Ampokami wakeketshame ndo wakondja wolo

OYADI ekakatanu wa ngande wele lawɔ, ekambi waki Nzambi la dia kondja ekeketshelo kele lawɔ ohomba l’etshumanelo k’Akristo. Dia vɔ kikondja, anto tshɛ, djekoleko dikumanyi la dia ndjashikikɛ dia asawo ndo alako awɔ wekɔ l’ɛtɛkɛta wakeketsha. Dikumanyi la dia monga mɛtɛ “eshamelu uma lu lopepe, uku ukumbo uma lu ngimbi, uku ekedi w’ashi lu kete ya wumu, ndu uku dedi dia dive dia wuki l’usui watuhekuyaka antu.”​—Is. 32:2.

Naka wɛ ekɔ ekumanyi, onde alako ayɛ keketshaka ndo mbishaka anto esambelo? Onde vɔ keketshaka wanɛ wasala la wolo dia kambɛ Jehowa la kɔlamelo tshɛ? Onde vɔ mbishaka onto wolo wa tetemala la sala lolango laki Nzambi oyadi kânga l’atei wa wendjodi ndo w’ɔlɔshamelo? Ahombayɛ sala naka anto amɔtshi wa l’atei w’ampokami ayɛ wambɔkɔmɔ etema, wekɔ la pâ k’efula lo kɛnɛ kendana l’ekondjelo, kana wekɔ lo diɛnɛ la hemɔ kɛmɔtshi kaheyama okanga atɔ na? Wɛ koka ‘keketsha ananyɔ oma l’ɛtɛkɛta watondjayɛ.’​—Jobo 16:5.

Kamba la diaaso diele layɛ oko ɔtɛkɛtshi dia kimanyiya ananyɔ dia kondja elongamelo ndo ekeketshelo oma le Jehowa ndo oma lo tɛdikɔ takandɔshi.​—Romo 15:13; Ef. 6:10.

Oholawɔ kɛnɛ kakasale Jehowa. Yoho mɔtshi y’ohomba ya keketsha anto ele mbaɛnya woho wakakimanyiya Jehowa ekambi ande wa lo nshi yakete waki l’atei w’ekakatanu.​—Romo 15:4.

Jehowa akatɛ Mɔsɛ dia ‘keketsha’ Jashua la ntondo k’Isariyɛlɛ mbɔtɔ lo Nkɛtɛ ya Daka, yaki l’etena kɛsɔ l’anya wa wedja w’atunyi. Ngande wakasale Mɔsɛ dikambo sɔ na? Lo washo wa Jashua, Mɔsɛ akohola wodja w’otondo akambo wakâsalɛ Jehowa lam’akawatombe oma l’Edjibito. (Euh. 3:28; 7:18) Mɔsɛ akatɛkɛta nto woho wakâkimanyiya Jehowa dia vɔ nɛndja ase Amɔra. Oma lâsɔ, Mɔsɛ akakeketsha Jashua ate: “Ukikitali, uyali la dihunga.” (Euh. 31:1-8) Etena kayangayɛ dia keketsha ananyɔ, onde wɛ mbakimanyiyaka dia vɔ kondja wolo lo mbohɔ kɛnɛ kakashile mbasalɛ Jehowa?

Mbala mɔtshi, anto kɔmɔka etema lo yoho yamboleka l’ɔtɛ w’ekakatanu wele lawɔ polo ndo lo vɔ koma lo ndjambola dia kana mɛtɛ wayɛna ɛtshɔkɔ wa Diolelo lushi lɔmɔtshi. Oholawɔ di’alaka waki Jehowa hawetaka pa.​—Jas. 23:14.

Lo wedja efula, wamboshimbaka anangɛso dia sambisha lokumu l’ɔlɔlɔ. Lo tena dia ngasɔ, dikumanyi dioludi la ngandji koka kimanyiya anyawɔ ambetawudi dia kondja ekeketshelo oma lo kɛnɛ kakakomɛ apɔstɔlɔ waki Yeso Kristo. (Etsha 4:1–5:42) Ndo naka wɛ mbaɛnya woho wakengesola Jehowa akambo oko wofundamidiɔ lo dibuku dia Esta, kete mɛtɛ dikambo sɔ diayosha ananyɔ dihonga.

Anto amɔtshi mbɔtɔka lo nsanganya ya l’etshumanelo koko hawohame otsha la ntondo. Ondo vɔ fɔnyaka dia Nzambi hakoke mbadimanyiya pondjo nɛ dia pɛkato yakawasale ntondo yaki kɔlɔ efula. Lâsɔ wɛ koka mbakɔndɔlɛ kɛnɛ kakasalɛ Jehowa Nkumekanga Manase. (2 Ek. 33:1-16) Kana wɛ koka tɛkɛta dikambo di’ase Kɔrɛtɔ w’edjedja wakatshikitanya yoho yawɔ ya lɔsɛnɔ ko koma Akristo ndo wakɔsama oko anto wa losembwe lo washo wa Nzambi.​—1 Kor. 6:9-11.

Onde anto amɔtshi fɔnyaka di’ekakatanu wele lawɔ mɛnyaka dia Nzambi ambowaoka ɔkɔngɔ? Wɛ koka mbaohola kɛnɛ kakakomɛ Jɔbɔ ndo woho wakandatshɔkwama efula nɛ dia nde koshisha kɔlamelo yande le Jehowa. (Jobo 1:1-22; 10:1; 42:12, 13; Osam. 34:19) Asambi wa kashi waki Jɔbɔ wakate dia nde akadiɛnɛka nɛ dia weho akɔ tshɛ Jɔbɔ akatshe pɛkato kɛmɔtshi. (Jobo 4:7, 8; 8:5, 6) Lo yoho yotshikitanyi, lam’akawakeketsha ambeki ndo “wa[kawâ]kokomiya dia ntshikala lu mbetawo,” Paulo nde la Baranaba wakate vate: “L’atei w’asui, kahumbasu mboto lo diulelu dia [Nzambi].” (Etsha 14:21, 22) Popo nd’ɛlɔ, wɛ koka keketsha wanɛ wele l’atei w’ehemba lo mbaɛnya di’Akristo tshɛ la dia mbikikɛ lam’ewɔ l’atei w’asui ndo dionga sɔ diekɔ la kɛnɛmɔ k’efula lo washo wa Nzambi.​—Tuk. 27:11; Mat. 24:13; Romo 5:3, 4; 2 Tim. 3:12.

Keketsha ampokami ayɛ dia kanyiya toho tambokotsha Jehowa alaka ande lo nsɛnɔ yawɔ hita. Lo mbaohola awui amɔtshi, vɔ koka mɛna kɛnɛ kakashile Jehowa la mbasalɛ oko wakandalake. L’Osambu 32:8, sho mbadiaka ɔnɛ: “Dimi layuketshaka ndo layukenyaka mbuka ka we nkendakenda, dimi layukulakaka, layukendaka.” Lo mbohola ampokami ayɛ woho wakâlɔmbɔla ndo wakâkeketsha Jehowa, wɛ mbâkimanyiyaka dia vamɛ mɛna dimɛna ɔnɛ Jehowa mbâkokɛka ndo ɔnɛ nde ayowakimanyiya mɛtɛ oyadi ehemba akɔna wayowakomɛ.​—Is. 41:10, 13; 1 Pet. 5:7.

Ngɛnangɛna kɛnɛ kasala Nzambi ɛlɔ kɛnɛ. Etena kayangayɛ dia keketsha ananyɔ, kotola yambalo yawɔ lo kɛnɛ kasala Jehowa ɛlɔ kɛnɛ. Naka wɛ tɛkɛta awui asɔ lo yoho yɛnya dia vɔ kɔngɛnyangɛnyaka, kete dikambo sɔ diayotshutshuya ampokami ayɛ dia vɔ lawɔ mbangɛnangɛna.

Sɛdingola woho watokimanyiya Jehowa dia ndɔshana l’ekakatanu wa lo lɔsɛnɔ. Nde tɛnyaka yoho yoleki dimɛna ya sɛna. (Is. 30:21) Nde tolembetshiyaka bonde kasalema awui wa ngala, awui wa kɔlɔ, wola, hemɔ, ndo nyɔi ndo totɛka woho wayondokumiya awui asɔ tshɛ. Nde todinga la nkumbo k’anto l’ɔnango koludi la ngandji. Nde akatosha diɛsɛ dia woke dia sawolaka la nde lo dɔmbɛlɔ. Nde toshaka diaaso dia sho monga Ɛmɛnyi ande. Nde todiholaka washo dia sho mɛna ɔnɛ Kristo amboshilaka la mbahenyama l’okudi l’olongo ndo ɔnɛ nshi y’ekomelo ya dikongɛ di’omusu di’akambo nɛ diayanga la komɛ kem’edja.​—Eny. 12:1-12.

Oma lâdiko w’akambo asɔ w’ɔlɔlɔ tekɔ nto la nsanganya ya l’etshumanelo, ndo ya weke. Naka wɛ tɛkɛta la lowando tshɛ dikambo dia tɛdikɔ tɔsɔ, kete wɛ ayokeketsha anto akina di’aha vɔ mbohɛ ohomba wa nsanganya yaso y’Akristo.​—Heb. 10:23-25.

Alapɔlɔ wɛnya woho watshɔkɔla Jehowa welo wadjaso l’olimu w’esambishelo ekɔ nto kiɔkɔ y’ekeketshelo. Lo ntambe ka ntondo lam’akatatshɔka Paulo nde la Baranaba otsha la Jerusalɛma, vɔ ‘wakasha anangɛwɔ ɔngɛnɔngɛnɔ w’efula,’ lo mbâkɔndɔlɛ dimɛna woho wakakadimola ase wedja etema. (Etsha 15:⁠3) Wɛ lawɔ koka mbisha ananyɔ ɔngɛnɔngɛnɔ lo mbâkɔndɔlɛ awui amɔtshi w’ɔlɔlɔ wakayɛnyi.

Anto koka keketshama nto naka wayokimanyiyama dia mɛna ohomba wa kɛnɛ kasalawɔ. Andolawɔ lo woho wayashawɔ l’olimu w’esambishelo. Andola wanɛ waya bu l’akoka wa kamba efula l’ɔtɛ wayawɔ esombe kana l’ɔtɛ wa hemɔ koko wekɔ lo mɛnya etetemalelo kawɔ la kɔlamelo tshɛ. Oholawɔ dia Jehowa hatohɛ ngandji kakawɛnya lo lokombo lande. (Heb. 6:10) Mbetawɔ kambohembama kekɔ la nɛmɔ efula. (1 Pet. 1:6, 7) Pombaka mboholaka anangɛso dikambo sɔ.

Tɛkɛta la nsaki lo dikambo di’elongamelo kele la ntondo kaso. Alaka wakasambiyama wendana l’akambo wayaye ekɔ kiɔkɔ ya wolo y’ekeketshelo le anto tshɛ woka Nzambi ngandji. Ondo efula l’atei w’ampokami ayɛ wokokaka dikambo di’alaka asɔ. Koko lowando lɛnyayɛ etena katɛkɛtayɛ di’alaka akɔ, koka mɛnya ohomba awɔ, mbaetawoya dia wayokotshama, ndo ndodja etema awɔ la lowando. Kamba la kɛnɛ kekayɛ lo Kalasa k’Olimu wa Teokrasi ayokokimanyiya dia sala dikambo sɔ.

Jehowa ndamɛ ekɔ Ɛnyɛlɔ ka Kokele lo kɛnɛ kendana la keketsha ndo mbisha ekambi ande wolo. Eelo, wɛ koka kamba kamɛ la nde dia keketsha anto akina. Etena katɛkɛtayɛ la ntondo k’etshumanelo, kamba la diaaso sɔ dimɛna dia wɛ keketsha anto ndo mbasha wolo.