Tokimanyiya Anto Akina dia Vɔ Tombola Jehowa

¹ Losango l’ohomba efula lekɔ lo mbewoyama le anto wa lo nkɛtɛ k’otondo ɔnɛ: “Nyuki [Nzambi] woma, nyûtumbuli, ne dia unya andi w’elumbwelu ambukuka. Nyotemole one lakatungi ulungu la kete la ashi a wuki la teko di’ashi.” (Eny. 14:​6, 7) Sho mbele la diɛsɛ dia mbewoya losango lɔsɔ. Kakɔna kahomba anto mbeya lo dikambo dia Jehowa dia vɔ mbôka wɔma ndo mbɔtɛmɔla na?

² Lokombo Lande: Oma lo lokombo lande mbahomba anto mbeya tshikitanya Nzambi ɔtɔi ka mɛtɛ la tozambizambi efula ta kashi tatɛmwama ɛlɔ kɛnɛ. (Euh. 4:35; 1 Kor. 8:​5, 6) Diakɔ diele afundji wa Bible wakakambe la lokombo la diambo laki Jehowa ndekana mbala 7000. Kânga mbahombaso monga la shɛnɔdi lo mbewoya anto lokombo laki Nzambi, sho hatohombe pondjo mbolishɛ kana tshika dia kamba lalɔ. Lolango laki Nzambi ele di’anto tshɛ mbeya lokombo lande.​—⁠Osam. 83:⁠18.

³ Lonto Lande: Dia vɔ tombola Jehowa, anto pombaka mbeya woho wa Nzambi kende. Sho pombaka mbamanya ngandji ka mamba kele la Nzambi fundo, lomba laheme tshɛ lele lande, losembwe loleki tshɛ lele lande, ndo la nkudu kahadjama anya kele lande, kamɛ ndo nkɛtshi, ɔlɔlɔ w’otema, ndo waonga akina wa diambo wele lande. (Etum. 34:​6, 7) Vɔ pombaka nto mbeka dia mboka Nzambi wɔma ndo mbɔtɛmɔla ndo mbeya ɔnɛ lɔsɛnɔ lawɔ nemanɛka la woho wetawɔmawɔ le Jehowa.​—⁠Osam. 89:⁠7.

⁴ Woho wa Sukana la Nzambi: Dia vɔ ndjoka l’elombwelo kaki Jehowa kayaye, anto pombaka tɛndɛ Jehowa la mbetawɔ tshɛ. (Romo 10:​13, 14; 2 Tes. 1:⁠8) Kɛsɔ halembetshiya tsho mbeya lokombo ndo waonga waki Nzambi. Sho pombaka kimanyiya anto dia monga la diɔtɔnganelo di’ɔlɔlɔ la Jehowa, ndo ndjaɛkɛ le nde l’etema awɔ tshɛ. (Tuk. 3:​5, 6) Naka vɔ kamba la kɛnɛ kekawɔ, nɔmbaka Nzambi l’otema ɔtɔi, ndo kondja ekimanyielo kande lo nsɛnɔ yawɔ, kete mbetawɔ kawɔ kayokeketala ndo wayonga l’akoka wa ndjasukanya le Jehowa.​—⁠Osam. 34:⁠8.

⁵ Nyɛsɔ tewoya lokombo laki Nzambi l’ohetoheto tshɛ ndo tokimanyiya anto akina dia vɔ ndjaɛkɛ tshɛ le nde ndo mbôka wɔma. Ɔsɔku mbayotokimanyiya anto efula dia vɔ mbeya Jehowa ndo mbotombola oko ‘Nzambi ka panda’ kawɔ.​—⁠Osam. 25:⁠5.

Tɔshi Diangɔ Diakamba Laso l’Elimu wa Teokrasi la Nɛmɔ

¹ Lam’akandɔshi yɛdikɔ ya nɔngɔsɔla tɛmpɛlɔ, Nkumekanga Josiya akandola wanɛ wakasɔnama dia kamba olimu ɔsɔ ate: ‘Ndoko lakahombaka mbala falanga la wanɛ wakawayishaka, nɛ dia vɔ wakakambaka la kɔlamelo.’ (2 Khum. 22:​3-7) Woho wakɔsaka anto asɔ diangɔ di’ekila la nɛmɔ akɛnamaka oma lo woho wakawakambaka l’ekundji wakawawashaka ɔkɛndɛ wa kamba lawɔ. Ɛlɔ kɛnɛ, oko wayashaso l’olimu w’ekila wa lokumu l’ɔlɔlɔ la Nzambi, sho lawɔ pombaka mɛnya kɔlamelo lo woho wakambaso l’ekundji wa Diolelo watoshawɔ ɔkɛndɛ.

² L’Olimu w’Esambishelo: Mbeya nɛmɔ ndo monga la lowando lo losango l’ohomba lele l’ekanda aso ndo mbeya falanga yakatombe dia mbatondja totshutshuyaka dia mbɔsa ekanda akɔ la nɛmɔ di’efula. Hatohombe tshika ekanda aso aha la kanyiya l’anya w’anto wahangɛnangɛna mɛtɛ losango lele lo Bible. Naka onto hɛnyisha nsaki k’efula lo lokumu l’ɔlɔlɔ, kete sho pombaka mbosha traktɛ lo dihole di’okanda.

³ Tokahanya ekanda lo yoho yɛnya dia sho mbɔsaka ekanda akɔ la nɛmɔ. Tewɔ dia tshika ekanda akɔ l’ahole wakokawɔ pandjɔnɛ ko nanyema. Dia mbewɔ oshishelo ɔsɔ, sho pombaka menda lofulo l’ekanda wele laso la ngelo la ntondo ka mbɔsa ekina. Naka wɛ ekɔ lo nongola mbala la mbala periodikɛ kina lâdiko wa nyɛ yele layɛ ohomba, kete ona woho wa kitshakitsha kɔmandɛ kayɛ.

⁴ Ekanda Aso Shamɛ: Sho pombaka nɔmbaka paka ekanda weso lawɔ mɛtɛ ohomba. Sho pombaka mbewɔ dia nɔmba ɔlɔmbalɔmba ekanda wele oko Bible ya liksɛ, Bible avec références , ndo ekanda ekina wa weke, oko Concordance, Index, Études perspicaces des Écritures ndo dibuku Les Témoins de Jéhovah: Prédicateurs du Royaume de Dieu, nɛ dia ekanda ɛsɔ tshɛ nɔmbaka falanga efula dia mbatondja.

⁵ Onde wɛ fundaka mbala tshɛ lokombo ndo adrɛsɛ ayɛ l’ekanda ayɛ hita? Kɛsɔ kimanyiyaka di’aha mbisha onto okanda aso hita lo dioha ko ndjona dia sala kɔmandɛ kekina. Naka wɛ amboshisha dibuku di’esambo, Bible, kana dibuku dia wekelo, kete ondo wɛ mbeyaka dishola lo diangɔ diakashishɔ diakawatshumanya lo Mbalasa ka Diolelo kana l’ahole wa nsanganya ya weke.​—⁠Luka 15:​8, 9.

⁶ Nyɛsɔ tosale la wolo dia kamba l’ekanda aso la lomba. Ɔsɔ ekɔ yoho mɔtshi ya mɛnya kɔlamelo yaso lo woho wakambaso l’ekundji wa Diolelo watosha Jehowa.​—⁠Luka 16:⁠10.