Ekimanyielo Kayɛ Kekɔ Ohomba

¹ “Losaka efula lo kɛnɛ tshɛ kamboyotosalɛ. Olimu ayɛ mɛtɛ wambotêla wahɔ efula.” Ɛtɛkɛta ɛsɔ mɛnyaka lowando leso lalɔ otsha le dikumanyi ndo ekambi w’olimu. Oko watatetemala ɔlɔngɔswamelo waki Nzambi pama, mbatawatetemala monga la ohomba w’apami wambotshunda dia kamba lo tshumanelo suke la 100000 dia l’andja w’otondo. Naka wɛ ekɔ ɔnangɛso lambobatizamaka, kete ekimanyielo kayɛ kekɔ ohomba.

² ‘Kombola’: Ngande wakokayɛ kombola dia kondja waɛsɛ akina w’olimu? (1 Tim. 3:⁠1) Ntondotondo, ele lo mbisha ɛnyɛlɔ k’ɔlɔlɔ lo akambo tshɛ wa lo lɔsɛnɔ layɛ. (1 Tim. 4:12; Tito 2:​6-8; 1 Pet. 5:⁠3) Yasha tshɛ l’olimu w’esambishelo, ndo kimanyiya anto akina dia vɔ sala woho akɔ wâmɛ. (2 Tim. 4:⁠5) Yasha la otema ɔtɔi lo wahɔ w’asekayɛ ambetawudi. (Romo 12:13) Onga ombeki w’oshika w’Ɔtɛkɛta wa Nzambi, ndo hamia akoka ayɛ wa “dietshelu di’ololo.” (Tito 1:9; 1 Tim. 4:13) Kotshaka ɛkɛndɛ wakosha dikumanyi l’etete tshɛ. (1 Tim. 3:10) Naka wɛ ekɔ ɔtɛ wa nkumbo, kete ‘lɔmbɔla nkumbo kayɛ lo yoho ya dimɛna.’​—⁠1 Tim. 3:​4, 5, 12.

³ Sɔnwama dia kambɛ anto akina oko okambi w’olimu kana ekumanyi nɔmbaka dia mbidja welo efula ndo monga la yimba ya ndjahombia. (1 Tim. 5:17) Ɔnkɔnɛ, etena kakombolaso dia pama, toyatshutshuya dia kambɛ anto akina la ndjakitshakitsha tshɛ. (Mat. 20:​25-28; Joa. 13:​3-5, 12-17) Kana lomba la ɛnyɛlɔ ka Timɔtɛ, ndo yanga woho wa kiokoya. (Fil. 2:​20-22) Oko nde, sala dia lɔkɛwɔ layɛ l’ɔlɔlɔ kokonya dia wɛ sɔnama. (Etsha 16:​1, 2) Naka wɛ kɛnɛmɔla waonga akina wa lo nyuma wele ohomba dia wɛ kondja waɛsɛ akina ndo naka wɛ kamba l’alako tshɛ wakoshawɔ, kete “uhamelu aye [wayɛnama] le antu tshe.” ​—⁠1 Tim. 4:⁠15.

⁴ Ambutshi, Nyetsha Ana w’Akɛnda dia Mbisha Ekimanyielo: Ana w’akɛnda koka tatɛ mbeka dia kimanyia anto oma ko tɔkɛndakɛnda tawɔ. Nyowaetsha woho wa vɔ mbidjaka yambalo lo nsanganya, woho wa vɔ sambisha ndo woho wa monga la lɔkɛwɔ lasha ɛnyɛlɔ k’ɔlɔlɔ lo Mbalasa ka Diolelo ndo la kalasa. Etshawɔ dia vɔ ngɛnangɛna dia kambɛ anto akina, sala akambo asɔ oko mɔmba Mbalasa ka Diolelo, kimanyiya esombe w’anto ndo akambo akina. Tshikawɔ dia vɔ mboka ɔngɛnɔngɛnɔ waya oma lo mbisha. (Etsha 20:35) Wetshelo wa ngasɔ koka mbakimanyiya dia vɔ ndjoyala ambatshi mboka, ekambi w’olimu kana dikumanyi lo nshi yayaye.

Tɔlɔmbɔlɛ Wekelo wa Bible Watahame Etenyi 4: Tetsha Ambeki wa Bible dia Ndjalɔngɔsɔlaka

¹ Mbala efula ombeki wadia wekelo la ntondo, wekɛ eshidi lam’ele ekadimwelo, ndo wakanyiya woho wakokande mbisha ekadimwelo l’ɛtɛkɛta ande hita pamaka esadi lo nyuma. Naka wɛ ambɔsa ekongelo ka mbekaka l’onto mbala la mbala, kete lɔngɔsɔla wekelo ɔmɔ kâmɛ la nde dia mbɛnya woho wa nde nɔngɔsɔlaka. Le ambeki efula, ayonga tshondo ya ekimanyielo dia nɔngɔsɔla kâmɛ la nde tshapita kana wekelo w’otondo.

² Woho wa Mbekɛ Eshidi lo Ekadimwelo ndo wa Funda Nɔtɛ l’Omamu: Lembetshiya ombeki woho wa mbishola ekadimwelo mbala kakɔ ɔtɔi lo wembola wofundami. Ɛnyande dibuku diayɛ dia wekelo lɛnɛ akayekɛ eshidi paka lo tɔtɛkɛta kana lo ditelo diele ohomba. Lam’ekanyu, nde mbeyaka kombola ndjela ɛnyɛlɔ kayɛ, lo mbekɛ eshidi lo dibuku diande paka l’ahole wayowokimanyiya dia nde ndjohɔ okadimwelo wayondosha. (Luka 6:40) Oma lâsɔ, lɔmbande dia nde mbisha okadimwelo l’ɛtɛkɛta ande hita. Kɛsɔ ayokokimanyiya dia mɛna woho wambodoshihodia awui wekanyu.

³ Ɔsɛdingwelo wa la yambalo tshɛ w’avɛsa woshidiwɔ koko awui wa lɔkɔ hawofundami ekɔ etenyi kɛmɔtshi k’ohomba kahomba ombeki nɔngɔsɔlaka lo wekelo. (Etsha 17:11) Kimanyiyande dia nde mɛna woho wele divɛsa tshɛ dioshilami sukɛka dui dimɔtshi l’odingɔ. Ɛnyande woho wakokande fundaka wa nɔtɛ l’omamu wa dibuku diande dia wekelo. Ɛnyande dimɛna dia Bible mbele etshina k’awui wekande. Keketshande dia nde kambaka dimɛna la avɛsa woshilami lo kɔmatɛrɛ yashande etena ka wekelo.

⁴ Ovuswelo wa lo Hiembola ndo Ovuswelo wa Tshɛ: La ntondo k’ombeki mimɛ la nɔngɔsɔla wekelo w’otondo, ayonga ohomba le nde dia nde sala ovuswelo wa lo hiembola wa kɛnɛ kayondeka. Ɛnyande dia nde kokaka sala ovuswelo wa lo hiembola wa wekelo lo sɛdingola ɔtɛ wa tshapita, ɛtɛ w’awui wahɔnyi ndo lo kamba l’esato. Lembetshiyande dia la ntondo ka nde kumiya la nɔngɔsɔla, ayonga dui dia lomba dia nde tshungola yema y’etena ka nde vusola awui w’ohomba wɛnyami lo wekelo, ɛnyɛlɔ lo kamba la kiombo y’ovuswelo naka yekɔ lo wekelo. Wohwelo wa ngasɔ ayowokimanyiya dia nde kimɛ awui wele ohomba.

⁵ Mbetsha ombeki dia nɔngɔsɔlaka dimɛna wekelo ande ayowokimanyiya dia nde mbishaka kɔmatɛrɛ y’eshika lo nsanganya ya l’etshumanelo. Dui sɔ diayowokimanyiya nto dia nde monga la mbekelo ya wekelo yayoyokondjiya wahɔ efula l’ɔkɔngɔ wa wekelo wa Bible shila.