Tɔlɔmbɔlɛ wekelo wa Bible watahame

Etenyi 8: Tɔlɔmbɔlake ambeki otsha lo okongamelo

1. Lande na kele ekɔ ɔlɔlɔ kɛtshanya dikambo dimɔtshi diendana la okongamelo wa Jehowa lomingu tshɛ lam’ekaso la anto Bible?

¹ Oyango aso etena kekaso la anto Bible bu tsho wa mbaetsha awui amɔtshi wendana la dietawɔ, koko ndo wa mbakimanyiya dia vɔ ndjonga anto amɔtshi wa l’atei w’etshumanelo ka Akristo. (Zek. 8:23) Biukubuku Les Témoins de Jéhovah: Qui sont-ils? Quelles sont leurs croyances? kokaka tokimanyiya dia sala dikambo sɔ. Tosha ambeki w’eyoyo wa Bible tobukubuku tɔmɔtshi, ndo takeketsha dia tiada. Lâdiko dia lâsɔ, ɔsaka minitɛ ngana lomingu tshɛ lo wekelo dia nyu kɛtshanya dikambo dimɔtshi diendana la okongamelo wa Jehowa.

2. Ngande wakokayɛ kimanyiya ambeki wa Bible dia vɔ mbɔtɔ lo nsanganya ya lo etshumanelo?

² Nsanganya ya lo etshumanelo: Yoho ya ntondo yakoka ambeki wa Bible ndjotatɛ ngɛnangɛna okongamelo wa Nzambi ele lo sanganaka kâmɛ la so lo nsanganya ya lo etshumanelo. (1 Kor. 14:​24, 25) Ɔnkɔnɛ, wɛ kokaka mbakimanyiya dia vɔ mbeya nsanganya yaso dimɛna lo mbakɔndɔlɛ nsanganya tshanu yasalema lomingu la lomingu, mbala tshɛ losanganya ɔtɔi. Ewoyawɔ ɔtɛ wa sawo dia lo sɛkɛ diayoshama mbala kayaye. Ɛnyawɔ awui wayotɔsɛdingola lo Wekelo wa Tshoto y’Etangelo ndo lo Wekelo wa dibuku wa l’etshumanelo. Kɔndɔla woho wasalema Kalasa k’olimu wa teokrasi ndo Losanganya l’olimu. Etena keyɛ la ɔkɛndɛ lo kalasa, ondo wɛ kokaka mbohola kâmɛ la nde. Ewoyande awui w’ohomba wakatami lo nsanganya. Kamba la esato wele lo ekanda aso dia mbɛnya kɛnɛ katosalemaka lo nsanganya. Etawɔ dia vɔ mbɔtɔ lɔkɔ oma ko wekelo wa ntondo.

3. Awui akɔna wendana la okongamelo wakokaso kɛtshanya?

³ Etena kayasukana Eohwelo, nsanganya ya weke, kana diembwelo dia omendji w’otshimbedi, ɔsa minitɛ ngana dia mbolembetshiya ndo fudia nsaki kande lo ɛlɔngɔswɛlɔ ɛsɔ. Kotakadimolaka yema yema ambola wele oko: Lande na kelamɛso ɔnɛ: Ɛmɛnyi wa Jehowa? Lande na kelɛso ahole aso wa nsanganya ɔnɛ: Mbalasa ya Diolelo? Naa ɛkɛndɛ wele la dikumanyi ndo ekambi w’olimu? Ngande wokongɛmi esambishelo ndo bɛtshi dia nkɛtɛ? Ngande watondjama ekanda aso? Oma lende atomba falanga yakɛndjakɛndja okongamelo? Naa ɛkɛndɛ wele la biro ka filialɛ ndo Olui-Walɔmbɔla lo kɛnɛ kendana la ɛlɔmbwɛlɔ k’olimu?

4, 5. Ngande wakoka bandɛ vidɛo yakiso fudia eokelo ndo lowando laso lo okongamelo wa Jehowa?

⁴ Bandɛ vidɛo yasha wetshelo: Yoho kina yakoka ombeki wa Bible shihodia okongamelo wa diambo wa Jehowa ele oma lo tshimbo ya waa bandɛ vidɛo. Kamba la bandɛ vidɛo nyɛ: Jusqu’aux extrémités de la terre, Toute la communauté de nos frères ndo Unis grâce à l’enseignement divin. Womoto ɔmɔtshi lakalongolaka periodikɛ yaso lo edja ka ɛnɔnyi etanu akakɛdia asɔi etena kakandende bandɛ vidɛo, Les Témoins de Jéhovah : un nom, une organisation. Nde akayongaka la wɛkamu le Ɛmɛnyi wakayaka ndjowembola, koko l’ɔkɔngɔ wa nde menda vidɛo, nde akɛnyi dia nde akakoke mbɛkama ndo okongamelo. Wakatatɛ mbeka la nde Bible, ndo lomingu lakayele nde akɔtɔ lo nsanganya ya lo Mbalasa ka Diolelo.

⁵ Lo mbetshaka minitɛ ngana lomingu tshɛ kâmɛ la ambeki aso ndo lo kambaka la dihomɔ diele laso, sho kokaka nɔmbɔlaka ambeki aso wa Bible yema yema otsha lo tshɔi yakɔ ya okongamelo yakamba la Jehowa ɛlɔ kɛnɛ.

Woho wa mbisha anto periodikɛ

(Numɛlɔ kele bu l’ɔtɛkɛta anyu, ko nyu menda lo Falase)

Tshoto y’Etangelo Ngɔ. ka 4, 15

“Shi lokema la nsango yahashilaki yekɔ lo mbewoyama ɛlɔ kɛnɛ? [Tshikande akadimole.] Koko lo nsango shɔ tshɛ, ndoko lɔnɛ loleki awui watanema lo divɛsa nɛ. [Adia Joani 17:⁠3.] Periodikɛ kɛnɛ nembetshiyaka ele ‘lɔsɛnɔ la pondjo’ ndo woho wakokaso kondja ewo katɔla otsha lo lɔsɛnɔ lakɔ la pondjo.”

Réveillez-vous! Ngɔ. ka 4, 22

“Kânga mbele ondo Yeso Kristo mbeyamaka dimɛna oleki anto tshɛ wakonge la lɔsɛnɔ, anto efula ndjambolaka ɔnɛ ênde mɛtɛ. Onde wɛ mbeyaka dia kânga apɔstɔlɔ waki Yeso wakambola ngasɔ? [Tshikande akadimole. Oma lâsɔ adia Mako 4:41.] Periodikɛ kɛnɛ mɛnyaka kɛnɛ kata Bible lo dikambo dia lonto la mɛtɛ laki Yeso.”

Tshoto y’Etangelo Ngɔ. ka 5, 1

“Etena kavɔ onto ɔmɔtshi lalangaso, sho kombolaka dia mɛnana nto la onto akɔ. Shi ekɔ ngasɔ? [Tshikande akadimole.] Anto efula wakakondja esambelo oma lo daka dia lo Bible dia eolwelo. [Adia Joani 5:​28, 29.] Periodikɛ kɛnɛ nembetshiyaka etena kayonga eolwelo ndo wanɛ mɛtɛ wayolɔ.”

Réveillez-vous! Ngɔ. ka 5, 8

“Ambutshi efula sɔnaka kɛnɛ ketawɔwɔ dia anawɔ menda. Onde ekɔ wolo tana tɔkɛnyɔ ta amɛna dikambo dia nkumbo kayɛ? [Tshikande akadimole. Oma lâsɔ ko wɛ mbadia Efeso 4:17.] Periodikɛ kɛnɛ mɛnyaka nganɛ wakoka ambutshi kimanyiya anawɔ dia vɔ sɔna tɔkɛnyɔ ta amɛna.”