Esambishelo tokimanyiyaka dia mbikikɛ

¹ Ɔtɛkɛta wa Nzambi tokeketshaka dia ‘sho ndawɔ la ekikelo lowango lele la ntondo kaso.’ (Heb. 12:⁠1) Oko wele ondawi wa lowango ekɔ la ohomba wa ekikelo dia koma polo l’ekomelo, sho lawɔ tekɔ la ohomba wa ekikelo dia kondja difuto dia lɔsɛnɔ la pondjo. (Heb. 10:36) Ngande wakoka olimu w’Okristo tokimanyiya dia mbikikɛ la kɔlamelo tshɛ polo ndo l’ekomelo?​—⁠Mat. 24:⁠13.

² Tekɔ lo keketshama lo nyuma: Woho wewoyaso anto daka dia diambo diele lo Bible diendana la andja w’oyoyo wa losembwe tokimanyiyaka dia tetemala pɛtshahɛtsha elongamelo kaso. (1 Tes. 5:⁠8) Etena kasambishaso mbala la mbala, tekɔ la diaaso dia mbeyanya akambo wa mɛtɛ wele lo Bible wakateke. Tekɔ la diaaso dia mamɛ mbetawɔ kaso katokimanyiya dia sho keketala lo nyuma.

³ Dia sho mbetsha akina dimɛna, sho shoamɛ pombaka shihodia akambo wa mɛtɛ wa lo Bible dimɛna efula. Sho pombaka sala eyangelo ndo kana yimba lo akambo akɔ. Welo wadjaso la etete fudiaka ewo kaso, keketshaka mbetawɔ ndo lonyuma laso. (Tuk. 2:​3-5) Ɔnkɔnɛ, etena kayangaso dia kimanyiya akina, sho ndjakeketshaka shoamɛ.​—⁠1 Tim. 4:​15, 16.

⁴ Sambisha l’ohetoheto ekɔ etenyi kɛmɔtshi ka “eloto tshe wa ta wa [Nzambi],” wele laso ohomba dia pangakalɛ Diabolo la ɛdiɛngɛ. (Ef. 6:​10-13, 15) Woho wayashaso efula lo elimu w’ekila tokimanyiyaka dia mbika timba taso lo akambo wôdia ndo dia mbewɔ diaha andja wa Satana ndjolanya lɔkɛwɔ laso. (Kol. 3:⁠2) Etena ketshaso akina mboka ya Jehowa, sho ndjaoholaka ohomba wele laso shoamɛ wa mongaka la lɔkɛwɔ l’ekila.​—⁠1 Pet. 2:⁠12.

⁵ Tekɔ lo kondja wolo oma le Nzambi: Mbokɛmaka dia, woho wayashaso lo olimu w’esambishelo tetshaka dia ndjaɛkɛ le Jehowa. (2 Kor. 4:​1, 7) Ɔsɔ mɛtɛ ekɔ dikambo di’ɔlɔlɔ! Monga la wɛkamu wa ngasɔ tokimanyiyaka aha tsho dia kotsha olimu aso, koko ndo dia ndɔshana la ekakatanu tshɛ wakokaso pomana lawɔ lo lɔsɛnɔ. (Fil. 4:​11-13) Lo mɛtɛ, dia mbikikɛ ekɔ ohomba efula mbeka dia ndjaɛkɛ tshɛ le Jehowa. (Osam. 55:22) Lo weho efula, esambishelo tokimanyiyaka dia mbikikɛ.

Tɔlɔmbɔlɛ wekelo wa Bible watahame

Etenyi 10: Tolakanya ambeki wa Bible esambishelo ka lo luudu la luudu

¹ Etena kashikikɛ dikumanyi dia ombeki wa Bible aya opandjudi wahatabatizama, nde kokaka tatɛ sambisha la etshumanelo lo esambishelo ka lo sɛkɛ. (Enda dibuku Organisés pour faire la volonté de Jéhovah, lɛkɛ 79-81.) Ngande wakokaso kimanyiya ombeki dia nde monga la akoka wa sambisha lo luudu la luudu?

² Nyɔlɔngɔsɔlake kâmɛ: Ndoko koleki ndjalɔngɔsɔla dimɛna. Ɛnya ombeki lɛnɛ akokande tana mbɔtwɛlɔ lo Olimu aso wa Diolelo kana lo dibuku Comment raisonner, ndo kimanyiyande dia nde sɔna mbɔtwɛlɔ ka wɔdu kɔtɔnɛ la awui wa lo ɛtshi kanyu ka nkɛtɛ. Oma ko etatelo, keketshande dia nde kambaka la Bible etena kasambishande.​—⁠2 Tim. 4:⁠2.

³ Ekɔ ohomba dia opandjudi w’oyoyo tâhembi mbɔtwɛlɔ shɔ esangɔ efula. Etena kahemba ombeki mbɔtwɛlɔ shɔ, ɛnyande woho wakokande kandola la ɔkɔmi tshɛ ekakatanu waleka pomana laso lo ɛtshi kaso ka nkɛtɛ. (Kol. 4:⁠6) Shikikɛnde dia okambi w’Okristo kema l’ohomba wa mbeya okadimwelo l’oseka dimbola tshɛ diakoka mbôka onto lasawola la nde. Mbala efula ekɔ ɔlɔlɔ kadimola lo ambola asɔ lo nɔmba onto lasawola la so dia sho tosala eyangelo ko ndjokalola dia ndjɔkɛtshanya dikambo diakɔ nto.​—⁠Tuk. 15:⁠28.

⁴ Nyosambishake kâmɛ: Etena ka ntondo katomba ombeki lo esambishelo ka lo luudu la luudu, tshikande asɛdingole woho wakambayɛ la mbɔtwɛlɔ kakanyatalɔngɔsɔdi kâmɛ. Oma lâsɔ ko wɛ ndjotshikɛ etena. Tena dimɔtshi, mbeyaka monga ɔlɔlɔ nɔmba opandjudi w’oyoyo dia nde mbuta paka etenyi ka mbɔtwɛlɔ keto, oko mbadia ndo mbisha kɔmatɛrɛ lo divɛsa dimɔtshi. Dja yimba lo lonto ndo lo akoka w’ombeki. (Fil. 4:⁠5) Paka tândolaka ombeki etena katayawolakanya yema yema toho totshikitanyi t’olimu w’esambishelo.

⁵ Ekɔ ohomba kimanyiya opandjudi w’oyoyo dia monga la ekongelo ka tombaka mbala la mbala lo esambishelo, mbuta ate lomingu tshɛ naka kokaka. (Fil. 3:16) Nyosale ekongelo ka shikaa ka tombaka kâmɛ lo esambishelo, ndo keketshande dia sambishaka kâmɛ la apandjudi akina wele l’ohetoheto. Ɛnyɛlɔ kawɔ ndo lɔngɛnyi la lawɔ ayowokimanyiya dia nde pamia akoka ande ndo monga la ɔngɛnɔngɛnɔ dia sambishaka lo luudu la luudu.