekimanyielo kakaye l’etena kakoka.

² Ɛlɔ kɛnɛ, emendji w’Akristo ndjakiyanyaka woho akɔ wâmɛ dikambo di’ekambi waki Nzambi. Lu “tena dia wulu” nɛ, ekambi waki Jehowa efula wekɔ lo mbikikɛ ekakatanu. (2 Tim. 3:⁠1) L’ɔtɛ w’ekakatanu wendana l’awui wa falanga, wa lo nkumbo, kana wele l’onto l’onto, amɔtshi ndjaokaka oko wakayaoke Davidi lakate ate: “Kolo yaheyama mbala yatunyingaka, kolo yami yambonembia, edja ndu haleyi mbedia ashu. Yo yambuleka divu dia l’ote ami efula; ndu dihunga diami diambushila.” (Osam. 40:12) Ekakatanu ɛsɔ mbeyaka ndjonga wotsho efula lo konya anto asɔ dia minya yimba oma l’ɛkɛndɛ wa lo nyuma ndo tshika ndjasha l’olimu w’Akristo. Kânga mbewɔ l’ekakatanu, ‘vɔ kombohɛ ɛlɛmbɛ waki Jehowa.’ (Osam. 119:176) Etena ka dikumanyi mbisha anto asɔ ekimanyielo kele lawɔ ohomba tɔ kɛnɛ.​—⁠Is. 32:​1, 2.

³ Dia kotsha ohomba ɔsɔ, dikumanyi keketshamaka dia vo mbidja welo wa lânde dia kimanyiya wanɛ wahayosambisha nshi nyɛ. Welo w’efula wekɔ lo mbidjama dia kotsha dikambo sɔ ndo diayotetemala mbidjama polo l’ekomelo ka Ngɔndɔ ka Sato. Emendji wa wekelo wa dibuku nɔmbamaka dia membola wanɛ wahayosambisha dia mbasha ekimanyielo ka lo nyuma woho wa vɔ tatɛ sambisha nto kâmɛ l’etshumanelo. Le wanɛ wɛnawɔ ɔnɛ paka tatɛ mbeka la wɔ Bible nto, vɔ koka sala dikambo sɔ. Vɔ mbeyaka nɔmba apandjudi akina dia kimanyiya anto asɔ. Naka wambokɔlɔmba dia sala dikambo sɔ, kete welo wayoyodja ayokimanyiya onto ɔsɔ efula, djekoleko naka wɛ mbosha ekeketshelo ka la ngandji ndo lo yoho ya yokɛma hwe.

⁴ Anto tshɛ wekɔ l’ɔkɔkɔ wa ngɛnangɛna naka onto ɔmɔtshi laki hayosambisha ambotatɛ sambisha nto kâmɛ l’etshumanelo. (Luka 15:⁠6) Welo wadjaso dia keketsha wanɛ wahayosambisha mbeyaka mbɔsama oko ‘dui diotami l’etena kahombama.’​—⁠Tuk. 25:⁠11.

Yɛdikɔ y’Oyoyo Yendana la Bibliɔtɛkɛ ya lo Mbalasa ka Diolelo

Aya ɛnɔnyi efula, wele tshumanelo dia l’andja w’otondo diekɔ lo kimanyiyama lo kamba la bibliɔtɛkɛ ka lo Mbalasa kawɔ ka Diolelo, kakelamɛka ntondo ɔnɛ bibliɔtɛkɛ ka Kalasa k’Olimu wa Teokrasi. Yɛdikɔ ya ntondo yakɛnyaka di’ekɔ ohomba di’etshumanelo tshɛ monga la bibliɔtɛkɛ kawɔ tɔamɛ. Koko lam’ele nshi nyɛ tshumanelo efula diosanganaka lo Mbalasa ka Diolelo ɔtɔi, mbala mɔtshi l’ɛtɛkɛta wotshikitanyi, amboleka mɛnama ɔlɔlɔ di’ɔtɛkɛta l’ɔtɛkɛta monga la bibliɔtɛkɛ kawɔ lo Mbalasa ka Diolelo, bibliɔtɛkɛ wele l’ekanda tshɛ wahombama. Lo Mbalasa ya Diolelo yasangana tshumanelo efula dia l’ɛtɛkɛta wotshikitanyi, ɔtɛkɛta l’ɔtɛkɛta pombaka monga la bibliɔtɛkɛ awɔ.

Sho nongamɛka dia yɛdikɔ nyɛ yayonyokimanyiya dia kondja yema ya dihole ndo di’aha adepasɛ salema efula. Ndo nto, sanganya bibliɔtɛkɛ ehende kana ndekana mbeyaka kimanyiya dia monga la bibliɔtɛkɛ wa dimɛna efula. Naka nyambosanganya bibliɔtɛkɛ shɔ, kete kɔpi hiende y’abuku koka mombama lɔkɔ dia ndjokambaka la yɔ l’ɔkɔngɔ naka Mbalasa ya Diolelo y’eyoyo yambokama. Naka Mbalasa ka Diolelo kekɔ l’ɔrdinatɛrɛ wele la CD-ROM Watchtower Library, kete anto amɔtshi wayokimanyiyama efula l’ehomɔ kɛsɔ.

Lo bibliɔtɛkɛ tshɛ wa lo Mbalasa ka Diolelo, ayoleka dimɛna ɔnangɛso ɔmɔtshi lele l’atei w’emendji wa Kalasa k’Olimu wa Teokrasi monga l’ɔkɛndɛ wa namaka bibliɔtɛkɛ kakɔ. Nde pombaka kotshaka yema yema ekanda wahombama lo bibliɔtɛkɛ ndo fundaka lo yoho yɛnama hwe l’etei ka lohoso l’okanda tshɛ dia mɛnya ɔnɛ vɔ wekɔ okanda wa lo bibliɔtɛkɛ ka lo Mbalasa ka Diolelo. Mbala ɔtɔi l’ɔnɔnyi nde pombaka sala ɛvatɛrɛ dia ndjashikikɛ dia ndoko okanda woshishwe lo bibliɔtɛkɛ ndo nde pombaka ndjashikikɛ di’ekanda watalana. Ndoko lele la lotshungɔ la tomba l’okanda oma lo bibliɔtɛkɛ wa lo Mbalasa ka Diolelo.

Bibliɔtɛkɛ wa lo Mbalasa ka Diolelo wayotetemala ngɛnangɛnama efula oma le anto tshɛ wasangana l’etshumanelo. Nyɛsɔ tɛnya shoamɛ dia sho ngɛnangɛnaka yɛdikɔ shɔ lo nama bibliɔtɛkɛ akɔ ndo kamba la wɔ dia nyanga ‘ewo ka Nzambi.’​—⁠Tuk. 2:⁠5.