‘Toleshamake la ɛtɛkɛta wa mbetawɔ’

¹ Nsɛna lɔsɛnɔ la mamema Nzambi nɔmbaka welo efula. (1 Tim. 4:​7-10) La wolo aso hita, tayɔlɛmba esadi eto ndo tayohekɔ dia nsɛna yoho ya lɔsɛnɔ la ngasɔ. (Is. 40:​29-31) Yoho mɔtshi yakokaso kondja wolo w’oma le Jehowa ele lo ‘ndeshamaka la ɛtɛkɛta wa mbetawɔ.’​—⁠1 Tim. 4:⁠6.

² Mbo ya ndɛ ya lo nyuma y’ɛlɔlɔ: Jehowa toshaka mbo ya ndɛ ya lo nyuma y’ɛlɔlɔ l’ekimanyielo k’Ɔtɛkɛta ande ndo oma lo tshimbo ya ‘ɔhɔmbɔ wa kɔlamelo ndo wa kɛsɔ.’ (Mat. 24:45) Onde sho salaka tshɛ dia kondja wahɔ oma lɔkɔ? Onde sho mbadiaka Bible lushi tshɛ? Onde sho ndjaombɛka etena dia wekelo w’onto ndamɛ ndo dia kanaka yimba la awui wekaso? (Osam. 1:​2, 3) Mbo ya ndɛ y’ɛlɔlɔ shɔ tokeketshaka ndo tokokɛka oma lo andja waki Satana. (1 Joa. 5:19) Naka sho ndeshaka yimba yaso l’akambo w’ɛlɔlɔ asɔ ndo kambaka la wɔ lo nsɛnɔ yaso, kete Jehowa ayonga la so.​—⁠Fil. 4:​8, 9.

³ Jehowa tokeketshaka nto oma lo tshimbo ya nsanganya ya l’etshumanelo. (Heb. 10:​24, 25) Wetshelo wa lo nyuma ɔsɔ ndo lɔngɛnyi la dimɛna latanaso lo nsanganya shɔ tokeketshaka dia sho shika tanga lama wadiɛnaso la ehemba. (1 Pet. 5:​9, 10) Osekaseka ɔmɔtshi w’Okristo akate ate: “Dimi ntshɔka la kalasa lushi l’otondo ndo dikambo sɔ nɛndjakami heyama. Koko, nsanganya yekɔ oko dihole dia diomuyelo lo oswe wa shɛnga, lɛnɛ akondjami wolo wa dimi nyomokikɛ lushi lokina la kalasa.” Sho mɛtɛ tshɔkwamaka efula lo welo wadjaso dia mbɔtɔka lo nsanganya!

⁴ Tosambisha akambo wa mɛtɛ: Sambisha anto akina aki oko mbo ya ndɛ le Yeso. Olimu ɔsɔ wakawoshaka wolo. (Joa. 4:​32-34) Woho akɔ wâmɛ, etena kasawolaso la anto akina lo kɛnɛ kendana la alaka wa diambo waki Nzambi, sho keketshamaka nto. Monga nto la olimu efula l’olimu w’esambishelo tokimanyiyaka dia otema aso ndo yimba yaso mbikama paka lo Diolelo ndo lo ɛtshɔkɔ wayangaso kondja. Dikambo sɔ mɛtɛ tokeketshaka.​—⁠Mat. 11:​28-30.

⁵ Tekɔ mɛtɛ la diɛsɛ dia kondja wahɔ oma lo mbo ya ndɛ ya lo nyuma y’ɛlɔlɔ yasha Jehowa ekambi ande nshi nyɛ! Nyɛsɔ totetemale mbida ekoko wa ɔngɛnɔngɛnɔ dikambo dia lotombo lande.​—⁠Is. 65:​13, 14.

Tɔlɔmbɔlɛ wekelo wa Bible watahame

Etenyi 5: Shikikɛ lofulo la awui wahombanyu mbeka

¹ Etena kaketshaka Yeso, nde akadjaka yimba lo elelo waki ambeki ande, lo mbatɛ “wuhu wakaweyi nimbitela diui.” (Mako 4:33; Joa. 16:12) Lo yoho yakɔ yâmɛ mbele ɛlɔ kɛnɛ embetsha w’Ɔtɛkɛta wa Nzambi pombaka shikikɛ lofulo l’awui lahombawɔ mbeka la ombeki wa Bible lo tshanda mɔtshi. Lofulo l’awui lakokayɛ sɛdingola la ombeki nemanɛka la akoka ndo la awui wele la ɔnɛ lalɔmbɔla wekelo ndo ombeki.

² Hika mbetawɔ ka nge: Le ambeki amɔtshi, dia vɔ shihodia dikambo diakoka ambeki akina shihodia esadi eto lo wekelo ɔtɔi, paka mbeka la wɔ mbala hiende kana shato. Ekɔ ohomba sho kimanyiya ombeki dia nde shihodia dimɛna awui wekama lo dihole dia mbeka awui efula lo tshenyi ya wonya. Ombeki tshɛ ekɔ la ohomba wa ohikɔ wa shikaa dikambo dia mbetawɔ kande k’oyoyo ka lo Ɔtɛkɛta wa Nzambi.​—⁠Tuk. 4:7; Romo 12:⁠2.

³ Etena kalɔmbɔlayɛ wekelo lomingu tshɛ, etsha wenya wahombama dia kimanyiya ombeki dia nde shihodia ndo mbetawɔ kɛnɛ kekande oma l’Ɔtɛkɛta wa Nzambi. Ewɔ dia ntshɔka esadi esadi lo yoho nyɛ yele ombeki hakondja wahɔ oma lo ohomba wa akambo wa mɛtɛ wawetshawɔ. Ɔsa yema ya wenya efula dia kotola yambalo yande oya lo awui woleki ohomba ndo lo avɛsa wosuke wetshelo. ​—⁠2 Tim. 3:​16, 17.

⁴ Tetemala la wekelo: Kânga mbele sho mbewɔka ntshɔ la wekelo esadi esadi, sho ngɛnangɛnaka nto mbewɔ mbekekɔ l’awui akina. Naka ombeki nangaka tɛkɛta efula lo kɛnɛ kendana la akambo ande hita, kete sho mbeyaka ndjalɔngɔsɔla dia ndjosawola la nde akambo akɔ l’ɔkɔngɔ wa wekelo.​—⁠Und. 3:⁠1.

⁵ Lo wedi okina, wangasanu aso lo kɛnɛ kendana la akambo wa mɛtɛ mbeyaka tokonya dia sho tɛkɛta efula wonya wa wekelo. (Osam. 145:​6, 7) Kamba la ɛnyɛlɔ kana la dikambo dimɔtshi kokaka mɔtsha wekelo, koko hatokombola dia ɛnyɛlɔ kana dikambo sɔ monga otale otale ko ndjoshimba ombeki dia nde kondja ewo k’oshika ka wetshelo w’ohomba wa lo Bible.

⁶ Lo mbekaka lofulo la awui wakoka lo wekelo tshɛ, sho kimanyiyaka ambeki wa Bible dia ‘kɛndakɛnda lo osase waki Jehowa.’​—⁠Is. 2:⁠5.